ទីក្រុងម៉ូស្គូរញ្ជួយជាថ្មី ដោយបញ្ហាពូជសាសន៍និយម
តាមដែលទីភ្នាក់ងារពត៌មានរុស្ស៊ី Interfax ផ្សាយថ្ងៃនេះ ដែលដកស្រង់សំដីរបស់ ប៉ូលិសរុស្ស៊ី ក្នុងពីរថ្ងៃចុងក្រោយ នៅម៉ូស្គូ មានជនបរទេស ២នាក់ បានធ្លាក់ខ្លួនរងគ្រោះ៖ ម្នាក់ជាជាតិ Cameroun ត្រូវរបួសធ្ងន់ ម្នាក់ទៀតជាជាតិ Ouzbekistan អភ័ព្វដល់ស្លាប់។ ឧប្បត្តិហេតុនេះធ្វើឲ្យគេនឹកចងចាំ ទៅដល់ពាក្យស្លោក របស់ពួកជាតិនិយមរុស្ស៊ី ដែលថា “ទឹកដីរុស្ស៊ី គឺទុកសម្រាប់ជាតិរុស្ស៊ី“។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
តាមប៉ូលិសរុស្ស៊ី បុរសស្បែកខ្មៅជាតិ Cameroun អាយុ៣១ឆ្នាំ ដែលធ្វើការជាអ្នកចាត់ចែងតន្ត្រី និងបទចម្រៀង ក្នុងរង្គសាលមួយនៃរដ្ឋធានីរុស្ស៊ី កាលពីថ្ងៃអាទិត្យ បានត្រូវ គេដឹកជាបន្ទាន់ ទៅមន្ទីរពេទ្យ។ បុរសនេះរបួសធ្ងន់ នៅក្បាល ដោយត្រូវគ្រាប់កាំភ្លើង របស់ អតិថិជនម្នាក់នៃរង្គសាល ដែលក្រោយពីបាញ់មក ក៏ដាក់មេផាយ រត់ទៅបាត់។
ចំណែកបរទេសម្នាក់ទៀត ដែលមានដើមកំណើត ជាជាតិ Ouzbekistan គឺ ប្រទេសមួយ នៃតំបន់អាស៊ីកណ្តាល ធ្លាប់ចំណុះសហភាពសូវៀត កាលពីល្ងាចថ្ងៃ ចន្ទម្សិលមិញ ស្រាប់តែ ត្រូវគេប្រទះភ្នែកឃើញ ស្លាប់ស្តូកទៅហើយ។ សពជននេះមានស្បែកពណ៌ស្រអែម ដែលអាយុ ៣៣ឆ្នាំ ហើយ ដែល ត្រូវ គេលួចចាក់នឹងកាំបិត នៅចំ ក ដល់ទៅ ២ផ្លែកាំបិត ត្រូវគេប្រទះភ្នែក ឃើញនៅជិត យានដ្ឋាន(garage)ឡាន ដែលគេ ទុកចោល ក្នុងសង្កាត់ប៉ែកខាងកើត នៃរដ្ឋធានីរុស្ស៊ី។
“លទ្ធិពូជសាសន៍និយម និងស្អប់ជាតិដទៃ” កំពុងវាតទីនៅលើដែនដីប្រទេសរុស្ស៊ី ក្រោយពី សហភាពសូវៀតរលាយទៅ ក្នុងឆ្នាំ ១៩៩១។ ប្រជាជនរុស្ស៊ី ធុញទ្រាន់ ដោយឃើញ អ្នកស្រុកទាំងពាន់ៗនាក់ មកពីអតីតសាធារណរដ្ឋសូវៀតនានា នៃតំបន់ភ្នំកូកាស និង អាស៊ីកណ្តាល ដែលធ្លាក់ក្នុងស្ថានភាពជីវិតដ៏ត្រដាបត្រដួស នាំគ្នាត្បុលមករស់នៅ និង ធ្វើការ នៅតាមក្រុងធំៗនៃប្រទេសរុស្ស៊ី ដើម្បីដោះស្រាយបញ្ហាជីវភាពខ្លួន។
ដោយហេតុថា តាមយោបល់ ប្រជាពលរដ្ឋរុស្ស៊ី ជនចំណាកស្រុកទាំងនោះ ជាប្រភពនៃ ឧក្រិដ្ឋកម្មប្លែកៗ ប្រព្រឹត្ត នៅរុស្ស៊ី បានជារលកប្រឆាំងនឹងជនបរទេស ញ៉ាំងឲ្យមានលេច ចេញមក ជាអង្គការជាតិនិយម យ៉ាងច្រើនទៅហើយ។ តាមតួលេខក្រសួងមហាផ្ទៃ សព្វថ្ងៃ នៅរុស្ស៊ី អង្គការបែបនេះ មានចំនួនពី ១៥០ ដល់២០០ ដែលដំណើរការ ក្រោមពាក្យស្លោក ជ្រុលនិយម បែបយ៉ាង “ទឹកដីរុស្ស៊ី គឺទុកសម្រាប់ជាតិរុស្ស៊ី“។ បើក្នុងឆ្នាំ ១៩៩៨ ពាក្យស្លោក នេះ មានអ្នកគាំទ្រ តែចំនួន៤៣% នោះក្នុងឆ្នាំ២០១០កន្លងទៅ វាកើនដល់៥៨%ទៅហើយ។
តាមតួលេខផ្តល់ដោយអង្គការរុស្ស៊ី ឈ្មោះSOVA ខាងកត់ត្រាចំនួនជនបរទេស ដែលធ្លាក់ខ្លួនរងគ្រោះដោយអំពើរើសអើងពូជសាសន៍ ក្នុងឆ្នាំ២០១០កន្លងទៅ មានជនបរទេស ធ្លាក់ខ្លួនស្លាប់ អស់ ៣៧នាក់ និងរបួស៣៨៦នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ