កិច្ចចរចាគិតគូរបង្កើតរដ្ឋាភិបាលទុយនីស៊ីថ្មី
សមាជិកសំខាន់នានានៃរដ្ឋាភិបាលទុយនីស៊ី នឹងជួបប្រជុំគ្នានៅថ្ងៃចន្ទនេះ ដើម្បីគិតគូរសំរេចបង្កើតសមាសភាពរដ្ឋាភិបាលថ្មី។ ប៉ុន្តែកិច្ចចរចានេះ ប្រហែលជាមិនអាចនឹងរកបាននូវការចុះសម្រុងណាស់។ ថ្វីដ្បិតតែ នាយករដ្ឋមន្ត្រី Hamadi Jebali ដែលជាមេដឹកនាំសំខាន់ទីពីរនៃគណបក្សកាន់អំណាចអ៊ីស្លាមនិយម Ennahda មានសុទិដ្ឋិនិយម ប៉ុន្តែមេដឹកនាំទីមួយ និងសមាជិកជាច្រើនទៀតនៃគណបក្សកាន់អំណាច នៅតែបដិសេធមិនព្រមអោយក្រសួងសំខាន់នានា ដូចជាក្រសួងការបរទេស ក្រសួងមហាផ្ទៃ រឺក៏ក្រសួងយុត្តិធម៌ជាដើមនោះ ឃ្លាតចេញពីការគ្រប់គ្រងដោយផ្ទាល់របស់គណបក្សខ្លួននោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
នៅប្រទេសទុយនីស៊ី នៅថ្ងៃចន្ទនេះ កិច្ចចរចាដើម្បីគិតគូរបង្កើតសមាសភាពរដ្ឋាភិបាលថ្មី ប្រហែលជាពិបាកនឹងរកការចុះសម្រុងណាស់។ ស្ថានភាពនយោបាយនៅប្រទេសទុយនីស៊ី នៅតែស្ថិតក្នុងភាពតានតឹងដដែល។
ទោះបីជានាយករដ្ឋមន្ត្រីទុយនីស៊ីមានសុទិដ្ឋិនិយមនឹងសំរេចបង្កើតបានរដ្ឋាភិបាលទុយនីស៊ីថ្មីមួយ ដែលមានសមាសភាពអ្នកអធិបកាតេយ្យចូលរួមក្តី ប៉ុន្តែមេដឹកនាំធំ និងសមាជិកមួយភាគធំនៃគណបក្សកាន់អំណាច នៅតែបដិសេធផ្តល់នូវការកាន់កាប់ក្រសួងសំខាន់នានា ទៅអោយគណបក្សដទៃទៀត។ គួររំលឹកថា នាយករដ្ឋមន្ត្រី Hamadi Jebali ជាមេដឹកនាំសំខាន់ទីពីរនៃគណបក្សអ៊ីស្លាមនិយម Ennahda បានគំរាមចុះពីតំណែងរបស់លោក ដើម្បីជាថ្នូរទៅនឹងការបង្កើតរដ្ឋាភិបាលទុយនីស៊ីថ្មី ប៉ុន្តែទង្វើរបស់លោកមិនបានធើ្វអោយសមាជិកនានានៃគណបក្សនេះមានការពេញចិត្តនោះទេ។
កាលពីថ្ងៃសៅរ៍កន្លងមក លោក Rached Ghannouchi ដែលជាមេដឹកនាំសំខាន់ទីមួយនៃគណបក្សកាន់អំណាច បានប្រកាសក្តែងៗ នៅចំពោះមុខអ្នកគាំទ្រគណបក្សខ្លួនថា គណបក្ស Ennahda មិនទាន់ត្រៀមខ្លួនដើម្បីប្រគល់អំណាចនៅឡើយទេ ដរាបណាប្រជាជនទុយនីស៊ីនៅតែផ្តល់ទំនុកចិត្តដល់ខ្លួន។
គណបក្ស Ennahda គឺជាគណបក្សគ្រឹះមួយ នៅទុយនីស៊ី។ គណបក្សនេះមានអសនៈ ៨៩ ក្នុងចំណោមអសនៈសរុប ២១៧ ក្នុងសភា។ គណបក្សនេះ នៅតែបដិសេធមិនព្រមអោយ ក្រសួងការបរទេស ក្រសួងមហាផ្ទៃ រឺក៏ក្រសួងយុត្តិធម៌ ធ្លាក់ទៅក្នុងការកាន់កាប់របស់អ្នកដែលមិនកាន់សាសនាអ៊ីស្លាម។ គណបក្ស Ennahda មិនចង់ឃើញវត្តមានរបស់អ្នកដែលមានមុខងារត្រឹមតែជាអ្នកគាំទ្រគណបក្សនយោបាយក្នុងសមាសភាពរដ្ឋាភិបាលនោះទេ។ សំរាប់គណបក្សនេះ សមាសភាពរដ្ឋាភិបាលគឺមានតែវត្តមានរបស់អ្នកនយោបាយតែប៉ុណ្ណោះ។
ទន្ទឹមនេះដែរ មានពាក្យចចាមអារាមលេចលឺមកថា គណបក្សសមាជដើម្បីសធារណរដ្ឋ និន្នាការកណ្តាលឆ្វេងនិយម ដែលជាដៃគូសំខាន់របស់គណបក្សកាន់អំណាច ប្រហែលជាអាចរុញច្រានពួកអ៊ីស្លាមនិយម អោយកំណត់អោយច្បាស់ឡើងវិញនូវអ្វីដែលហៅថារដ្ឋាភិបាលចំរុះ មុននឹងពិភាក្សាគ្នាលើបេក្ខភាពសំរាប់តំណែងសំខាន់ នៅក្នុងក្រសួងនានា។
តាំងពីមានការបាញ់សំលាប់មេដឹកនាំគណបក្សប្រឆាំងមួយរូប នៅដើមខែកុម្ភៈមក ស្ថានភាពនយោបាយក្នុងប្រទេស កាន់តែមានសភាពដុនដាប។ លើសពីនេះ ទុយនីស៊ីកំពុងប្រឈមមុខនឹងបញ្ហាយឺតយ៉ាវនៃការបង្កើតច្បាប់ ការធ្លាក់ចុះនៃវិស័យសេដ្ឋកិច្ច ព្រមទាំងការកើនឡើងនៃចំនួនរបស់ជនអ៊ីស្លាមជ្រុលនិយមនៃចលនាជីហាដ ដែលជាការគំរាមកំហែងដល់សន្តិសុខក្នុងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ