សហភាពអឺរ៉ូបផ្អាប់ទុកធនធានរបស់លោកបេន អាលីនិងភរិយា
រដ្ឋមន្ត្រីក្រសួងការបរទេសនៃសហភាពអឺរ៉ូបរួម ប្រជុំគ្នានៅថ្ងៃចន្ទម្សិលមិញ៣១មករា នៅទីក្រុងBruxellesនៃប្រទេសBelgique បានសំរេចចិត្តផ្អាប់ទុកធនធានរបស់លោកអតីតប្រធានាធិបតីទុយនីស៊ី Zine el-Abidine Ben Ali និងភរិយាគាត់។ វិធានការនេះប្រហែលអាចនឹងត្រូវរាលដាលទៅដល់អ្នក ជំនិតដទៃទៀតរបស់លោកប្រធានាធិបតីធ្លាក់ពីមុខតំណែង។
ចុះផ្សាយនៅថ្ងៃ៖
សេចក្តីរាយការណ៍របស់ វីនស្តុន រតនា
បន្ទាប់ពីបានប្រកាន់ឥរិយាបថប្រុងប្រយ័ត្នខ្លាំងណាស់និងរង់ចាំមើលសភាពការណ៍បន្តិចមក នៅពេលដែលព្រឹត្តិការណ៍បានវិវឌ្ឍទៅកាន់តែលឿននៅតាមវិថីនៃទីក្រុងទុយនីសនិងខេត្តខ័ណ្ឌ សហភាពអឺរ៉ូប ចាប់ពីអំណើះតទៅ បានជាប់ពាក់ព័ន្ធពេញបន្ទុក ដើម្បីគាំទ្រទុយនីស៊ីថ្មី។
រដ្ឋមន្ត្រីក្រសួងការបរទេសទាំង២៧ប្រទេសនៃសហភាពអឺរ៉ូប នៅថ្ងៃចន្ទម្សិលមិញ៣១មករា បានអនុម័តសេចក្តីសំរេចចិត្តទន្ទឹងរង់ចាំជាយូរមកហើយ ស្តីពីការផ្អាប់ទុកធនធានរបស់លោកអតីតប្រធានាធិបតី។នៅខណៈនេះ ជាប់ទាក់ទងតែធនធានផ្ញើទុក នៅសហភាពអឺរ៉ូប ដោយលោកZine el-Abidine Ben Ali និងភរិយាគាត់ឈ្មោះLeïla Trabelsi។ ប៉ុន្តែ សេចក្តីសំរេចចិត្តនេះធ្វើស្របតាមសំណូមពររបស់អាជ្ញាធរទុយនីស៊ីថ្មី ប្រហែលអាចនឹងត្រូវរាលដាលយ៉ាងឆាប់រហ័សទៅកាន់គ្រប់តែអ្នកជំនិតរបស់លោកប្រធានាធិបតីធ្លាក់ពីមុខតំណែង ពីព្រោះទុយនីស៊ីបានផ្តល់មកឲ្យសហភាពអឺរ៉ូបនូវឈ្មោះបន្ថែមជាច្រើនសិបនាក់ទៀត។
នៅក្នុងគំនិតស្មារតីដូចគ្នានេះដែរ សហភាពអឺរ៉ូបបានសន្យាថា នឹងឆ្លើយតបជាវិជ្ជមានចំពោះរាល់សំណូមពររបស់ទុយនីស៊ី ដើម្បីជួយរៀបចំការបោះឆ្នោតដោយសេរី។ ដូចគ្នានេះដែរ ការចរចានឹងត្រូវធ្វើឡើងវិញ ដើម្បីលក្ខន្តិកៈចម្រើនជឿនលឿនដូចដែលប្រទេសម៉ារ៉ុកបានទទួលអ៊ីចឹងនិងដែលតម្រូវឲ្យធ្វើសហប្រតិបត្តិការពង្រីកពង្រឹងថែមទៀតនិងអត្ថប្រយោជន៍ខាងពន្ធអាករគយ។
នៅឆ្នាំ១៩៩៥ ទុយនីស៊ីជាប្រទេសទីមួយនៅប៉ែកខាងត្បូងតំបន់សមុទ្រម៉េឌីទែរ៉ាណេដែលបានចុះកិច្ចព្រមព្រៀងសហការជាមួយសហភាពអឺរ៉ូបប្រកបដោយទស្សនវិស័យបង្កើតនៅថ្ងៃណាមួយមណ្ឌលផ្តោះប្តូរពាណិជ្ជកម្មដោយសេរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ