អតីតប្រធានាធិបតីលោក បិន អាលី ចូលមន្ទីរពេទ្យសង្រ្គោះបន្ទាន់
អតីតប្រធានាធិបតីទុយនីស៊ី លោកបិន អាលី កំពុង សន្លប់បាត់ស្មារតី និងត្រូវសង្រ្គោះជាបន្ទាន់ក្នុងមន្ទីរពេទ្យមួយ ក្នុងប្រទេសអារ៉ាប៊ី សាអូឌីត បន្ទាប់ពីលោកបានរងគ្រោះថ្នាក់ដាច់សរសៃឈាមក្នុងខួរក្បាល។ បើតាមការបញ្ជាក់របស់ក្រុមគ្រួសារ សុខភាពរបស់លោកបិន អាលីពេលនេះ ស្ថិតក្នុងស្ថានភាពដ៏គ្រោះថ្នាក់បំផុត។ រដ្ឋអំណាចបណ្តោះអាសន្នទុយនីស៊ី នៅមិនទាន់បានបញ្ជាក់ពីព័ត៌មាននេះ នៅឡើយទេ ប៉ុន្តែ បញ្ហាសុខភាពរបស់លោកបិន អាលី នឹងក្លាយជាប្រធានបទសំខាន់ដែលគេលើកនៅក្នុងការប្រជុំរបស់គណៈរដ្ឋមន្រ្តីទុយនីស៊ី នៅថ្ងៃសុក្រនេះ។
ចុះផ្សាយនៅថ្ងៃ៖
សេចក្តីរាយការណ៍របស់ឈាង បុប្ផា
ដំណឹង លោកបិន អាលី (Zine el-Abidine Ben Ali )ចូលព្យាបាលក្នុងមន្ទីរពេទ្យមិនត្រូវបានគេផ្សព្វផ្សាយជាសាធារណៈទេ។ គឺ លោកNicolas Beau អ្នកនិពន្ធបារាំងម្នាក់ដែលជិតស្ធិទ្ធិនឹងគ្រួសារលោកបិន អាលីដែលជាបង្ហើបព័ត៌មាននេះ។ បើតាមលោកNicolas Beau លោកបិន អាលី ត្រូវបានបញ្ជូនចូលមន្ទីរពេទ្យផ្នែកសង្រ្គោះបន្ទាន់ តាំងពីដើមសប្តាហ៍នេះ បន្ទាប់ពីទទួលរងគ្រោះថា្នក់ ដាច់សរសៃឈាមក្នុងខួរក្បាល។ នៅក្នុងមន្ទីរពេទ្យដែលគេរក្សាសម្រាប់តែគ្រួសារព្រះរាជវង្ស ក្នុងប្រទេសអារ៉ាប៊ី សាអូឌីត លោកបិន អាលីបានដូរឈ្មោះ ដោយអ្នកសិ្នទ្ធិនឹងលោកអះអាងថា ដើម្បីបញ្ហាសន្តិសុខ។
លោកបិន អាលី កន្លងមកត្រូវបានគេព័ណ៌នាថា ជាមនុ្សមានការម៉ត់ចត់ក្នុងការរៀបចំខ្លួន និងមិនអាចឲ្យគេវាយស្មានដឹងពីសុខភាពរបស់គាត់។ ក្នុងវ័យ ៧៤ឆ្នាំ លោកនៅតែលាបសក់ពណ៌ខ្មៅ ជានិច្ច។ ប៉ុន្តែ ក្នុងរយៈពេលប៉ុន្មានឆ្នាំចុងក្រោយនេះ នៅពេលលោកធ្លាក់ខ្លួនមានជំងឺមហារីក តំរង់នោម លោកបិន អាលី បានបង្ហាញមុខ ជាសាធារណៈតិចតួច និងបណ្តោយឲ្យភរិយារបស់លោក គឺលោកស្រី Leïla Trabelsi ជាអ្នកចាត់ចែងការងាររដ្ឋ និងការងារគណបក្ស។
បើតាមអ្នកនិពន្ធបារាំងខាងលើ នៅមន្ទីរពេទ្យ លោកបិន អាលី នៅសន្លប់មិនដឹងខ្លួន និងស្ថិតនៅតែម្នាក់ឯង គ្មានសាច់ញាតិណាម្នាក់ នៅក្បែរគាត់ឡើយ។ ភរិយាសំណព្វរបស់គាត់ ត្រូវបានអ្នកកាសែតរបស់ទីភ្នាក់ងារព័ត៌មានបារាំងសរសេរថា កំពុងគេចខ្លួន នៅក្នុងប្រទេសលីប៊ី។ លោកបិន អាលីពេលនេះកំពុងស្ថិតក្នុងស្ថានភាព ពាក់កណ្តាលស្លាប់ ពាក់កណ្តាលរស់។ បើតាមក្រុមគ្រូពេទ្យអន្តរជាតិ ជំនាញៗដែលត្រូវបានគេអញ្ជើញឲ្យមកអន្តរាគមជួយសង្រ្គោះ បើសិនលោកបិន អាលីជួយសង្រ្គោះឲ្យមានស្មារតីឡើងវិញ លោកក៏នឹងអាចត្រូវប្រឈមនឹងភាពពិការមួយចំហៀងខ្លួនដែរ។
នៅក្នុងប្រទេសទុយនីស៊ី ដំណឹងឈឺធ្ងន់របស់អតីតប្រធានាធិបតីទុយនីស៊ី ដែលប្រជាជនទុយនីស៊ីតវ៉ាបណ្តេញចេញពីអំណាច កាលពីពាក់កណ្តាលខែមករា មិនបានធ្វើឲ្យគេអបអរ ឬក៏រំលែកទុក្ខសោកអ្វីដែរ។ អ្នកមួយចំនួនបាននិយាយនេះថា ដោយសារអំពើអាក្រក់របស់ខ្លួន នេះជាជោគវាសនាដែលលោកបិន អាលីត្រូវតែទទួល។ ក្រៅតែពីបាត់បង់អំណាច និង ទ្រព្យសម្បត្តិ ដោយសារបដិវត្តន៍ផ្កាម្លិះ លោកបិន អាលី និងគ្រួសារពេលនេះ កំពុងរត់ជ្រកលាក់ខ្លួននៅបរទេស ដើម្បីគេចចេញពីដីការតាមចាប់អន្តរជាតិ ដែលប្តឹងដោយរដ្ឋាភិបាលអន្តរកាលរបស់ទុយនីស៊ីបច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ