កាណាដា និងសហភាពអឺរ៉ុបបានចុះហត្ថលេខាលើកិច្ចព្រមព្រៀងពាណិជ្ជកម្មរវាងគ្នា
នៅថ្ងៃសុក្រ ទី២៦ កញ្ញា ប្រទេសកាណាដាបានចុះហត្ថលេខាលើកិច្ចព្រមព្រៀងដោះដូរសេរីមួយយ៉ាងសំខាន់ជាមួយសហភាពអឺរ៉ុប។ ពិធីចុះហត្ថលេខានោះត្រូវបានធ្វើឡើងនៅក្នុងទីក្រុងអូតាវ៉ា ប្រទេសកាណាដារវាងលោកនាយករដ្ឋមន្រ្តីកាណាដា និងប្រធានក្រុមប្រឹក្សាអឺរ៉ុប ព្រមទំាងប្រធានគណៈកម្មការអឺរ៉ុប។ កិច្ចព្រមព្រៀងពាណិជ្ជកម្មនេះនឹងអនុញ្ញាតឲ្យកាណាដាអាចទទួលបាននូវទីផ្សារមួយយ៉ាងសំខាន់នៅក្នុងទីបអឺរ៉ុប ពិសេសផ្តល់ទីផ្សារថ្មីឲ្យក្រុមអ្នកវិនិយោគកាណាដា។
ចុះផ្សាយនៅថ្ងៃ៖
ស្តាប់ - ០១:៤៤
ទំរាំតែសម្រេចបាននូវកិច្ចព្រមព្រៀងពាណិជ្ជកម្មចុងក្រោយចុះហត្ថលេខារវាងគ្នាពេលនេះ សហភាពអឺរ៉ុប និងប្រទេសកាណាដាបានជួបចរចាគ្នាអស់រយៈពេល ជាង ៤ឆ្នំា។ ជាការពិត អឺរ៉ុប និងកាណាដាមិនអាចលាក់បំាងពីការត្រេកត្រអាលរបស់ខ្លួនទេ តែអ្នកដែលញញឹមបិទមាត់មិនជិតជាងគេនោះ គឺប្រទេសកាណាដា ព្រោះថាជាមួយនឹងកិច្ចព្រមព្រៀងពាណិជ្ជកម្មនេះ នឹងអនុញ្ញាតឲ្យទីក្រុងអូតាវ៉ាអាចនំាចូលទីផ្សារអឺរ៉ុបកាន់តែច្រើនឡើងនូវសាច់គោ និងសាច់ជ្រូកនៅឆ្នំាខាងមុខ។ ទន្ទឹមគ្នានេះ កាណាដាក៏អាចនំាពីអឺរ៉ុបវិញនូវផលិតផលប្រចំាថ្ងៃមួយចំនួនដូចជាស្រា ហ្រ្វូម៉ា និងរថយន្តម៉ាកល្អៗមួយចំនួនរបស់អឺរ៉ុប។
អ្វីជាការកត់សម្គាល់បន្ថែមនោះគឺថា កិច្ចព្រមព្រៀងពាណិជ្ជកម្មរវាងកាណាដា និងសហភាពអឺរ៉ុបពេលនេះមិនបានកម្រិតត្រឹមការបញ្ចុះតម្លៃពន្ធដារប៉ុណ្ណោះទេ តែក៏អនុញ្ញាតឲ្យក្រុមអ្នកវិនិយោគកាណាដាផ្នែកសាងសង់ ឬផ្នែកបច្ចេកវិជ្ជាទទួលបានទីផ្សារនៅក្នុងវិស័យសាធារណៈរបស់ប្រទេសអឺរ៉ុបផងដែរ មានន័យថា ក្រុមហ៊ុនកាណាដាមានសិទ្ធិក្នុងការប្រកួតដេញថ្លៃយកគម្រោងនានារបស់រដ្ឋនីមួយៗក្នុងសហភាពអឺរ៉ុប។ រីឯក្រុមហ៊ុនអឺរ៉ុបវិញក៏មានដូចគ្នានេះដែរ។ ឃើញថាចាប់ពីពេលនេះតទៅ ក្រុមហ៊ុនកាណាដាអាចសាងសង់ស្ពាន អាងហែលទឹក ឬមួយក៏មន្ទីរពេទ្យរដ្ឋក្នុងប្រទេសប៉ូឡូញ ឬអ៊ីតាលី។
យ៉ាងណាក៏ដោយ កិច្ចព្រមព្រៀងពាណិជ្ជកម្មរវាងកាណាដា និងអឺរ៉ុបពេលនេះបានបំផុសឲ្យមានការលើកឡើងថា នឹងផ្តល់ផលចំណេញច្រើនតែលើរោងចក្រ សហគ្រាសធំៗ និងអាចធ្វើឲ្យប៉ះពាល់ខ្លំាងដល់ផលប្រយោជន៍សាធារណៈទូទៅ។ ក្រុមអ្នកព្រួយបារម្ភទំាងអស់គ្រោងនឹងសម្តែងកំហឹងរបស់ខ្លួននៅពេលខាងមុខ។ តែទន្ទឹមគ្នានេះ កិច្ចព្រមព្រៀងនឹងត្រូវសុំការយល់ព្រមពីសភាកាណាដា និងសហភាពអឺរ៉ុបបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ