បេសកជនពិសេសអាមេរិកត្រលប់ទៅជួបមេដឹកនាំអ៊ីស្រាអែល និងប៉ាលេស្ទីន
លោក George Mitchell បេសកជនពិសេសរបស់អាមេរិក ទទួលបន្ទុកកិច្ចការដើមបូព៌ា បានធ្វើដំណើរទៅកាន់តំបន់ដើមបូព៌ាជាថ្មីនៅថ្ងៃចន្ទនេះ ដើម្បីជួបពិភាក្សាជាមួយនឹងនាយករដ្ឋមន្ត្រីអ៊ីស្រាអែល បែនយាមែន នេតាន់យ៉ាហ៊ូ (Benjamin Netanyahu) នៅល្ងាចនេះ និងជាមួយប្រធានរដ្ឋអំណាចប៉ាលេស្ទីន ម៉ះមូដ អាបាស់ (Mahmoud Abbas) នៅថ្ងៃស្អែក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
កម្មវត្ថុនៃជំនួបរវាងលោក មីតហ្សែល ជាមួយលោក នេតាន់យ៉ាហ៊ូ នៅល្ងាចនេះ គឺដើម្បីបង្ហាញពីសំណើថ្មីៗ សម្រាប់វិលទៅរកការចរចាសន្តិភាពដើមបូព៌ា ដែលលោកស្រីរដ្ឋមន្ត្រីការបរទេសអាមេរិក បានលើកឡើងកាលពីថ្ងៃសុក្រកន្លងទៅថ្មីៗនេះ។
ចំណែកលោកម៉ះមូដ អាបាស់ ដែលកំពុងជួបប្រជុំជាមួយគណៈកម្មាធិការ នៃអង្គការរំដោះប៉ាលេស្ទីន OLP នៅរសៀលថ្ងៃនេះ នឹងទទួលជួបលោក មីតហ្សែល (George Mitchell) នៅស៊ីហ្ស័រដានី នៅថ្ងៃអង្គារស្អែក។ ហើយបន្ទាប់ពីបានជួបពិភាក្សាជាមួយនឹងបេសកជនពិសេសរបស់អាមេរិករូបនេះហើយ លោក អាបាស់ នឹងចេញដំណើរភ្លាមទៅកាន់ប្រទេសអេហ្ស៊ីប ដើម្បីចូលរួមក្នុងកិច្ចប្រជុំជាមួយសម្ព័ន្ធអារ៉ាប់ ស្តីពីដំណើរការស្វែងរកសន្តិភាពឲ្យតំបន់ដើមបូព៌ានេះ។
សូមរំលឹកជូនថា លោក Mitchell ដែលបេសកជនពិសេសរបស់សហរដ្ឋអាមេរិក ក្នុងក្របខ័ណ្ឌ នៃការស្វែងរកសន្តិភាពនៅដើមបូព៌ា បានអញ្ជើញមកកាន់តំបន់នេះ ជាចុងក្រោយកាលពីពីរខែមុន គឺក្នុងថ្ងៃដែលការផ្អាកធ្វើអាណានិគមកិច្ចអ៊ីស្រាអែល បានអស់សុពលភាព ហើយអ៊ីស្រាអែលសម្រេចផ្តើមសាងសង់លំនៅដ្ឋាន ក្នុងក្រុងយេរូសាឡឹមឡើងវិញ។
ការសម្រេចបន្តសាងសង់លំនៅដ្ឋាន នៅស៊ីហ្ស័រដានីឡើងវិញ ដែលប៉ាលេស្ទីនទាមទារនិងប្រឆាំងជាដាច់ខាត ជាបុព្វហេតុចំបងនាំឲ្យការចរចាដោយផ្ទាល់រវាងអ៊ីស្រាអែល និងប៉ាលេស្ទីន -ផ្តួចផ្តើមដោយសហរដ្ឋអាមេរិក ត្រូវទទួលបរាជ័យ។ អាមេរិក ទទួលស្គាល់បរាជ័យនេះ នៅថ្ងៃទី ៧ធ្នូ២០១០ ប៉ុន្តែមិនអស់សង្ឃឹម និងមិនបោះបង់ចោល ការស្វែងរកសន្តិភាពសំរាប់តំបន់ទេ។ នៅថ្ងៃសុក្រទី១០ធ្នូកន្លងទៅថ្មីៗនេះ លោកស្រីរដ្ឋមន្ត្រីការបរទេសអាមេរិក ហ៊ីឡារី គ្លីនតុន បានប្រកាសជ្រើសរើស យកការចរចា ដោយប្រយោលវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ