លោកកឹម សុខាផ្តាច់ខ្លួនចូលគណបក្សសង្គ្រោះជាតិនៅខែមេសា
គណបក្សសិទ្ធិមនុស្ស និងគណបក្សសង្គ្រោះជាតិនឹងរៀបចំសមាជវិសាមញ្ញនៅដើមឆ្នាំ២០១៣នេះ ដើម្បីរៀបចំសមាសភាពផ្លូវការរបស់គណបក្សសង្គ្រោះជាតិ ដែលកើតចេញពីការរួមគ្នារវាងគណបក្សប្រឆាំង២គឺគណបក្សសម រង្ស៊ី និងគណបក្សសិទ្ធិមនុស្ស។ លោកកឹម សុខាប្រធានគណបក្សសិទ្ធិមនុស្សនឹងផ្តាច់ខ្លួនជាផ្លូវការពីគណបក្សសិទ្ធិមនុស្សដើម្បីទៅជួយលោកសម រង្ស៊ីនៅខែមេសាខាងមុខនេះ។
ចុះផ្សាយនៅថ្ងៃ៖
ស្តាប់ - ០១:៤៧
គណបក្សសង្គ្រោះជាតិនឹងរៀបចំសមាជថ្នាក់ជាតិលើកដំបូងរបស់ខ្លួននៅដើមខែមេសាឆ្នាំក្រោយនេះហើយ ដើម្បីបង្ហាញរចនាសម្ព័ន្ធផ្លូវការ នៅមុនការបោះឆ្នោតជ្រើសរើសតំណាងរាស្ត្រដែលនឹងប្រព្រឹត្តិទៅនៅថ្ងៃទី២៨ខែកក្កដានោះ។ នេះបើតាមការបញ្ជាក់របស់លោកយ៉ែម បុញ្ញឬទ្ធិ អគ្គលេខាធិការគណបក្សសិទ្ធិមនុស្ស។ អ្នកតំណាងរាស្ត្រមណ្ឌលព្រៃវែងរូបនេះបានអះអាងប្រាប់វិទ្យុបារាំងអន្តរជាតិនៅថ្ងៃនេះបន្ថែមថា លោកកឹម សុខានឹងផ្តាច់ខ្លួនពីគណបក្សសិទ្ធិមនុស្ស ហើយនឹងចូលរួមទៅក្នុងគណបក្សសង្គ្រោះជាតិជួយលោកសម រង្ស៊ីនៅពេលដែលមានសមាជរបស់គណបក្សសង្គ្រោះជាតិនោះតែម្តង។
ក្នុងន័យនេះ បើតាមការពន្យល់របស់លោកយ៉ែម បុញ្ញឬទ្ធិដដែល គណបក្សសិទ្ធិមនុស្សរបស់លោកក៏នឹងរៀបចំសមាជវិសាមញ្ញនៅអំឡុងខែមេសានោះដែរ ដើម្បីជ្រើសរើសរចនាសម្ព័ន្ធថ្មីរបស់គណបក្សសិទ្ធិមនុស្ស។ ពីព្រោះថា ថ្នាក់ដឹកនាំភាគច្រើននឹងផ្តាច់ខ្លួនចេញពីគណបក្សសិទ្ធិមនុស្សនេះ ដើម្បីទៅចូលរួមក្នុងគណបក្សថ្មី គណបក្សសង្គ្រោះជាតិ ដែលត្រូវបានបង្កើតឡើងដោយគណបក្សសម រង្ស៊ី និងគណបក្សសិទ្ធិមនុស្ស។
បើតាមគម្រោងរចនាសម្ព័ន្ធនៃគណបក្សសង្គ្រោះជាតិដែលដឹកនាំដោយលោកសម រង្ស៊ី ហើយដែលត្រូវបានទទួលស្គាល់ដោយក្រសួងមហាផ្ទៃហើយនោះ លោកកឹមសុខានឹងត្រូវធ្វើជាអនុប្រធានរបស់លោកសម រង្ស៊ី ដែលមិនទាន់មានពន្លឺនៃលទ្ធភាពថា អាចត្រឡប់ចូលក្នុងប្រទេសកម្ពុជាបាននៅពេលណានោះឡើយ។ អគ្គលេខាធិការគណបក្សសិទ្ធិមនុស្សលោក យ៉ែម បុញ្ញឬទ្ធិបានរៀបរាប់អោយដឹងថា សព្វថ្ងៃនេះ ទាំងថ្នាក់ដឹកនាំគណបក្សសម រង្ស៊ី និងគណបក្សសិទ្ធិមនុស្ស ពួកគេបានធ្វើសកម្មភាពនយោបាយច្រើនដើម្បីគណបក្សសង្គ្រោះជាតិ។
នៅក្នុងសប្តាហ៍នេះ លោកកឹម សុខានឹងដឹកនាំមេឃុំរបស់គណបក្សសិទ្ធិមនុស្ស២រូបទៅទស្សនកិច្ចនៅក្នុងប្រទេសបារាំង។ នៅក្នុងប្រទេសបារាំងនោះហើយ ដែលលោកកឹមសុខានឹងជួបពិភាក្សាការងារគណបក្សសង្គ្រោះជាតិជាមួយលោក សម រង្ស៊ី នេះបើតាមការអះអាងរបស់លោកយ៉ែម បុញ្ញឬទ្ធិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ