វ៉ាស៊ីនតោនក្តៅក្រហាយម៉ូស្គូដែលបានផ្តល់សិទ្ធិជ្រកកោនឲ្យ Snowden
ចុះផ្សាយនៅថ្ងៃ៖
ស្តាប់ - ០៥:២៨
នៅថ្ងៃព្រហស្បតិ៍ ទី១ សីហា ប្រទេសរុស្ស៊ីបានសម្រេចផ្តល់សិទ្ធិជ្រកកោនឲ្យយុវជនជាតិអាមេរិកំាង Edward Snowden អតីតមន្រ្តីបម្រើការឱ្យភ្នាក់ងារសន្តិសុខជាតិអាមេរិកំាង ហៅកាត់ថា NSA។ ការផ្តល់សិទ្ធិជ្រកកោនឲ្យ Snowden ពេលនេះបានធ្វើឡើង បន្ទាប់ពី Snowden បានជាប់គំាងនៅក្នុងអាកាសយានដ្ឋានក្រុងម៉ូស្គូតំាងតែពីថ្ងៃទី២៣ មិថុនា។ អាមេរិកបានសម្តែងការខកចិត្ត និងបានចាត់ទុកទង្វើរបស់រុស្ស៊ីថា ជាការចាក់មួយកំាបិតចំកណ្តាលខ្នងអាមេរិកំាង។
គឺរូបលោកប្រធានាធិបតីរុស្ស៊ី ពូទីនផ្ទាល់ខ្លួនដែលបានយល់ព្រមផ្តល់សិទ្ធិជាជនភៀសខ្លួនបណ្តោះអាសន្នរយៈពេល ១ឆ្នំាឲ្យ Snowden។ សិទ្ធិជាជនភៀសខ្លួននេះបានអនុញ្ញាតឲ្យ Snowden ចាកចេញពីព្រលានយន្តហោះក្នុងទីក្រុងម៉ូស្គូដែលលោកបានជាប់គំាងនៅទីនោះតំាងពីថ្ងៃទី២៣ មិថុនា។ បើយោងតាមមេធាវីជនជាតិរុស្ស៊ីរបស់ Snowden ការយល់ព្រមរបស់លោកប្រមុខរដ្ឋរុស្ស៊ីបានភ្ជាប់នូវលក្ខខណ្ឌមួយចំាបាច់ នោះគឺ Snowden ត្រូវតែបញ្ឈប់ការទម្លាយព័ត៌មានសម្ងាត់គ្រប់ប្រភេទដែលនំាឲ្យប៉ះពាល់ដល់ផលប្រយោជន៍អាមេរិកំាង។
លោក Snowden បានទទួលយកលក្ខខណ្ឌនេះ តែក៏បានបញ្ជាក់ប្រាប់មេធាវីរបស់ខ្លួនថា ការសន្យារបស់លោកមិនមានជាប់ពាក់ព័ន្ធនឹងឯកសារជាច្រើនទៀតដែលលោកបានប្រគល់ទៅឲ្យវេបសៃយ៍ Wikileaks ឬមួយក៏ក្រុមអ្នកកាសែតផ្សេងទៀតនៅពេលដែលលោកកំពុងស្ថិតក្នុងទីក្រុងហុងកុងនោះទេ មានន័យថា បើវេបសៃយ៍ Wikileaks ឬមួយក៏ក្រុមអ្នកកាសែតចង់ចេញផ្សាយឯកសារទំាងនោះ គឺជាសិទ្ធិរបស់គេដែលលោកមិនអាចរារំាងបានឡើយ និងថា លោកក៏មិនអាចទៅដកយកឯកសារទំាងនោះត្រឡប់មកវិញដែរ។ ផ្អែកតាមមេធាវីរបស់ Snowden ដដែល លោក Snowden មានបំណងចង់កសាងជីវិតថ្មីនៅក្នុងទឹកដីរុស្ស៊ី។
អាមេរិកសម្តែងការខកចិត្តចំពោះទង្វើរបស់លោកពូទីន
ទង្វើរបស់រុស្ស៊ីបានធ្វើឲ្យសហរដ្ឋអាមេរិកក្តៅក្រហាយជាពន់ពេក។ អាមេរិកដែលបានសម្តែងការខកចិត្តយ៉ាងខ្លំាង ព្រមទំាងបានចាត់ទុកទង្វើរបស់ទីក្រុងម៉ូស្គូ ថាជាការចាក់មួយកំាបិតចំកណ្តាលខ្នង។ ប្រតិកម្មរបស់អាមេរិកពេលនេះ មិនមែនជារឿងមួយចម្លែក ហើយក៏មិនមានអ្វីគួរឲ្យភ្ញាក់ផ្អើលដែរ ព្រោះថា មនុស្សម្នាក់ដែលបានបើកកកាយរឿងរ៉ាវសម្ងាត់ផ្ទៃក្នុងរបស់ប្រទេសមហាអំណាចពិភពលោកមួយទំាងមូល បែរជាត្រូវបានប្រទេសមួយចេញមុខជួយការពារ ព្រមទំាងផ្តល់សិទ្ធិជ្រកកោនឲ្យទៀត។ តើអ្នកណាមួយ មិនក្តៅក្រហាយនោះ។ ឧបមាថា រូប Snowden ជាជនជាតិរុស្ស៊ីទៅវិញ រួចបែរជាត្រូវបានអាមេរិកផ្តល់សិទ្ធិជ្រកកោនឲ្យ តើទីក្រុងម៉ូស្គូគិតយ៉ាងម៉េចដែរ ?។
ដូច្នេះសំណួរដែលត្រូវចោទនោះគឺថា ហេតុអ្វីបានជារុស្ស៊ីមិនយល់ព្រមប្រគល់ខ្លួន Snowden ទៅឲ្យអាមេរិក តែបែរជាសម្រេចចិត្តផ្តល់សិទ្ធិជ្រកកោនឲ្យ Snowden ទៅវិញ ?
ត្រង់ចំណុចនេះ គេអាចឆ្លើយបានថា អាចជាការសងសឹក ឬមួយក៏ជាមេរៀនមួយដែលរូបលោកប្រធានាធិបតីរុស្ស៊ីពូទីនចង់ផ្តល់ទៅឲ្យលោកប្រធានាធិបតីអាមេរិក អូបាម៉ា ព្រោះសូមជម្រាបជូនថា តំាងតែដើមមក ពិសេសតំាងពីក្រោយការជាប់ឆ្នោតប្រធានាធិបតីរស្ស៊ីជាថ្មីរបស់លោកពូទីនក្នុងឆ្នំា ២០១២ មក ទំនាក់ទំនងរវាងទីក្រុងម៉ូស្គូ និងវ៉ាស៊ីតោនមិនដែលស្គាល់ភាពល្អូកល្អឺនម្តងណាទេ។ នៅក្នុងជំនួបរវាងគ្នាម្តងៗនាពេលកន្លងមក លោកអូបាម៉ា និងលោកពូទីនមិនដែលបានបង្ហាញឲ្យឃើញនូវភាពចុះសម្រុងគ្នាម្តងណាឡើយ ទំាងសំណុំរឿងអន្តរជាតិ ក៏ដូចជាបញ្ហាផ្ទៃក្នុងរបស់ប្រទេសរុស្ស៊ី។
សំណុំរឿងអន្តរជាតិមានដូចជាវិបត្តិនយោបាយក្នុងប្រទេសស៊ីរី និងវិបត្តិនុយក្លេអ៊ែរក្នុងប្រទេសអ៊ីរ៉ង់ដែលរុស្ស៊ីបានចេញមុខការពារយ៉ាងពេញទំហឹង ប្រឈមទប់នឹងក្រុមប្រទេសលោកខាងលិចដែលមានអាមេរិកជាមេក្លោង។ ទាក់ទងនឹងរឿងគោរពសិទ្ធិមនុស្សនៅក្នុងប្រទេសរុស្ស៊ីវិញ អាមេរិកក៏ធ្លាប់បានធ្វើការទិតៀន រិះគន់វាយប្រហារលើរបបក្រុងម៉ូស្គូយ៉ាងចាស់ដៃដែរ។ អ៊ីចឹងសម្រាប់លោកពូទីន ការផ្តល់សិទ្ធិជ្រកកោនឲ្យ Snowden ពេលនេះ ពិតជាឱកាសមួយមិនអាចខ្វះបានក្នុងការផ្តល់មេរៀនឲ្យលោកអូបាម៉ា។
រឿងរ៉ាវ Snowden នឹងរឹតតែធ្វើឲ្យទំនាក់ទំនងរុស្ស៊ី-អាមេរិកកាន់តែធ្លាក់ដុនដាប
រឿងរ៉ាវរបស់ Snowden នឹងធ្វើឲ្យទំនាក់ទំនងរវាងអាមេរិក និងរុស្ស៊ីកាន់តែធ្លាក់ដុនដាបខ្លំាងដោយចៀសមិនរួច និងដែលគ្រប់គ្នាកំពុងរង់ចំា។ ពិតណាស់ថា រដ្ឋាភិបាលក្រុងម៉ូស្គូតែងតែបានព្យាយាមមិនចង់ធ្វើឲ្យរឿងរ៉ាវ Snowden ក្លាយជាវិបត្តិការទូតធ្ងន់ធ្ងរជាមួយក្រុងវ៉ាស៊ីនតោនទេ។ ក៏ប៉ុន្តែ ទង្វើរបស់លោកប្រធានាធិបតីរុស្ស៊ីពូទីនពេលនេះត្រូវបានមន្រ្តីអាមេរិកំាងយល់ឃើញថា ជាការដាក់ថ្នំាបំពុលបន្ថែមលើទំនាក់ទំនងរវាងប្រទេសមហាអំណាចទំាងពីរ។
ក្រៅពីការបញ្ចេញប្រតិកម្មសោកស្តាយចំពោះទង្វើរបស់ក្រុងម៉ូស្គូ ក្រុងវ៉ាស៊ីតោនកំពុងពិចារណាលើគម្រោងជំនួបកំពូលរវាងលោកអូបាម៉ា និងលោកពូទីនក្នុងទីក្រុងម៉ូស្គូនៅថ្ងៃខាងមុខ វត្តមានរបស់លោកអូបាម៉ានៅក្នុងជំនួបកំពូលនៃក្រុមប្រទេស G២០ ក្នុងទីក្រុង Saint-Petersbourg ព្រមទំាងវត្តមានរបស់លោកអូបាម៉ានៅក្នុងការប្រកួតល្បែងអូឡំាពិករដូវរងារនាខែកុម្ភៈ ឆ្នំា ២០១៤ ក្នុងប្រទេសរស្ស៊ី។
តើនៅក្នុងកម្មវិធីដែលនឹងត្រូវរៀបចំឡើងនៅក្នុងប្រទេសរស្ស៊ីទំាងអស់នេះ នឹងត្រូវលោកអូបាម៉ាលុបចោល មិនចូលរួម ឬយ៉ាងណា ?
នៅមិនទាន់មានចម្លើយយ៉ាងណាពីសេតវិមានទេ តែសម្រាប់ក្រុមអ្នកវិភាគ ទំនាក់ទំនងរវាងរុស្ស៊ី និងអាមេរិកនឹងឡើងតានតឹងដោយចៀសមិនរួច។ យ៉ាងណាក៏ដោយ ក្រុមអ្នកតាមដានស្ថានការណ៍បានជម្រុញឲ្យរុស្ស៊ី និងអាមេរិកកាត់បន្ថយភាពមិនចុះសម្រុងគ្នា ព្រោះថា ទង្វើសងសឹកគ្នានឹងរឹតតែធ្វើឲ្យទំនាក់ទំនងកាន់តែធ្លាក់ដុនដាបថែមទៀតប៉ុណ្ណោះ មិនមែនធ្លាក់ដុនដាបតែរវាងមហាអំណាចទំាងពីរទេ តែវាក៏ជាល្បែងមួយដ៏គ្រោះថ្នាក់សម្រាប់ពិភពលោកទំាងមូលដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ