ដីកាចាប់ខ្លួនបិនអាលីនិងការប្រកាសនៅថ្ងៃព្រហស្បតិ៍នេះនូវសមាសភាពថ្មីនៃរដ្ឋាភិបាលអន្តរកាល
បាតុកម្មនៅតែមានបន្តទៀតនៅក្នុងប្រទេសទុយនីស៊ីដើម្បីប្រឆាំងទាមទារឲ្យរំលាយរដ្ឋាភិបាលអន្តរកាល។ បាតុករទុយនីស៊ីប្រឆាំងនឹងវត្តមាននៅក្នុងរដ្ឋាភិបាលអន្តរកាលនៃអ្នកនយោបាយដែលធ្លាប់ធ្វើការបម្រើអតីតប្រធានាធិបតីបិន អាលី។ នៅល្ងាចថ្ងៃពុធម្សិលមិញ អ្នកនាំពាក្យរដ្ឋាភិបាលបានប្រកាសឲ្យដឹងថា គេនឹងដឹងសមាសភាពថ្មីនៃរដ្ឋាភិបាលអន្តរកាលនៅថ្ងៃព្រហស្បតិ៍នេះ។ ចំណែកឯតុលាការទុយនីស៊ីវិញបានចេញដីកាអន្តរជាតិដើម្បីតាមចាប់ខ្លួនអតីតប្រធានាធិបតីបិន អាលីនិងភរិយា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
តាមពិត សមាសភាពថ្មីនៃរដ្ឋាភិបាលអន្តរកាលទុយនីស៊ីត្រូវគេប្រកាសឲ្យដឹងតាំងពីព្រឹកថ្ងៃពុធម្សិលមិញម៉្លេះ បន្ទាប់មកបានត្រូវគេប្រាប់ថា ត្រូវលើកយកមកប្រកាសប្រាប់នៅរសៀលថ្ងៃពុធវិញ ហើយនៅទីបំផុត អ្នកនាំពាក្យនៃរដ្ឋាភិបាលអន្តរកាលលោកTaieb Baccouchបានថ្លែងប្រាប់ថា សមាសភាពថ្មីនៃរដ្ឋាភិបាលអន្តរកាលនឹងត្រូវប្រកាសឲ្យដឹងនៅថ្ងៃព្រហស្បតិ៍នេះ។ នៅចន្លោះពេលនេះ ពាក្យចចាមអារ៉ាមបានបែកជាអូហូរជាស្ទឹងនៅទូទាំងប្រទេសទុយនីស៊ី។
តើហេតុអ្វីបានជាសមាសភាពថ្មីនៃរដ្ឋាភិបាលអន្តរកាលមានការលំបាកនឹងប្រសូតចេញជារូបរាងម្ល៉េះ? បើយោងតាមប្រភពព័ត៌មានបានមកពីAFPបានឲ្យដឹងថា ការចរចាក្នុងការប្តូរសមាសភាពថ្មីនៃរដ្ឋាភិបាលអន្តរកាលគឺបណ្តាលមកពីមានបញ្ហាយ៉ាងស្មុគស្មាញនិងមានការចរចាយ៉ាងតឹងតែងពាក់ព័ន្ធនឹងមុខតំណែងរដ្ឋមន្ត្រីនៃក្រសួងការពារជាតិ ក្រសួងមហាផ្ទៃនិងក្រសួងការបរទេស។ សូមបញ្ជាក់ថា បច្ចុប្បន្ននេះ មុខតំណែងរដ្ឋមន្ត្រីទាំងបីក្រសួងខាងលើនេះសុទ្ធតែកាន់កាប់ដោយអ្នកនយោបាយដែលធ្លាប់ធ្វើការបម្រើរបបបិន អាលី។
ចំណែកឯតុលាការទុយនីស៊ីវិញបានចេញដីកាអន្តរជាតិដើម្បីតាមចាប់ខ្លួនអតីតប្រធានាធិបតីបិន អាលីនិងភរិយាពី” បទបានលួចបន្លំយកអចលនទ្រព្យនិងទ្រព្យសម្បត្តិផ្សេងៗទៀតដោយខុសច្បាប់” ហើយនិងពី” បទបានយករូបិយប័ណ្ណចេញទៅបរទេសដោយខុសច្បាប់” ។
រីឯInterpolវិញ គេបានឲ្យ” សញ្ញាអាសន្នពិភពលោក” ហើយបានចេញបញ្ជាឲ្យតាមដានរកចាប់ខ្លួនអតីតប្រធានាធិបតីបិន អាលីនិងភរិយានិងក្រុមគ្រួសារ៦នាក់ទៀតដែលបានភៀសខ្លួនទៅរកជម្រកទៅប្រទេសArabie Saoudite៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ