រុស្ស៊ីក្នុងជំនួបកំពូល“G-8”នឹងតំណាងដោយលោកនាយករដ្ឋមន្ត្រីមេដវេដេវ
ថ្ងៃនេះ លោកនាយករដ្ឋមន្ត្រីរុស្ស៊ី មេដវេដេវចេញដំណើរទៅចូលរួមក្នុងជំនួបកំពូល“G-8” ដែលនឹងប្រព្រឹត្តទៅនៅស.រ.អាថ្ងៃ១៨-១៩ ឧសភា។ លោកមេដវេដេវ ចូលរួមនេះគឺដោយជំនួសមុខឲ្យលោកពូទីនដែលទើបចូលកាន់តំណែងជាប្រធានាធិបតីរុស្ស៊ីឡើងវិញ។ ហេតុអ្វីបានជាលោកពូទីនសម្រេចថា មិនវត្តមានដោយខ្លួនគាត់ផ្ទាល់ក្នុងជំនួបកំពូលនោះ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
មូលហេតុជាផ្លូវការ តាមដែលលោក ពូទីនផ្ទាល់ បានជម្រាបតាមទូរសព្ទ ទៅលោក អូបាម៉ា ប្រធានាធិបតីអាមេរិក ជាប្រទេសម្ចាស់ផ្ទះខាងរៀបចំទទួលជំនួបកំពូល“G-8”នេះគឺមកពីគាត់ជាប់រវល់នឹងការពិនិត្យអនុម័តឲ្យបានរួចស្រេចបាច់ទ្រង់ទ្រាយនិងសមាសភាព គណៈរដ្ឋមន្ត្រីថ្មី នៅរុស្ស៊ី ដែល ស្នើដោយ លោកនាយករដ្ឋមន្ត្រី មេដវេដេវ។
ហើយកាលណោះទោះបី លោកអូបាម៉ា បានសំដែង “ការយោគយល់”ក្តី ចំពោះធុរៈលោកពូទីន ក៏តាមការបកស្រាយនៃមជ្ឈដ្ឋាននយោបាយនៅទីនេះ មូលហេតុមែនពិត តាមមើលទៅ គឺ មកពី លោកពូទីន អន់ចិត្តនឹងគោលជំហរអាមេរិកដែលបន្តសាងសង់ “ប្រព័ន្ធខែលមីស្ស៊ីល ប្រឆាំងមីស្ស៊ីល” នៅទ្វីបអឺរ៉ុប - ប្រព័ន្ធដែលម៉ូស្គូចាត់ទុកជាការគម្រាមដល់ សន្តិសុខជាតិរុស្ស៊ី ហើយក្នុងរឿងនេះទីក្រុងវ៉ាស៊ីនតោន នៅតែមិនព្រមផ្តល់ ការធានាជាលាយល័ក្ខអក្សរ មកឲ្យ ម៉ូស្គូ ថា ប្រព័ន្ធនេះ ឥតតម្រង់ប្រឆាំងនឹងរុស្ស៊ីឡើយ។
មិនតែប៉ុណ្ណោះ តាមដែលវិមានក្រេមឡាំង ប្រកាសឲ្យដឹងម្សិលមិញ ប្រទេសទី១ ដែល លោក ពូទីន នឹងអញ្ជើញទៅបំពេញទស្សនកិច្ចថ្នាក់រដ្ឋតែម្តង គឺបេឡារុសទេតើ ក្នុងឋានៈជា ប្រទេស បងប្អូនពូជស្លាវដែរ ជំនិតបំផុត នឹងរុស្ស៊ី។ ទស្សនកិច្ចនេះ នឹងប្រព្រឹត្តទៅ នៅថ្ងៃទី៣១ឧសភា ខាងមុខ។ តាមមតិអ្នកវិភាគខ្លះ ទស្សនកិច្ចនេះអាចមានន័យជាការផ្គើនឲ្យស.រ.អានិងសហភាពអឺរ៉ុបដែលបន្តដាក់ទណ្ឌកម្មនយោបាយ ទល់នឹងបេឡារុស។ ហើយបន្ទាប់ពី បេឡារុស លោកពូទីន នឹងអញ្ជើញ ទៅកាន់ ប្រទេសចិន ជាដៃគូយុទ្ធសាស្ត្ររបស់រុស្ស៊ី។ តមកទៀត ក្នុងគម្រោងរបស់លោកពូទីន គឹ ប្រហែលជាប្រទេសបារាំង ដ្បិតគាត់បានសន្ទនា តាមទូរស័ព្ទ៣លើកទៅហើយ ជាមួយលោក François Hollande ប្រធានាធិបតីថ្មីនៃប្រទេសនេះ គឺនៅថ្ងៃ៧, ៨ និង ១២ឧសភា។
មកពីអវត្តមាន រូបលោកពូទីនផ្ទាល់ បានជា អ្នកនាំពាក្យរបស់សេតវិមាន ក្រុងវ៉ាស៊ីនតោន លោក Jay Carney ប្រកាសថាក្នុងក្របខ័ណ្ឌជំនួប G-8 លោកប្រធានាធិបតីអូបាម៉ានឹងទទួលជួប លោកនាយករដ្ឋមន្ត្រី មេដវេដេវ គឺ ៖ ទី១ ដោយបង្ខើចរយៈពេលជួប, ទី២- ជំនួបនោះនឹងពុំប្រព្រឹត្តទៅ ក្នុង”ការិយាល័យរាងពងក្រពើ” នៃសេតវិមានដូចដែលមាន គ្រោងធ្វើជាមួយលោកពូទីនឡើយ ហើយទី៣- ក្នុងជំនួបជាមួយលោកមេដវេដេវ គឺមានឆូត ចេញទៅហើយ បញ្ហា ទាក់ទងនឹង”ប្រព័ន្ធខែលមីស្ស៊ីលប្រឆាំងមីស្សីល” និងបញ្ហា សហប្រតិបត្តិការសេដ្ឋកិច្ចទ្វេភាគី។
បញ្ហាដែលឆូតចេញនេះ នឹងត្រូវលោកប្រធានាធិបតីអាមេរិក អូបាម៉ា លើកយកទៅពិភាក្សា គឺពេលគាត់ ជួបផ្ទាល់ជាមួយសមភាគីរុស្ស៊ី លោកពូទីន ក្នុងបរិវេណនៃ ជំនួបកំពូល G-20 នៅ ប្រទេស Mexique ក្នុងថ្ងៃ១៨-១៩ មិថុនា ខែក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ