រុស្ស៊ីកាត់បន្ថយសព្វាវុធបរមាណូរបស់ខ្លួនបាន លឿនជាងអាមេរិក
ដំណឹងដែលទើបប្រកាស ដោយក្រសួងការបរទេសអាមេរិកាំង គឺបានត្រូវ មធ្យោបាយឃោសនាមហាជនរុស្ស៊ី លើកយកមកផ្សាយព្រោងព្រាត នៅថ្ងៃព្រហស្បតិ៍ ទី ២ មិថុនានេះ។ ដោយបំពេញតាមសន្ធិសញ្ញាទ្វេភាគី ដែលបានចូលជាធរមាន កាលពីដើមឆ្នាំនេះ រុស្ស៊ីកាត់បន្ថយឃ្លាំងអាវុធបរមាណូខ្លួន លុះទាល់តែឥឡូវ មានទំហំ១/៣តិចជាងអាមេរិក។
ចុះផ្សាយនៅថ្ងៃ៖
ស្តាប់ - ០២:០៨
ស្របនឹងទិន្នន័យ ចេញដោយក្រសួងការបរទេសអាមេរិកាំង ខាងក្បាលរំសេវនុយក្លេអ៊ែរ ដែលកំពុងបំពាក់នៅនឹងកាំជ្រួចមីស្ស៊ីលអន្តរទ្វីប ឥឡូវរុស្ស៊ី មានចំនួន ១.៥៣៧ក្បាល។ ចំណែកអាមេរិកវិញ ឥឡូវមានក្បាលបែបនេះ ដល់ទៅ ១.៨០០ក្បាល។ ខាងកាំជ្រួចមីស្ស៊ីលអន្តរទ្វីបផ្ទាល់ ដែលដំឡើង ជាស្រេចឲ្យនៅប្រចាំការ សម្រាប់បាញ់ចេញ តែម្តង ដោយពាំផ្ទុកទៅដោយក្បាលរំសេវនុយក្លេអ៊ែរនោះ រុស្ស៊ី មាន ៥២១ដើម, អាមេរិក មានដល់ ៨៨២ដើម។ ខាងចំនួនសរុបនៃទីតាំង សម្រាប់បាញ់ចេញនូវកាំជ្រួចមីស្ស៊ីលអន្តរទ្វីប គឺថា ទាំងកាំជ្រួចដាក់ឲ្យប្រចាំការ ជាស្រេច ទាំង កាំជ្រួចស្ថិតនៅ ក្នុងភាពបម្រុង រុស្ស៊ី មានចំនួន ៨៦៥ ដើម ចំណែក អាមេរិក មានដល់១.១២៤ ទីតាំង។
ជាការរំលឹក ស្របនឹងសន្ធិសញ្ញាថ្មី ចុះកាលពីថ្ងៃ ៨មេសា ឆ្នាំ២០១០ នៅឯក្រុង ប្រាក(Prague) ដោយ លោកប្រធានាធិបតី អូបាម៉ា និងលោកប្រធានាធិបតី មេដវេដេវ ហើយដែលបានចូល ជាធរមាន នាថ្ងៃ ៥កុម្ភៈ ឆ្នាំ២០១១នេះ សម្រាប់រយៈពេល១០ឆ្នាំទៅមុខ ក្រោយពីវាបានទទួល ការឲ្យសច្ចាប័នដោយរដ្ឋសភាប្រទេសទាំងពីរ ស.រ.អា និង រុស្ស៊ី ត្រូវកាត់បន្ថយ ក្នុង ៧ឆ្នាំទៅមុខ ឲ្យនៅសល់សម្រាប់ម្ខាងៗ គឺ៖
-ខាងក្បាលរំសេវនុយក្លេអ៊ែរ ឲ្យចុះដល់ចំនួនតិចជាង ១.៥៥០ ក្បាល។
-ខាងកាំជ្រួចមីស្ស៊ីលអន្តរទ្វីបផ្ទាល់ សម្រាប់បាញ់ពាំផ្ទុកទៅដោយក្បាលនោះ គឺឲ្យនៅសល់ ក្នុងចំនួន តិចជាង ៨០០ដើម។
ទាក់ទងនឹងការចេញផ្សាយនៃរបាយការណ៍ក្រសួងការបរទេសអាមេរិកនោះ ប្រធាន “សមាគមអាមេរិកាំងខាងត្រួតពិនិត្យលើសព្វាវុធ“ លោក Tom Collin បានថ្លែងជាអាទិ៍ ថា- “ទិន្នន័យដែលមានបោះផ្សាយនេះ សឲ្យឃើញថា សន្ធិសញ្ញានោះកំពុងដំណើរការមែន។ ភាគីរុស្ស៊ី ចេះកំទេចក្បាលរំសេវនុយក្លេអ៊ែររបស់ខ្លួនអស់រាប់រយក្បាលទៅហើយ ក្បាលដែល កាលមុនសុទ្ធតែ តម្រង់ទៅលើដែនដីស.រ.អា.។ នេះជាដំណឹងល្អ សម្រាប់ សន្តិសុខស.រ.អា។ បើរុស្ស៊ី ចេះពន្លឿនយ៉ាងនេះ នូវការកាត់បន្ថយ សព្វាវុធបរមាណូរបស់ខ្លួន នោះភាគីអាមេរិក ក៏គប្បី ពន្លឿនទៅដែរ ដំណើរកាត់បន្ថយ សព្វាវុធធុននេះរបស់ខ្លួន”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ