ផ្លូវដែក កម្ពុជា ផ្តើមដំណើរការឡើងវិញហើយ
នៅថ្ងៃសុក្រនេះ កំណាត់ផ្លូវដែកលើកដំបូងនៅកម្ពុជា ពីស្ថានីយភ្នំពេញ ទៅកាន់ទូកមាស ក្នុងខេត្តកំពត ប្រវែង ១១០ គីឡូម៉ែត្រ បានបើកសម្ពោធដាក់ឱ្យប្រើប្រាស់ហើយ។ ដំណើរការរថភ្លើង នៅកម្ពុជាជាថ្មីឡើងវិញនាពេលនេះ គឺដើម្បីបម្រើឲ្យការដឹកជញ្ជូនទំនិញ មិនត្រឹមតែនៅក្នុងប្រទេសប៉ុណ្ណោះទេ ក៏ប៉ុន្តែផ្លូវដែកកម្ពុជា ក៏ដើម្បីតភ្ជាប់បណ្តាញផ្លូវដែកអាស៊ានចិនផងដែរ។
ចុះផ្សាយនៅថ្ងៃ៖
សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ
កំណាត់ផ្លូវដែក ភ្នំពេញ-ទូកមាស ក្នុងខេត្តកំពត ដែលបានបើកសម្ពោធឲ្យរថភ្លើងឆ្លងកាត់ នៅថ្ងៃសុក្រនេះ ស្ថិតនៅក្នុងគម្រោងជួសជុលស្តារផ្លូវដែក ពីភ្នំពេញ ទៅខេត្តព្រះសីហនុ ដែលមានប្រវែងសរុប ២៦៦ គីឡូម៉ែត្រ។ គម្រោងនេះ នឹងបញ្ចប់ នៅក្នុងខែឧសភា ឆ្នាំ២០១១។
ការបើកឲ្យដំណើរការផ្លូវរថភ្លើង ពីភ្នំពេញ-ទូកមាស កំពត នាពេលនេះ គឺសម្រាប់តែដឹកទំនិញប៉ុណ្ណោះ ពិសេសការដឹកស៊ីម៉ង់ និងកុងទីណឺប្រេងសាំង ជាដើម។ ចំណែកការដឹកជញ្ជូនអ្នកដំណើរ តាមរថភ្លើង នឹងត្រូវដំណើរការនាពេលបន្ទាប់។
រដ្ឋាភិបាលកម្ពុជា បានចុះកិច្ចព្រមព្រៀងសម្បទានជាមួយក្រុមហ៊ុន Toll Holding របស់ប្រទេសអូស្ត្រាលី សម្រាប់ការធ្វើអាជីវកម្មលើផ្លូវដែក។ មានន័យថា ក្រុមហ៊ុនអូស្ត្រាលីនេះ មានភារកិច្ចធ្វើអាជីវកម្មលើផ្លូវដែក និងជួសជុលថែទាំ ក្នុងរយៈពេល ៣០ ឆ្នាំ។
ក្រៅពីកំណាត់ផ្លូវដែកភ្នំពេញ-កំពត ផ្លូវដែកកម្ពុជា ក៏ត្រូវជួសជុលស្តារឡើងវិញ ពីភ្នំពេញ-សិរីសោភ័ណ្ឌ ក្នុងខេត្តបន្ទាយមានជ័យ ភ្ជាប់ទៅប្រទេសថៃ ដែលគ្រោងនឹងបញ្ចប់ក្នុងឆ្នាំ២០១២ ព្រមទាំងការសាងសង់ស្ថានីយរថភ្លើងសំរោង ដែលជាស្ថានីយផ្ទេរ-ផ្ទុកទំនិញ និងការសាងសង់ឃ្លាំងផ្ទុកធំៗ សម្រាប់បម្រើឲ្យវិស័យដឹកជញ្ជូនតាមផ្លូវដែក។ ស្ថានីយរថភ្លើងសំរោង ស្ថិតនៅប្រមាណ ៩ គីឡូម៉ែត្រ ពីស្ថានីយរថភ្លើងភ្នំពេញ គ្រោងនឹងបញ្ចប់ក្នុងឆ្នាំ២០១៣។
ការស្តារផ្លូវដែកនៅកម្ពុជាឡើងវិញ ត្រូវប្រើប្រាស់នូវទឹកប្រាក់សរុបចំនួន ១៤១,៦ លានដុល្លារអាមេរិក ក្នុងនោះ រួមមាន ៖ ហិរញ្ញប្បទានពីធនាគារអភិវឌ្ឍន៍អាស៊ីចំនួន ៨៤ លានដុល្លារ ហិរញ្ញប្បទានឥតសំណងរបស់រដ្ឋាភិបាលអូស្ត្រាលីចំនួន ២១,៥ លានដុល្លារ ឥណទានពីអង្គការ OPEC ចំនួន ១៣ លានដុល្លារ និងអំណោយពីរដ្ឋាភិបាលម៉ាឡេស៊ី នូវដែករ៉ៃ គិតជាទឹកប្រាក់ចំនួន ២,៨ លានដុល្លារអាមេរិក ព្រមទាំងថវិកាបដិភាគរបស់រាជរដ្ឋាភិបាលកម្ពុជាចំនួន ២០,៣ លានដុល្លារអាមេរិក។
ការស្តារផ្លូវដែកនៅកម្ពុជាឡើងវិញ នៅពេលនេះ ដើម្បីភ្ជាប់ជាមួយផ្លូវដែកប្រទេសថៃ និងបន្តទៅកាន់ប្រទេសវៀតណាម នៅគម្រោងផ្លូវដែកអាស៊ាន។ នោះគឺគម្រោងផ្លូវដែកសិង្ហបូរី-គុនមិញ ( SKRL ) ដែលត្រូវឆ្លងកាត់ពីប្រទេសសិង្ហបូរី ម៉ាឡេស៊ី ថៃ កម្ពុជា វៀតណាម និងគុនមិញ ប្រទេសចិន។
ផ្លូវដែក ដែលមានស្រាប់ ក្នុងប្រទេសកម្ពុជាមាន ២ ខ្សែ។ ខ្សែទី១-ភ្នំពេញ ទៅប៉ោយប៉ែត ជាប់ព្រំដែនប្រទេសថៃ ប្រវែង ៣៨៦ គីឡូម៉ែត្រ ត្រូវបានសាងសង់ឡើងពីឆ្នាំ១៩២៩ ដល់ឆ្នាំ១៩៤២ និងខ្សែទី២- ពីភ្នំពេញ ទៅកំពង់ផែសមុទ្រក្រុងព្រះសីហនុ ដោយឆ្លងកាត់ខេត្តកំពត មានចម្ងាយចំនួន ២៦៦ គីឡូម៉ែត្រ ត្រូវបានសាងសង់ពីឆ្នាំ១៩៦០ ដល់ឆ្នាំ១៩៦៩។
ក្រោយឆ្នាំ១៩៧០ ផ្លូវដែកទាំងពីរខ្សែនេះ មានសភាពចាស់ទ្រុឌទ្រោម និងត្រូវបានបំផ្លាញដោយសង្គ្រាមរ៉ាំរ៉ៃ ពិសេសក្រុមខ្មែរក្រហម បានពួនស្ទាក់បាញ់កម្ទេចជាញឹកញាប់ កាលពីមុនឆ្នាំ១៩៩៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ