ការប្រេះឆាក្នុងជួរថ្នាក់ដឹកនាំ កំពុងអូសទាញតួកគីឲ្យធ្លាក់ក្នុងវិបត្តិនយោបាយ
វិបត្តិនយោបាយកាន់តែរីកធំឡើងៗ នៅប្រទេសតួកគី បន្ទាប់ពីរដ្ឋមន្រ្តីក្រសួងបី ដែលស្និទ្ធនឹងលោកនាយករដ្ឋមន្រ្តី បានសុំលាឈប់ពីមុខតំណែង ជាបន្តបន្ទាប់គ្នា។ ជាងមួយសប្តាហ៍មកហើយ រដ្ឋាភិបាលតួកគី ក្រោមការដឹកនាំរបស់លោកនាយករដ្ឋមន្រ្តី Recep Tayyip Erdoganបានរង្គោះរង្គើដោយសាររឿងអាស្រូវពុករលួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
រដ្ឋមន្រ្តីបីរូបរបស់លោកនាយករដ្ឋមន្រ្តី Recep Tayyip Erdoganបានសុំលាឈប់ពីមុខតំណែង ជាបន្តបន្ទាប់ កាលពីថ្ងៃពុធ។ ការចុះចេញពីតំណែង ដោយទាន់ហន់ របស់រដ្ឋមន្រ្តីក្រសួងសេដ្ឋកិច្ច និង មហាផ្ទៃនឹងជំរុញឲ្យរដ្ឋាភិបាលរបស់លោក Erdoganរៀបចំរុះរើគណៈរដ្ឋមន្រ្តីមុនពេលកំណត់ ដែលតាមពិតទៅ ត្រូវធ្វើ នៅខែមីនា ឆ្នាំក្រោយ នៅក្រោយការបោះឆ្នោត ថ្នាក់ក្រុង។
អ្វីដែលគួរឲ្យភ្ញាក់ផ្អើល គឺរដ្ឋមន្រ្តីបរិស្ថាន ដែលស្និទ្ធនឹងលោក Erdogan និងដែលទំនងជាត្រូវគេបង្ខំឲ្យលាលែងពីតំណែង បានអំពាវនាវ កាលពីថ្ងៃពុធ ឲ្យលោកនាយករដ្ឋមន្រ្តីចុះចេញពីតំណែងដែរ។ ជាព្រឹត្តិការណ៍ប្រវត្តិសាស្រ្ត នៅក្នុងប្រទេសតួកគី ដែលរដ្ឋមន្រ្តីបានទាមទារឲ្យនាយករដ្ឋមន្រ្តីចុះចេញពីតំណែងដែរ។
សូមបញ្ជាក់ថា រដ្ឋមន្រ្តីទាំងបីរូប សុំលាលែងចេញពីមុខតំណែង ដើម្បីប្រឆាំងនឹងយុទ្ធនាការបង្ក្រាបអំពើពុករលួយរបស់តុលាការតួកគី។ កូនៗរបស់រដ្ឋមន្រ្តីទាំងបីរូបខាងលើ សុទ្ធតែត្រូវបានតុលាការចាប់ និងចោទប្រកាន់ពីបទប្រព្រឹត្តអំពើពុករលួយ និងលាងលុយកខ្វក់។ នៅក្នុងប្រតិបត្តិការប្រឆាំងអំពើពុករលួយ មន្រ្តី និងអ្នកមានដែលស្និទ្ធនឹងលោកនាយករដ្ឋមន្រ្តី Erdogan ជាង៥០នាក់បានធ្លាក់ នៅក្នុងសំណាញ់ចាប់ចង របស់រដ្ឋអាជ្ញាតួកគី។ រដ្ឋាភិបាលរបស់លោក Erdoganមក ពីគណបក្សយុត្តិធម៌ និងអភិវឌ្ឍន៍បានបរិហារយុទ្ធនាការរបស់រដ្ឋអាជ្ញាថា ជាការរួមគំនិតក្បត់ដើម្បីផ្តួលរំលំរដ្ឋាភិបាល។
យុទ្ធនាការបោសសម្អាតជនពុករលួយ ស្តែងពីសង្រ្គាមប្រកាន់បក្សពួក រវាងក្រុមរបស់លោកនាយករដ្ឋមន្រ្តី និងក្រុមរបស់គ្រូប្រៀនប្រដៅសាសនាអ៊ីស្លាម Fethullah Gülen ដ៏ល្បីឈ្មោះ ដែលគេឲ្យឈ្មោះថា ចលនា Gülen។ ចលនា Gülen ធ្លាប់គាំទ្រលោក Erdoganដែលកាន់តំណែងជានាយករដ្ឋមន្រ្តីតួកគី ជាង១០ឆ្នាំមកហើយ។ ប៉ុន្តែ មន្រ្តីតុលាការមកពីចលនាGülen បានបើកប្រតិបត្តិការចាប់មន្រ្តីពុករលួយរបស់រដ្ឋាភិបាល ដើម្បីជាការសងសឹកនឹងរដ្ឋាភិបាល ដែលបានសម្រេចបិទសាលារៀនឯកជនមួយ ដែលក្រុមនេះ ជាអ្នកឧបត្ថម្ភថវិកា។ ចលនាGülen រិះគន់ផងដែររដ្ឋាភិបាលលោក Erdoganថា កំពុងដើរទៅរកភាពផ្តាច់ការ និងផ្ទុយពីលទ្ធិប្រជាធិបតេយ្យ។ ក្រុមនេះដាក់សម្ពាធកាន់តែខ្លាំងលើលោកនាយករដ្ឋមន្រ្តី ដែលកំពុងមានមហិច្ឆតាចង់ឈរឈ្មោះជាបេក្ខជននៅក្នុងការបោះឆ្នោតជ្រើសរើសប្រធានាធិបតី នៅឆ្នាំ ២០១៥ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ