ទស្សនកិច្ចរដ្ឋមន្ត្រីការបរទេសរុស្ស៊ីនៅប្រទេសចិន
តាមសេចក្តីអញ្ជើញនៃរដ្ឋមន្ត្រីការបរទេសចិន លោក Yang Jiechi ប្រមុខការទូតរុស្ស៊ី លោក Serguei Lavrov នៅថ្ងៃ១០និង១១ឧសភា បានបំពេញទស្សនកិច្ចនៅក្រុងប៉េកាំង។ លោក Lavrov បានធ្វើកិច្ចចរចាជាមួយសមភាគីចិនដើម្បីរៀបចំទស្សនកិច្ចថ្ងៃមុខរបស់លោកប្រធានាធិបតីរុស្ស៊ី ពូទីន នៅប្រទេសចិនព្រមទាំងបានចូលរួមក្នុងជំនួបជាន់ថ្នាក់រដ្ឋមន្ត្រីការបរទេសនៃ”អង្គការសហប្រតិបត្តិការក្រុងសៀងហៃ”។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
អំពីទស្សនកិច្ចនេះ កាសែតដ៏ធំបំផុតនៃប្រទេសចិន គឺកាសែត Zhenminh Zhibao កត់សម្គាល់ថា ក្រោយពីបានឡើងកាន់តំណែងជា ប្រធានាធិបតីវិញភ្លាម លោកពូទីនបញ្ជូន រដ្ឋមន្ត្រីការបរទេសខ្លួន ឲ្យមកកាន់ក្រុងប៉េកាំង ដើម្បីរៀបចំទស្សនកិច្ចរបស់គាត់ផ្ទាល់នៅ ប្រទេសចិនក្នុងខែមិថុនាខាងមុខទៅហើយ ហេតុដែលឲ្យឃើញពីភាពកក់ក្តៅកម្រិតខ្ពស់នៃទំនាក់ទំនងចិន-រុស្ស៊ី។
នាកិច្ចចរចាដែលបានប្រព្រឹត្តទៅ ទាំងលោករដ្ឋមន្ត្រីការបរទេសចិន Yang Jiechi ទាំងសមភាគីរុស្ស៊ី លោក Serguei Lavrov សុទ្ធតែបានឲ្យតម្លៃខ្ពស់ដូចគ្នាដល់ការអភិវឌ្ឍន៍ជាវិជ្ជមាននៃទំនាក់ទំនងលើគ្រប់វិស័យរវាងមហាប្រទេសទាំង២ជិតខាងគ្នា ក្នុងស្មារតីនៃសហប្រតិបត្តិការនិងភាពជាដៃគូយុទ្ធសាស្ត្រដែលរួមវិភាគទានកាន់តែសំខាន់ឡើងទៅក្នុងការជួយថែរក្សាសន្តិភាព សន្តិសុខ ស្ថិរភាព នៅតំបន់និងក្នុងលោកទាំងមូល។
ក្នុងផ្ទៃនៃស្ថានការណ៍អន្តរជាតិដ៏ស្មុគស្មាញចិននិងរុស្ស៊ីយល់ថា ត្រូវតែបន្តប្រកាន់ខ្ជាប់ឥតល្អៀងឡើយ នូវលក្ខន្តិកៈរបស់អ.ស.ប. និងបទដ្ឋានធំៗជាគោលនៃច្បាប់អន្តរជាតិហើយជម្រុញដល់ការកសាងពិភពលោកពហុប៉ូល។
អំពីកម្មវិធីនុយក្លេអ៊ែររបស់ប្រទេសអ៊ីរ៉ង់ ចិននិងរុស្ស៊ី បានបញ្ជាក់ជាថ្មីថា បញ្ហានេះអាចដោះស្រាយទៅកើតគឺ តែតាមផ្លូវនយោបាយការទូតប៉ុណ្ណោះ។
អំពីស្ថានការណ៍នៅស៊ីរី ភាគីចិននិងរុស្ស៊ីដែលសុទ្ធតែគាំទ្រដល់ការខំប្រឹងប្រែងជាអន្តរការីរបស់លោក កូហ្វ៊ីអាណាន់ ឯកភាពគ្នាថា បញ្ហានេះត្រូវដោះស្រាយតែដោយសន្តិវិធីតាមរយៈការគោរពដោយ គ្រប់ប្រទេសចំពោះឯករាជ្យ អធិបតេយ្យ បូរណភាពដែនដី របស់ស៊ីរី។
ចំណែកប្រមុខការទូតរុស្ស៊ី ថែមទាំងលម្អិតថា ទីក្រុងម៉ូស្គូ នឹងពុំចុះញ៉មទៅតាមការគាបសង្កត់ពីក្រៅឡើយ ហើយពុំផ្លាស់ប្តូរគោលជំហរខ្លួនឡើយចំពោះបញ្ហាស៊ីរី។
អំពីជំនួបក្នុងជាន់ថ្នាក់រដ្ឋមន្ត្រីការបរទេស នៃ”អង្គការសហប្រតិបត្តិការក្រុងសៀងហៃ” ដែលប្រព្រឹត្តទៅថ្ងៃ១១ឧសភានេះ នៅក្រុងប៉េកាំងនោះ តាមប្រសាសន៍លោកប្រមុខការទូតរុស្ស៊ី ការដែលប្រទេសអាហ្វហ្កានីស្ថានទទួលឋានៈជាអ្នកសង្កេតការណ៍នៅអមអង្គការនេះ គឺសឲ្យឃើញពីភាពត្រៀមខ្លួនរបស់អង្គការ ជួយជ្រោមជ្រែងក្នុងស្មារតីស្ថាបនាដល់ការខំប្រឹងប្រែង របស់សហគមន៍អន្តរជាតិ ខាងស្តារឲ្យរស់ឡើងវិញវិស័យនយោបាយនិងសេដ្ឋកិច្ចរបស់ប្រទេសនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ