លោក សម រង្ស៊ី រកសំឡេងឆ្នោតពីសហគមន៍ខ្មែរអ៊ីស្លាម
ប្រធានគណបក្សសង្គ្រោះជាតិ លោក សម រង្ស៊ី បានអំពាវនាវឲ្យពលរដ្ឋខ្មែរអ៊ីស្លាមចូលរួមគាំទ្រ និងបោះឆ្នោតជូនគណបក្សសង្គ្រោះជាតិនៅខែកក្កដាឆ្នាំ ២០១៣ខាងមុខ។ ការអំពាវនាវនេះ បានធ្វើឡើងតាមរយៈពិធីសំណេះសំណាលជាមួយសមាជិករបស់ខ្លួនដែលជាជនជាតិខ្មែរអ៊ីស្លាមកាលពីរសៀលថ្ងៃសៅរ៍ម្សិលមិញ។ តាមរយៈ Video Conference លោក សម រង្ស៊ី បានសន្យាថា ក្នុងករណីដែលគណបក្សសង្គ្រោះជាតិឈ្នះឆ្នោតលោកនឹងការពារអត្តសញ្ញាណរបស់ជនជាតិអ៊ីស្លាមនៅកម្ពុជាមិនឲ្យបាត់បង់ទឹកដីដូចប្រទេសចម្ប៉ាកាលពីអតីតកាលឡើយ។
ចុះផ្សាយនៅថ្ងៃ៖
ស្តាប់ - ០២:២៤
ការបាត់បង់ទឹកដីប្រទេសចម្ប៉ាពីអតីតកាល គឺជាអ្វីដែលលោក សម រង្ស៊ី បានលើកឡើងដើម្បីទាក់ទាញចំណាប់អារម្មណ៍របស់ខ្មែរអ៊ីស្លាម។ លោកបន្តថា ទឹកនេះបានបាត់បង់ដោយសារវៀតណាមលេបត្របាក់យក។ មេដឹកនាំបក្សប្រឆាំងបានចោទរដ្ឋាភិបាលសព្វថ្ងៃថា បានបើក ដៃឲ្យជនជាតិវៀតណាមឲ្យចូលមកលេបត្របាក់ទឹកដីខ្មែរបន្តទៀតតាមរយៈការហូរចូលនៃអន្តោប្រវេសន៍វៀតណាមខុសច្បាប់ និងការផ្តល់ដីសម្បទានសេដ្ឋកិច្ចឲ្យទៅក្រុមហ៊ុន វៀតណាមជាដើម។
ថ្លែងពីប្រទេសបារាំងតាមរយៈ Video Conference លោកសម រង្ស៊ីបានអះអាងនៅចំពោះមុខសមាជិករបស់ខ្លួនដែលជាជនជាតិខ្មែរអ៊ីស្លាមថា ក្រោយការបោះឆ្នោត ខែកក្កដា ឆ្នាំ២០១៣ គណបក្សសង្គ្រោះជាតិនិងឈ្នះឆ្នោតដឹកនាំរដ្ឋាភិបាលថ្មី។ លោកសន្យារក្សាអត្តសញ្ញាណរបស់ប្រជាពលរដ្ឋខ្មែរអ៊ីស្លាមឲ្យបាន និងធានាឲ្យមានការគោរពច្បាប់ឲ្យបានត្រឹមត្រូវទៀត ផង។ ប្រធានគណបក្សសង្គ្រោះជាតិដែលកំពុងនិរទេសខ្លួនដោយខ្លួនឯងទៅក្រៅប្រទេសបានជំរុញឲ្យសកម្មជនខ្មែរអ៊ីស្លាមទាំងអស់ជួយបំផុសចលនាឲ្យមានការគាំទ្របន្ថែមទៀតដល់គណបក្សសង្គ្រោះជាតិ។
ពិធីសំណេះសំណាលនេះបានប្រព្រឹត្តទៅ កាលពីរសៀលថ្ងៃទី២២ធ្នូម្សិលមិញ នៅឯទីស្នាក់ការគណបក្សសង្គ្រោះជាតិក្រុងភ្នំពេញ ដោយមានជនជាតិខ្មែរអ៊ីស្លាមជាច្រើនចូលរួម។ ពួកគេមកពីភ្នំពេញ ខេត្តកណ្តាល តាកែវ កំពត ពោធិ៍សាត់ កំពង់ឆ្នាំង និងកំពង់ចាម ដែលសុទ្ធតែជា សមាជិក និងសកម្មជនរបស់គណបក្សសង្គ្រោះជាតិ។ មេដឹកនាំខ្មែរអ៊ីស្លាមនៅកម្ពុជាមិនអាចសុំការអត្ថាធិប្បាយបានទេនៅថ្ងៃនេះ ។ ប៉ុន្តែ លោក ឧស្មាន់ ហាសាន់ មេដឹកនាំអ៊ីស្លាមម្នាក់ និងជាមន្ត្រីជាន់ខ្ពស់រដ្ឋាភិបាលធ្លាប់មានប្រសាសន៍ថា ខ្មែរអ៊ីស្លាមបានទទួលការយកចិត្តទុកដាក់យ៉ាងខ្លាំងពីរដ្ឋាភិបាល ហើយពួកគេកំពុងទទួលបានផ្លែផ្កាពីសន្តិភាពនៅក្នុងប្រទេស។ ដូច្នេះ ពួកគេគាំទ្រគណបក្សកាន់អំណាច។
យ៉ាងណាក៏ដោយ ខ្មែរអ៊ីស្លាមមួយចំនួនដែលចូលរួមស្តាប់ការសំណេះសំណាលរបស់លោកសម រង្ស៊ីកាលពីថ្ងៃម្សិលមិញគឺជាសមាជិក និងសកម្មជនរបស់បក្សប្រឆាំង។ លោកសម រង្ស៊ី ទោះជាត្រូវតុលាការកម្ពុជាកាត់ទោសឲ្យជាប់ពន្ធនាគារជាង១០ឆ្នាំក្នុងជម្លោះបញ្ហាព្រំដែន និងបើទោះជាត្រូវបានគេលុបឈ្មោះចេញពីបញ្ជីបោះឆ្នោតហើយក៏ដោយ ក៏នៅតែបន្តស្វែងរកសំឡេងគាំទ្រឲ្យគណបក្សសង្គ្រោះជាតិដដែល។ ខ្មែរអ៊ីស្លាមគឺជាគោលដៅមួយសម្រាប់ទាក់ទាញសន្លឹកឆ្នោតដែលលោកសម រង្ស៊ីមិនបានមើលរំលងឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ