តើរុស្ស៊ីជាអ្នកសង្កេតការណ៍ចាំទាញយកផលប្រយោជន៍ឬ?
សម្រង់ទស្សនៈសារពត៌មានរុស្ស៊ីថ្ងៃនេះ អំពីគោលជំហររុស្ស៊ី នៅពីមុខការវាយប្រហារនៃកងកម្លាំងអាកាសរបស់សម្ព័ន្ធភាពប្រទេសលោក ខាងលិច ទៅលើប្រទេសលីប៊ី ស្របនឹងសេចក្តីសម្រេចលេខ១៩៧៣នៃក្រុមប្រឹក្សាសន្តិសុខអង្គការ សហប្រជាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា ពីទីក្រុងម៉ូស្គូ
ទស្សនៈសារពត៌មាន បើកដោយឃ្លាដែលថា រុស្ស៊ីដូចចិនអ៊ីចឹង មិនទោមនស្សទេនឹងសកម្មភាពដែលកំពុងធ្វើដោយកងកម្លាំងសម្ព័ន្ធភាពនោះ ទាំងរក្សាទុកនូវគោលជំហរអព្យាក្រឹតដែលអនុគ្រោះ។
កាសែតKommersant លើកមកចុះផ្សាយសំដីគូសន្ទនាខ្លួននៅឯខុទ្ទកាល័យប្រធានាធិបតីរុស្ស៊ីដែលថា ៖
- ម៉ូស្គូពេលគាំទ្រសេចក្តីសម្រេចនោះរបស់អ.ស.ប. គឺបានប្រឆាំងនឹងសេណារីយោ ដែលឥឡូវត្រូវគេអនុត្តនៅលីប៊ី។ មួយចំណែក ម៉ូស្គូបន្តដាក់ទណ្ឌកម្មលើរបបកាដាហ្វីនៅលីប៊ី។ មួយចំណែកទៀត ម៉ូស្គូមិនសាទរទេចំពោះយន្តការប្រើកម្លាំងអាវុធដើម្បីដោះស្រាយទំនាស់ក្នុងប្រទេសនោះ។
-នៅពីមុខរុស្ស៊ី ដូចជានៅពីមុខអាល្លឺម៉ង់ដែរ ដែលទប់ខ្លួនមិនចូលរួមក្នុងយន្តការប្រើកម្លាំងនោះ មានលេចចេញមកជាសំណួរ ៖ តើបន្ទាប់ពីប្រតិបត្តិការយោធានេះ ស្ថានការណ៍បែបណាដែលនឹងកើតមានឡើង? តើភាគីប្រឆាំងនៅលីប៊ី ដែលពួកប្រទេសខាងលិចខំលូកដៃទៅកាន់ជើងនោះ គេជានរណា? ចម្លើយតបនឹងសំណួរទាំងនេះ ទាំងរុស្ស៊ី ទាំងអាល្លឺម៉ង់ មិនបានឮឯណា!
កាសែតមួយទៀតនៃមជ្ឈដ្ឋានBusinessរុស្ស៊ី ឈ្មោះ Vedomosti ចាប់អារម្មណ៍ទៅលើចំណុចមួយនៃសេដ្ឋកិច្ចលីប៊ី គឺថាក្នុងរយៈពេលជាងមួយខែកន្លងទៅ តាំងពីមានផ្ទុះឡើង ជាសង្គ្រាមស៊ីវិលមក រោងចក្រ២ដ៏ធំជាងគេខាងចម្រាញ់ប្រេងកាត ដែលធ្លាប់ធានាបាន ៨៨%នៃតម្រូវការក្នុងប្រទេសលែងដំណើរការទៅហើយ ក៏ដូចជាកំពង់ផែនានាជាមូលដ្ឋានខាងនាំប្រេងកាតចេញទៅក្រៅ។
កាសែត Novy Izvestia លើកយកមតិពួកអ្នកជំនាញការយោធា មកចុះផ្សាយថា ៖ ទ័ពកាដាហ្វី គ្មានលទ្ធភាពបង្កជាការខូចខាតអ្វីណាជាដុំកំភួនឡើយ ដល់កងកម្លាំងសម្ព័ន្ធប្រទេសខាងលិច។ពីព្រោះវិសមភាពរវាងកម្លាំងទាំង២នេះ គឺប្រៀបបានមេឃនិងដី។ កាដាហ្វីមានប្រព័ន្ធការពារដែនអាកាសទន់ខ្សោយ និងយន្តហោះចម្បាំងត្រឹមស្រករទី៣។ ចំណែកស.រ.អានិងប្រទេសសម្ព័ន្ធមិត្ត មានយន្តហោះសុទ្ធតែស្រករទី៤និងទី៥។ បើសាច់រឿងចូលដល់ការប្រយុទ្ធគ្នាលើដី ទ័ពកាដាហ្វីប្រហែលជាអាចតដៃបានយ៉ាងសក្តិសម ប៉ុន្តែសេចក្តីសម្រេចលេខ១៩៧៣ ហុចសិទ្ធិដល់កម្លាំងសម្ព័ន្ធប្រទេសខាងលិច ឲ្យវាយប្រហារតែពីលើអាកាស ប៉ុណ្ណោះដើម្បីការពារបណ្តាជនស្លូតត្រង់។
បណ្ឌិតសាស្ត្រាចារ្យ ខាងប្រវត្តិសាស្ត្រនយោបាយសាស្ត្រ និងច្បាប់បូព៌ាប្រទេស លោកស្រី Elena Melkoumian បានថ្លែងទៅកាសែតឯករាជ្យ Niezavisimaya Gazeta ថា៖ អន្តរាគមន៍យោធាពួកមហាអំណាចខាងលិច នឹងបន្សោយមែនទែន ទីតាំងរបស់ ទ័ពកាដាហ្វី លុះទាល់តែជួយឲ្យកម្លាំងបះបោរនៅលីប៊ីផ្តួលរបបនេះក្នុងពេលខាងមុខពុំខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ