មូស្គូចោទទីក្រុងវ៉ាស៊ីនតោនថាមានចេតនាផ្លាស់ប្តូររបបគ្រប់គ្រងនៅរុស្ស៊ី
សេចក្តីនេះ ត្រូវបានបន្លឺឡើងម្សិលមិញដោយលោកអនុរដ្ឋមន្ត្រីការបរទេស រុស្ស៊ី Serguei Riabkov ដែលចោទស.រ.អា. ថាចង់ផ្តួលលោកប្រធានាធិបតីរុស្ស៊ី វ៉្លាឌីមៀរ ពូទីន តាមរយៈមធ្យោបាយវៀចវេរដាក់ទណ្ឌកម្មលើរុស្ស៊ីចំពោះតួនាទីរុស្ស៊ីក្នុងវិបត្តិនៅអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ថ្លែងថ្ងៃចន្ទទី៨ធ្នូ ពីលើវេទិកាសភាឌូម៉ា ក្នុងសម័យប្រជុំ ឧទ្ទិសដល់ទំនាក់ទំនង រុស្សី-អាមេរិក លោកអនុរដ្ឋមន្ត្រីការបរទេសរុស្ស៊ី Serguei Riabkovលើកឡើងជាអាទ៏ ៖
គោលដៅជាទម្រង់ការនៃទណ្ឌកម្មដែលថា ដើម្បីបង្ខំក្រុងម៉ូស្គូ ឲ្យកែប្រែទៅគោលជំហរ ចំពោះស្ថានការណ៍នៅអ៊ុយក្រែនតាមពិតគឺបង្កប់ទៅដោយចេតនាបង្កឡើងជាលក្ខណៈសង្គម- សេដ្ឋកិច្ច ដើម្បីផ្លាស់ប្តូរអំណាចនៅរុស្ស៊ីតែម្តងហើយចេតនានេះឯង ថែមទាំងពុំត្រូវពួកគេលាក់បាំងទៅផង។
តាមប្រសាសន៍អ្នកការទូតរុស្ស៊ី ទោះបីរដ្ឋបាលអាមេរិកាំង ខិតខំបដិសេធហេតុការណ៍នេះក្តី ក៏រាល់អ្វីៗដែលមាន សឲ្យឃើញថា ក្នុងចំណោមអាទិភាពនយោបាយបរទេស របស់ វ៉ាស៊ីនតោន គឺមានការប៉ុនប៉ងផ្លុំបញ្ឆេះបរិយាកាស ញ៉ាំងអ្នកស្រុករុស្ស៊ីឲ្យក្តៅក្រហាយ នឹងទណ្ឌកម្មទាល់តែជម្រុញឲ្យព្រឹត្តិការណ៍វិវឌ្ឍទៅយ៉ាងនេះឯង ក្នុងប្រទេសរុស្ស៊ី។
លោកអនុរដ្ឋមន្ត្រីការបរទេស កត់សម្គាល់ថា ប្រទេសរុស្ស៊ីមុខជាត្រូវចំណាយពេលជាច្រើនឆ្នាំទម្រាំដកខ្លួនចេញឲ្យផុតពីផលវិបាកនៃទណ្ឌកម្មអាមេរិកាំង។ គាត់ គូសបញ្ជាក់ថា រុស្ស៊ី នឹងពុំចូលខ្លួនទៅពិភាក្សាអំពីល័ក្ខខ័ណ្ឌសម្រាប់ ស.រ.អា. លុបទណ្ឌកម្មនោះទៅវិញឡើយហើយ ម៉ូស្គូពុំត្រៀមធ្វើសម្បទានចំពោះស.រ.អា.ឡើយជុំវិញបញ្ហាណាដែលមានន័យជា គោលការណ៍ សម្រាប់រុស្ស៊ី។
អំពីទឹកដីគ្រីមេ ដែលបណ្តាលឲ្យមានទណ្ឌកម្ម លោកអនុរដ្ឋមន្ត្រី ក្រើនរំលឹក ពួកអ្នក តំណាងរាស្ត្ររុស្ស៊ីថាស.រ.អា.ក្នុងរាប់សឹបឆ្នាំទៅមុខទៀត នៅតែមិនទទួលស្គាល់ទឹកដីនេះ ជាភាគមួយរបស់សហព័ន្ធរុស្ស៊ីឡើយ។
ជាការកត់សម្គាល់ បទអន្តរាគមន៍ លោកអនុរដ្ឋមន្ត្រីការបរទេសរុស្ស៊ី Serguei Riabkov ក្នុង សភាឌូម៉ាឧទ្ទិសដល់ទំនាក់ទំនងរុស្ស៊ី-អាមេរិក បន្លឺឡើងនៅចំថ្ងៃដែល អង្គការសង្គមសាស្ត្រឯករាជ្យនៅរុស្ស៊ី Levada-Center បានចេញផ្សាយលទ្ធផលនៃការស្ទង់មតិ គឺថា ៖ ប្រជាពលរដ្ឋរុស្ស៊ី ដល់ទៅ ៧៤% ឯណោះ មានមតិអវិជ្ជមាន ចំពោះស.រ.អា.រីឯ មតិជា វិជ្ជមានវិញ គឺមានតែ ១៦% លុះទាល់តែ អង្គការសង្គមសាស្ត្រនេះ កត់សម្គាល់ថា តាំងពីឆ្នាំ ១៩៩០មក គឺមួយឆ្នាំមុន សហភាពសូវៀតរលំរលាយទៅ អ្នកស្រុករុស្ស៊ី មិនដែលយល់ឃើញអវិជ្ជមានយ៉ាងនេះឡើយ អំពីស.រ.អា.៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ