អ.ស.ប.គ្រោងដាក់ពង្រាយកងទ័ពមួកខៀវរបស់ខ្លួន៥០០០នាក់នៅម៉ាលី
តើកងកម្លាំងយោធាមួយនឹងត្រូវដាក់ពង្រាយជាប្រចាំការនៅលើទឹកដីប្រទេសម៉ាលី? ក្រោយពីការបញ្ចប់ប្រតិបត្តិការយោធាបារាំង?បញ្ហានេះ ជាប្រធានបទដ៏សំខាន់បំផុតនៅពេលនេះ។ម្យ៉ាងទៀត សេចក្តីសម្រេចមួយដែលគេកំពុងតែជជែកពិភាក្សាគ្នានៅអ.ស.បនោះគឺការដាក់ពង្រាយកងទ័ពមួកខៀវចំនួន៥០០០នាក់ដើម្បីជួយការពាររក្សាស្ថិរភាពនៅភាគខាងជើងប្រទេសម៉ាលី។ ប្រសិនបើ កងទ័ពមួកខៀវរបស់ អ.ស.បដាក់ពង្រាយពិតមែននោះ កងទ័ពមួកខៀវភាគច្រើនជាសញ្ជាតិ អាហ្វ្រិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
ចំពោះក្រុមអ្នកការទូតរបស់អ.ស.ប. សេចក្តីសម្រេចចិត្តលេខ២០៨៥ ដែល បញ្ជាក់ថា វិបត្តិនៅម៉ាលីគឺមានតែប្រជាជនអាហ្វ្រិកខ្លួនឯងទេដែលជាអ្នកដោះស្រាយនោះមិនអាចអនុវត្តន៍បានទេនៅពេលនេះ។ ដូចនេះហើយ បានជាក្រុមប្រឹក្សាសន្តិសុខនៃអសប មានបំណងចង់បញ្ជូនកងទ័ពមួកខៀវទៅកាន់ម៉ាលីដើម្បីជាជំនួយអមកងទ័ពអាហ្វ្រិក។
កងទ័ពអន្តរជាតិនេះដែលស្ថិតនៅក្រោមបញ្ជាការផ្ទាល់របស់អសបនឹងត្រូវដាក់ពង្រាយនៅម៉ាលីនៅក្នុងពេលណាដែលប្រតិបត្តិការណ៍ Serval របស់កងទ័ពបារាំងត្រូវបិទបញ្ចប់។ កងកម្លាំងទ័ពមួកខៀវរបស់ អ.ស.ប.នេះ មានបេសកកម្ម ប្រយុទ្ធប្រឆាំងជាមួយពួកអ៊ីស្លាមជ្រុលនិយមដើម្បីកុំឲ្យពួកឧទ្ទាមនេះវិលត្រឡប់មកលើទឹកដីម៉ាលីជាថ្មីវិញនិងក៏ដើម្បីកុំឲ្យពួកនេះ មកតាមសងសឹកក្រុម Touaregs ដែលជាប្រជាជនរស់នៅក្នុងតំបន់រហោឋានសាហារ៉ា។
ម្យ៉ាងទៀត ការដាក់ពង្រាយកងយោធាមួកខៀវអសបនៅម៉ាលីនេះនឹងត្រូវលើកមកពិភាក្សានៅពេលខាងមុខជាមួយសហភាពអាហ្រ្វិក អង្គការ Cédéao និងប្រទេស Mali ។ ចំនួនកង ទ័ពដែលអាចមានរហូតដល់ ៥០០០នាក់ ភាគច្រើននឹងមានសញ្ជាតិអាហ្វ្រិក។ និយាយពីតួនាទីកងទ័ពបារាំងវិញ ប្រសិនបើទាហានបារាំងបន្តស្ថិតនៅក្នុងប្រទេសម៉ាលី គេមានជម្រើសពីរយ៉ាង ៖ម្យ៉ាងគឺកងទ័ពបារាំងត្រូវនៅឯករាជ្យ ឯម្យ៉ាងទៀតកងទ័ពបារាំងត្រូវដាក់បញ្ចូលជាមួយក្រុមកងទ័ពមួកខៀវ។ ជម្រើសចុងក្រោយនេះ អាចទទួលយកបាននៅលើវិស័យនយោបាយ តែនៅលើវិស័យយោធាវិញ ពុំសូវជាមានប្រសិទ្ធិភាពឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ