ព្រះមហាក្សត្រកោះមេដឹកនាំគណបក្សទាំងពីរប្រជុំដោះស្រាយបញ្ហានយោបាយ
ទីបំផុតទៅ ព្រះមហាក្សត្រសម្តេចព្រះបរមនាថ នរោត្តម សីហមុនី កាលពីថ្ងៃទី១២ ខែកញ្ញា ព្រះអង្គបានចេញព្រះរាជសារអញ្ជើញប្រជុំ ជូនលោក ហ៊ុន សែន អនុប្រធានគណបក្សប្រជាជនកម្ពុជា និងលោក សម រង្ស៊ី ប្រធានគណបក្សសង្គ្រោះជាតិ រួមទាំងសហការីម្ខាងៗ ចំនួន២រូបទៀត ចូលរួមប្រជុំ ក្រោមអធិបតីភាពរបស់ព្រះអង្គ ដើម្បីដោះស្រាយបញ្ហាប្រទេសជាតិ។ កិច្ចប្រជុំនឹងបើកធ្វើនៅថ្ងៃសៅរ៍ ទី១៤ ខែកញ្ញា វេលាម៉ោង ៩ ព្រឹក នៅក្នុងព្រះបរមរាជវាំង។
ចុះផ្សាយនៅថ្ងៃ៖ កែប្រែថ្ងៃទី៖
បន្ទាប់ពីព្រះរាជសាររបស់ព្រះករុណាព្រះមហាក្សត្រ ត្រូវបានទីស្តីការគណៈរដ្ឋមន្ត្រីផ្សព្វផ្សាយដល់អ្នកកាសែត កាលពីយប់ថ្ងៃទី១២កញ្ញា ភ្លាមៗនោះ ក៏មានលិខិតរបស់លោកនាយករដ្ឋមន្ត្រី ហ៊ុន សែន តបនឹងព្រះមហាក្សត្រ។ ក្នុងលិខិត លោក ហ៊ុន សែន បានទូលថ្វាយព្រះមហាក្សត្រថា លោកនឹងដឹកនាំសហការី ចំនួន ២ រូប គឺលោក សាយ ឈុំ និងលោក ស ខេង ទៅចូលរួមប្រជុំ តាមការអញ្ជើញរបស់ព្រះអង្គ។
ដោយឡែក មកដល់ព្រឹកព្រលឹមថ្ងៃសុក្រនេះ គេនៅមិនទាន់ឃើញលិខិតរបស់លោកសម រង្ស៊ី ឆ្លើយតប នឹងព្រះរាជសារអញ្ជើញប្រជុំរបស់ព្រះមហាក្សត្រ នៅឡើយទេ។ លោក សម រង្ស៊ី និងលោក កឹមសុខា កំពុងស្ថិតនៅខេត្តបាត់ដំបង នៅព្រឹកថ្ងៃសុក្រនេះ ដើម្បីជួបសកម្មជនអ្នកគាំទ្របន្តពីជំនួបកាលពីថ្ងៃម្សិលមិញ នៅខេត្តសៀមរាប និងខេត្តបន្ទាយមានជ័យ។
ជាការកត់សម្គាល់ កិច្ចប្រជុំកំពូលរវាងគណបក្សទាំងពីរ ក្រោមព្រះរាជអធិបតីរបស់ព្រះមហាក្សត្រ នៅព្រឹកថ្ងៃសៅរ៍ទី១៤កញ្ញា ធ្វើឡើងតែមួយថ្ងៃប៉ុណ្ណោះ មុនមហាបាតុកម្មរបស់គណបក្សសង្គ្រោះជាតិ ដឹកនាំដោយលោក សម រង្ស៊ី ដែលគ្រោងធ្វើ ចាប់ពីថ្ងៃទី១៥ កញ្ញា តទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ