គ.ជ.ប.ចាប់ឆ្នោតកំណត់លំដាប់លេខរៀងឈ្មោះគណបក្ស នៅលើសន្លឹកបោះឆ្នោត
នៅព្រឹកថ្ងៃព្រហស្បតិ៍នេះ គណៈកម្មាធិការជាតិរៀបចំការបោះឆ្នោត គ.ជ.ប. បានរៀបចំពិធីចាប់ឆ្នោតកំណត់លំដាប់លេខរៀងឈ្មោះគណបក្សនយោបាយ នៅលើសន្លឹកឆ្នោត សម្រាប់ការបោះឆ្នោតជាតិ នាថ្ងៃទី២៨កក្កដា។ ពិធីចាប់ឆ្នោតនោះ ធ្វើឡើងដោយសម្តេចព្រះសង្ឃរាជទាំងពីរគណៈ គឺសម្តេចសង្ឃ ទេព វង្ស និងសម្តេចសង្ឃ បួរ គ្រី។ ជាលទ្ធផល លេខរៀងទី១ គឺគណបក្សសញ្ជាតិកម្ពុជា ២-គណបក្សហ្វ៊ុនស៊ិនប៉ិច ៣-គណបក្សសាធារណរដ្ឋប្រជាធិបតេយ្យ ៤-គណបក្សប្រជាជនកម្ពុជា ៥-គណបក្សខ្មែរអភិវឌ្ឍន៍សេដ្ឋកិច្ច ៦-គណបក្សខ្មែរឈប់ក្រ ៧-គណបក្សសង្គ្រោះជាតិ និងលេខរៀងទី៨ នៅលើសន្លឹឆ្នោត គឺគណបក្សសម្ព័ន្ធដើម្បីប្រជាធិបតេយ្យ។
ចុះផ្សាយនៅថ្ងៃ៖
ស្តាប់ - ០២:៥០
ការចាប់ឆ្នោតកំណត់លំដាប់លេខរៀងគណបក្សនយោបាយទាំង ៨ នៅលើសន្លឹកឆ្នោត សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៥ បានធ្វើឡើងនៅគ.ជ.ប. នាព្រឹកមិញ។ សម្តេចព្រះសង្ឃរាជទាំងពីរគណៈ បានចូលរួមចាប់ឆ្នោតដោយផ្ទាល់ ក្រោមវត្តមានរបស់សមាជិក គ.ជ.ប. ទាំង ៩ រូប តំណាងគណបក្ស អ្នកសង្កេតការណ៍ និងក្រុមអ្នកកាសែត។
ជាលទ្ធផល គណបក្សសញ្ជាតិកម្ពុជា ស្ថិតនៅលេខរៀងទី១ លើសន្លឹកឆ្នោត ២គណបក្សហ្វ៊ុនស៊ិនប៉ិច ៣ គណបក្សសាធារណរដ្ឋប្រជាធិបតេយ្យ ៤គណបក្សប្រជាជនកម្ពុជា ៥គណបក្សខ្មែរអភិវឌ្ឍន៍សេដ្ឋកិច្ច ៦គណបក្សខ្មែរឈប់ក្រ ៧គណបក្សសង្គ្រោះជាតិ និងលេខរៀងទី៨ គឺគណបក្សសម្ព័ន្ធដើម្បីប្រជាធិបតេយ្យ។ លទ្ធផលនេះ មិនមានការតវ៉ាអ្វីទេ។
លោក អ៊ឹម សួស្តី ប្រធាន គ.ជ.ប. បានថ្លែងថា ការចាប់ឆ្នោតកំណត់លេខរៀងគណបក្សនយោបាយ លើសន្លឹកឆ្នោត មានសារសំខាន់ណាស់ សម្រាប់គណបក្សនយោបាយទាំង៨ ដែលបានឈរឈ្មោះបោះឆ្នោត។ ការកំណត់លំដាប់លេខរៀងគណបក្សលើសន្លឹកឆ្នោត នឹងជួយបង្កលក្ខណៈងាយស្រួលដល់គណបក្សនយោបាយ ក្នុងការឃោសនាបោះឆ្នោត ព្រមទាំងជួយឲ្យអ្នកបោះឆ្នោត អាចស្គាល់បានដោយងាយស្រួលនូវគណបក្សនយោបាយ ដែលពួកគាត់ស្រឡាញ់ និងពេញចិត្ត ដើម្បីបោះឆ្នោតឲ្យ។
តំណាងគណបក្សប្រជាជនកម្ពុជា លោក សោម សឿន បានប្រាប់អ្នកកាសែតថា លេខរៀងទី៤ នៅលើសន្លឹកឆ្នោត គឺគណបក្សប្រជាជនកម្ពុជា បានទទួលតាំងពីអាណត្តិទី៤ ហើយបានសម្រេចជោគជ័យ នៅក្នុងការបោះឆ្នោត។ ដូច្នេះលោកអះអាងថា លេខ៤ គឺជាលេខ ដែលគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន ទទួលបានជោគជ័យបន្តទៀត។
គណបក្សហ៊្វុនស៊ិនប៉ិច ឈរនៅលំដាប់លេខរៀងទី២ លើសន្លឹកឆ្នោត សម្រាប់ការបោះឆ្នោតនៅខែកក្កដា ត្រូវបានលោក សៅ រ៉ានី អគ្គលេខាធិការរង បានបញ្ជាក់ថា លេខ ២ ជាលេខល្អ ឆ្លុះបញ្ចាំងពីអ្វី ដែលព្រះករុណា សម្តេចឪ សម្តេចតា បានទាមទារប្រាសាទព្រះវិហារ ពីថៃមកវិញ នៅឆ្នាំ១៩៦២ ដែលមានលេខ២ នៅកន្ទុយ។ ម្យ៉ាងទៀត លេខ២ ក៏តំណាងឲ្យការបន្តសម្ព័ន្ធភាពបក្សពីរ រវាងហ្វ៊ុនស៊ិនប៉ិច និងគណបក្សប្រជាជនកម្ពុជា នៅក្នុងរដ្ឋាភិបាលចម្រុះ។
អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ ក៏បានចាត់ទុកលំដាប់លេខរៀងរបស់គណបក្សប្រឆាំង នៅលេខរៀងទី៧ គឺជាលេខល្អមែនទែន។
តាមលោក យ៉ែម បុញ្ញឫទ្ធិ គណបក្ស សង្គ្រោះជាតិ បានធ្វើសមាជ រួមបញ្ចូលគ្នារវាងគណបក្សសមរង្ស៊ី និងសិទ្ធិមនុស្ស នៅថ្ងៃទី៧ ខែមេសា ឆ្នាំ២០១៣។ លេខ៧ ក៏ត្រូវគ្នានឹងគោលនយោបាយ ៧ ចំណុច របស់គណបក្សប្រឆាំង សម្រាប់ឃោសនាបោះឆ្នោតផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ