កម្ពុជានិងសហរដ្ឋអាមេរិកចូលរួមលំហាត់សមយុទ្ធយោធារួមគ្នា
កងទ័ពកម្ពុជា និងសហរដ្ឋអាមេរិក នឹងចូលរួមក្នុងលំហាត់សមយុទ្ធយោធារួមគ្នា ដែលមានឈ្មោះថា “ឆ្មាំអង្គរ ឆ្នាំ២០១៣” ចាប់ពីថ្ងៃទី១៦ ដល់ថ្ងៃទី២៩ឧសភា នៅក្នុងខេត្តកំពង់ស្ពឺ។ ឆ្មាំអង្គរឆ្នាំ២០១៣ គឺជាលំហាត់សមយុទ្ធទ្វេភាគីធំមួយ ដែលជាការបន្តការខិតខំប្រឹងប្រែងលើរយៈពេលច្រើនឆ្នាំរបស់កងកម្លាំងទ័ពសហរដ្ឋអាមេរិក ប្រចាំនៅតំបន់ប៉ាស៊ីហ្វិក និងបញ្ជាការដ្ឋានសហរដ្ឋអាមេរិក ប្រចាំតំបន់ប៉ាស៊ីហ្វិក ដើម្បីចូលរួមអោយបានសកម្មជាមួយកងយោធពលខេមរភូមិន្ទ ហើយពង្រីកប្រតិបត្តិការថែរក្សាស្ថិរភាព និងសន្តិភាព។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
សេចក្តីប្រកាសព័ត៌មានរបស់ស្ថានទូតអាមេរិកប្រចាំកម្ពុជា នៅថ្ងៃទី១៥ ខែឧសភា ឆ្នាំ២០១៣ បង្ហាញថា លោក Jeff Daigle អនុប្រធានស្ថានទូតសហរដ្ឋអាមេរិកប្រចាំកម្ពុជា នឹងចូលរួមបើកលំហាត់សមយុទ្ធរយៈពេល ២សប្តាហ៍ ចាប់ពីថ្ងៃព្រហស្បតិ៍ ទី១៦ ខែឧសភា។ សមយុទ្ធនោះ នឹងធ្វើឡើង នៅមជ្ឈមណ្ឌលហ្វឹកហ្វឺនកងកំលាំងថែរក្សាសន្តិភាពពហុជាតិ នៅតាមផ្លូវជាតិលេខ៤ ក្នុងភូមិទួល ឃុំមហាសាំង ស្រុកភ្នំស្រួច ខេត្តកំពង់ស្ពឺ។
សេចក្តីប្រកាសដដែល បានបញ្ជាក់ថា ក្នុងលំហាត់សមយុទ្ធ រយៈពេល ១៤ ថ្ងៃនោះ កងកម្លាំងទ័ពសហរដ្ឋអាមេរិក ប្រចាំនៅតំបន់ប៉ាស៊ីហ្វិក និងកងយោធពលខេមរភូមិន្ទ នឹងផ្តោតលើប្រតិបត្តិការផ្តល់ជំនួយមនុស្សធម៌ និងថែរក្សាសន្តិភាព ដែលរួមមានលំហាត់សមយុទ្ធតាមកងវរសេនាតូច លំហាត់សមយុទ្ធលើទីលានប្រឆាំងយុទ្ធភណ្ឌផ្ទុះកែច្នៃ សកម្មភាពពេទ្យក្នុងសមរភូមិ ដើម្បីជួយកងទ័ពកម្ពុជាលើបេសកកម្មថែរក្សាសន្តិភាពរបស់អង្គការសហប្រជាជាតិ។
សេចក្តីប្រកាសលើកឡើងថា នៅក្នុងលំហាត់សមយុទ្ធរួមរវាងកងទ័ពកម្ពុជា និងអាមេរិក លើកនេះ បុគ្គលិកទាហានអាមេរិក និងកម្ពុជា ដែលចូលរួម ក៏នឹងទទួលបានការបង្រៀន លើប្រព័ន្ធទំនាក់ទំនង និងកុំព្យូទ័រ ការបណ្តុះបណ្តាលបុគ្គលិក និងការកសាងក្រុម។ សកម្មភាពទាំងនេះ មានភាពចាំបាច់សំរាប់ដោះស្រាយភារកិច្ចស្មុគស្មាញផ្នែកសន្តិសុខ។ លើសពីនេះទៀត អ្នកចូលរួមនឹងមានការផ្លាស់ប្តូរបទពិសោធន៍គ្នា ស្តីពីការងារតាមអង្គភាពតូចៗ ដែលធ្វើបានល្អ និងការវាយតំលៃកងទ័ពដែលមានបំណងសង្គ្រោះជីវិត ហើយការពារកុំអោយមានការរាំងស្ទះដល់ប្រតិបត្តិការយោធា។
ឆ្មាំអង្គរ គឺជាលំហាត់សមយុទ្ធទ្វេភាគីប្រចាំឆ្នាំ ដែលឧបត្ថម្ភដោយកងកម្លាំងទ័ពសហរដ្ឋអាមេរិក ប្រចាំនៅតំបន់ប៉ាស៊ីហ្វិក ដោយមានកងយោធពលខេមរភូមិន្ទរបស់កម្ពុជា ធ្វើជាម្ចាស់ផ្ទះ។ ឆ្មាំអង្គរឆ្នាំ២០១៣ គឺជាលំហាត់សមយុទ្ធចុងក្រោយ ក្នុងចំណោមលំហាត់សមយុទ្ធដែលមានលក្ខណៈស្វិតស្វាញ និងច្រើនវិញ្ញាសារបន្តបន្ទាប់គ្នា ដែលមានធ្វើជាបន្ត ដើម្បីលើកកំពស់សន្តិភាព និងសន្តិសុខក្នុងតំបន់។ លំហាត់សមយុទ្ធនេះ កត់សំគាល់ខួបលើកទី ៤ នៃលំហាត់សមយុទ្ធប្រចាំតំបន់ ប្រកបដោយផ្លែផ្កា និងមានអត្ថន័យយ៉ាងសំខាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ