បដិវត្តន៍យេម៉ែនកំពុងដើរតាមគន្លងលីប៊ី?
នៅពេលនេះ ចលនាបះបោរនៅយេម៉ែនបានឈានចូលដល់របត់ថ្មីមួយទៀត ក្រោយពីឧត្តមសេនីយ៍យោធា ឯកអគ្គរដ្ឋទូត រដ្ឋមន្រ្តី និងមន្រ្តីជាន់ខ្ពស់ជាច្រើនរូបបានផ្តាច់ខ្លួនពីរដ្ឋាភិបាល ហើយងាកមកគាំទ្រចលនាប្រឆាំងវិញ។ រថក្រោះជាច្រើនគ្រឿងត្រូវបានដាក់ពង្រាយ នៅតាមទីតាំងសំខាន់ៗក្នុងទីក្រុងសាណា (Sanaa) រដ្ឋធានីរបស់យេម៉ែន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សេង ឌីណា
អំណាចរបស់លោកអាលី អាប់ដាឡា សាឡេះ (Ali Abdallah Saleh) ប្រធានាធិបតីយេម៉ែន កំពុងតែរង្គោះរង្គោះ ក្រោយពីមានការបាក់បែកក្នុងជួររដ្ឋាភិបាល និងជួរកងទ័ព។
ឧត្តមសេនីយ៍យោធាកំពូលៗនិងដ៏មានឥទ្ធិពល ចំនួន ៣រូប បានផ្តាច់ខ្លួនពីរដ្ឋាភិបាល ហើយងាកមកគាំទ្រចលនាប្រឆាំងវិញ។ មន្រ្តីកងទ័ពថ្នាក់កណ្តាលមួយចំនួនផ្សេងទៀត ក៏បានផ្តាច់ខ្លួនតាមឧត្តមសេនីយ៍ទាំងបីរូបខាងលើនេះដែរ។
នៅក្នុងជួរមន្រ្តីស៊ីវិល មានមន្រ្តីកំពូលៗជាច្រើនរូបបានប្រកាសគាំទ្រចលនាប្រឆាំង ហើយបានទាមទារឲ្យលោកសាឡេះលាឈប់ពីតំណែង។ ក្នុងចំណោមមន្រ្តីកំពូលៗទាំងនោះ រួមមាន អនុប្រធានរដ្ឋសភា រដ្ឋមន្រ្តី អភិបាលក្រុង ព្រមទាំងឯកអគ្គរដ្ឋទូត និងអគ្គកុងស៊ុល ចំនួន ១៧រូប នៅតាមបណ្តាប្រទេសនៅអាស៊ី អឺរ៉ុប និងប្រទេសអារ៉ាប់។
ចលនាផ្តាច់ខ្លួននេះបានចាប់ផ្តើមកើតមានឡើង ក្រោយពីមានអំពើហិង្សាទៅលើបាតុករប្រឆាំង កាលពីថ្ងៃសុក្រ បណ្តាលឲ្យមនុស្សប្រមាណ ៥០នាក់បាត់បង់ជីវិត។
លោកអាលី អាប់ដាឡា សាឡេះ ដែលបានកាន់អំណាចនៅយេម៉ែនរយៈពេល ៣២ឆ្នាំមកហើយនោះ ធ្លាប់បានសន្យាថា នឹងចុះចេញពីតំណែង នៅពេលផុតអាណត្តិ នៅឆ្នាំ២០១៣ខាងមុខ ក៏ប៉ុន្តែ បានបដិសេធដាច់ខាតថា នឹងមិនលាឈប់នៅពេលនេះទេ។ ចាប់តាំងពីថ្ងៃចន្ទ ម្សិលមិញមក រថក្រោះជាច្រើនគ្រឿងត្រូវបានរដ្ឋាភិបាលដាក់ពង្រាយនៅតាមទីតាំងសំខាន់ៗមួយចំនួន ដូចជា នៅជុំវិញវិមានប្រធានាធិបតី ក្រសួងការពារជាតិ និងធនាគារជាតិយេម៉ែន។
កន្លងមក នៅក្នុងចលនាបះបោរនៅលីប៊ី គេក៏ធ្លាប់បានឃើញចលនាផ្តាច់ខ្លួនរបស់មេទ័ព មន្រ្តីរដ្ឋាភិបាល និងមន្រ្តីទូតបែបនេះដែរ។ នៅយេម៉ែន ប្រសិនបើលោកសាឡេះ នៅតែជំនះក្រាញអំណាចតទៅទៀត ចលនាបះបោរយេម៉ែនក៏អាចនឹងធ្លាក់ចូលក្នុងសង្រ្គាមស៊ីវិល ដូចជា នៅលីប៊ីបច្ចុប្បន្ននេះដែរ។
កាលពីថ្ងៃអាទិត្យ ម្សិលមិញនេះ រដ្ឋមន្រ្តីការបរទេសបារាំងបានថ្លែងជាសាធារណៈថា នៅពេលនេះ ការចុះចេញពីអំណាចរបស់លោកប្រធានាធិបតីសាឡេះ ទំនងជារឿងដែលមិនអាចចៀសរួចនោះទេ។ សហរដ្ឋអាមេរិក ដែលជាប្រទេសផ្តល់ជំនួយផ្នែកយោធាដ៏ច្រើនសន្ធឹកសន្ធាប់ដល់យេម៉ែននោះ ក៏បានថ្កោលទោសចំពោះការប្រើកម្លាំងទៅលើបាតុករប្រឆាំងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ