ក្រោយពេលវះកាត់អនាគតនយោបាយប្រធានាធិបតីយេម៉ែនកំពុងស្រពេចស្រពិល
នៅថ្ងៃអាទិត្យ ៦មិថុនា ២០១១នេះ មន្រ្តីអារ៉ាប៊ី សាអ៊ូឌីតបានឲ្យដឹងថា លោកអាលី អាប់ដាឡា សាឡេះ (Ali Abdallah Saleh) ប្រធានាធិបតីយេម៉ែន បានឆ្លងកាត់ការវះកាត់ព្យាបាលរបួសប្រកបដោយជោគជ័យ។ ក៏ប៉ុន្តែ នៅឯយេម៉ែនឯណោះ សំណួរកំពុងតែចោទឡើងជុំវិញអនាគតនយោបាយរបស់លោកសាឡេះ។ តើគាត់អាចនឹងវិលត្រឡប់មកកាន់អំណាចវិញ ឬក៏នឹងត្រូវនៅជ្រកកោនក្នុងប្រទេសអារ៉ាប៊ី សាអ៊ូឌីត ជារៀងរហូត?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:២៩
លោកអាលី អាប់ដឡា សាឡេះ ព្រមទាំងនាយករដ្ឋមន្រ្តី ប្រធានរដ្ឋសភា និងសមាជិកជាន់ខ្ពស់រដ្ឋាភិបាលជាច្រើនរូបទៀត បានទទួលរងរបួស ក្រោយពីគ្រាប់ផ្លោងមួយគ្រាប់ ត្រូវបានគេបាញ់ចូលទៅក្នុងវិមានប្រធានាធិបតីយេម៉ែន កាលពីថ្ងៃសុក្រ។
កាលពីថ្ងៃសៅរ៍ ក្រោយពីបានទទួលដំណឹងថា លោកអាលី អាប់ដាឡា សាឡេះ ចាកចេញទៅព្យាបាលរបួស នៅប្រទេសអារ៉ាប៊ី សាអ៊ូឌីត ក្រុមប្រឆាំងបាននាំគ្នាចេញមកអបអរសាទរ ដោយចាត់ទុកថា នេះគឺជានិមិត្តរូបនៃការដួលរលំនៃរបបដឹកនាំរបស់លោកសាឡេះ។
ក៏ប៉ុន្តែ នៅថ្ងៃអាទិត្យនេះ មន្រ្តីគណបក្សកាន់អំណាចយេម៉ែនបានអះអាងថា លោកប្រធានាធិបតីយេម៉ែននឹងវិលត្រឡប់មកក្នុងប្រទេសវិញ នៅក្នុងរយៈពេលពីរសប្តាហ៍ទៀត។ ទោះជាយ៉ាងណាក៏ដោយ ការចាកចេញទៅបរទេស ក្នុងពេលប្រទេសកំពុងស្ថិតក្នុងវិបត្តិនយោបាយធ្ងន់ធ្ងរបែបនេះ ទោះបីជាចេញទៅគ្រាន់តែដើម្បីព្យាបាលជំងឺក៏ដោយ អាចនឹងធ្វើឲ្យលោកសាឡេះជួបនឹងភាពស្មុគស្មាញក្នុងការវិលត្រឡប់មកកាន់អំណាចវិញ។
នៅពេលនេះ អនុប្រធានាធិបតីយេម៉ែនបានឡើងកាន់តំណែងជាប្រធានាធិបតីស្តីទី ស្របទៅតាមរដ្ឋធម្មនុញ្ញ។ ក៏ប៉ុន្តែ អនុប្រធានាធិបតីយេម៉ែនត្រូវបានគេមើលឃើញថាជាមនុស្សដែលមានអំណាចតិចតួចបំផុត។ អវត្តមានរបស់លោកសាឡេះអាចនឹងធ្វើឲ្យយេម៉ែនត្រូវធ្លាក់ក្នុងវិបត្តិថ្មីមួយទៀត គឺការហែកហួរដណ្តើមអំណាចគ្នា ក្នុងចំណោមមន្រ្តីរដ្ឋាភិបាល។
ទាក់ទងនឹងជីវិតនយោបាយរបស់លោកសាឡេះ គេកំពុងរង់ចាំមើលការវិវឌ្ឍសំខាន់ពីរ នៅក្នុងរយៈពេលប៉ុន្មានថ្ងៃខាងមុខទៀតនេះ។ ទីមួយ តើគាត់អាចជាសះស្បើយពីរបួសអាចធ្វើការបានជាធម្មតាវិញដែរឬទេ? ទីពីរ តើអារ៉ាប៊ី សាអ៊ូឌីត នឹងអនុញ្ញាតឲ្យលោកសាឡេះវិលត្រឡប់មកយេម៉ែនវិញ ឬមួយក៏នឹងដាក់សម្ពាធឲ្យគាត់ចុះចេញពីតំណែង ហើយជ្រកកោននៅក្នុងប្រទេសអារ៉ាប៊ី សាអ៊ូឌីតរហូតតែម្តង?
គួរបញ្ជាក់ថា កន្លងមក អារ៉ាប៊ី សាអ៊ូឌីត ជាប្រទេសដែលចេញមុខចេញមាត់ជាងគេ ក្នុងការស្វែងរកដំណោះស្រាយវិបត្តិនយោបាយ នៅយេម៉ែន ដោយបានសម្រេចជាកិច្ចព្រមព្រៀងមួយ ដែលចុះហត្ថលេខាដោយក្រុមប្រឆាំង ប៉ុន្តែ ត្រូវបានលោកសាឡេះច្រានចោលមួយលើកជាពីរលើក។ វត្តមានរបស់លោកសាឡេះ នៅក្នុងប្រទេសអារ៉ាប៊ី សាអ៊ូឌីត គឺជាឱកាសល្អមួយ ដែលអារ៉ាប៊ី សាអ៊ូឌីត អាចដាក់សម្ពាធឲ្យលោកសាឡេះចុះហត្ថលេខាលើកិច្ចព្រមព្រៀងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ