អាមេរិកដាក់សម្ពាធលើម៉ូស្គូមិនឱ្យទទួលSnowden
រដ្ឋបាលអាមេរិក បានបញ្ចេញប្រតិកម្មភ្លាម បន្ទាប់ពីSnowden បានសុំជាផ្លូវការសិទ្ធិជ្រកកោននៅរុស្ស៊ី។ វ៉ាស៊ីនតោន មិនចង់ឃើញក្រុងម៉ូស្គូ ផ្តល់ចម្លើយជាវិជ្ជមានដល់អតីតបុគ្គលិកទីភ្នាក់ងារស៊ើបការណ៍សម្ងាត់អាមេរិករូបនេះទេ ព្រោះដូចជាផ្តល់ឆាកឱ្យលោក ស្នូឌិនធ្វើឃោសនាដូច្នោះ។
ចុះផ្សាយនៅថ្ងៃ៖
ស្តាប់ - ០១:៤០
សហរដ្ឋអាមេរិកមិនពេញចិត្តទេ ដែលឃើញ Edward Snowden ទទួលជួបមេធាវី និងតំណាងក្រុមអ្នកការពារសិទ្ធិមនុស្ស នៅអាកាសដ្ឋានក្រុងម៉ូស្គូ និងដែលប្រកាសសុំសិទ្ធិជ្រកកោននៅរុស្ស៊ី ទោះបីជាសិទ្ធិបណ្តោះអាសន្នយ៉ាងណាក៏ដោយ។ តាមការពិត លោក ស្នូឌិន បង្ខំចិត្តត្រូវសុំសិទ្ធិជ្រកកោននៅរុស្ស៊ីសិន ដើម្បីអាចធ្វើដំណើរដោយគ្មានគ្រោះថ្នាក់ឆ្លងទៅកាន់ប្រទេសនៅអាមេរិកឡាទីន មានជាអាទិ៍ វេណេស៊ុយអេឡា នីការ៉ាហ្គា និងប៉ូលីវី ដែលបើកទ្វារចំហចាំទទួល។
សេតវិមានមិនបង្អង់នឹងបញ្ចេញប្រតិកម្ម ! អំពាវនាវឱ្យម៉ូស្គូបដិសេធសំណើរបស់អតីតបុគ្គលិកទីភ្នាក់ងារស៊ើបការណ៍អាមេរិក ដោយសំអាងថា ការផ្តល់សិទ្ធិជ្រកកោនដល់ ស្នូឌិន គឺដូចជាផ្តល់មីក្រូធ្វើឃោសនា និងផ្ទុយស្រឡះពីជំហររបស់ម៉ូស្គូពីដំបូងដែលចង់រក្សាអព្យាក្រិតភាពក្នុងសំណុំរឿងនេះ។
អាមេរិកមិនឈប់ត្រឹមណេះទេ លោកប្រធានាធិបតីអាមេរិក បារ៉ាក់ អូបាម៉ា បានជួបពិភាក្សាជាមួយលោក ពូទីន តាមទូរស័ព្ទ។ ជាជំនួបគ្រោងធ្វើឡើងមុនសំណើសុំរបស់ស្នូឌិនទៅទៀត។ ខ្លឹមសារនេះការជជែកគ្នាតាមទូរស័ព្ទមិនត្រូវបានបង្ហើបបង្ហាញឱ្យដឹងទេ ប៉ុន្តែប្រាកដណាស់ថាមានរឿងស្នូឌិនមួយជាក់ជាពុំខាន។ បញ្ហាដែលចោទឡើងនៅពេលនេះ គឺថាតើលោកប្រធានាធិបតីរុស្ស៊ីពូទីន ពិតជាត្រៀមបង្ខូចទំនាក់ទំនងអាមេរិករុស្ស៊ីដែលមិនសូវល្អស្រាប់ទៅហើយ ដើម្បីជួយនាយទាហានស្នូឌិនឬយ៉ាងណា ?
ប៉ុន្តែរហូតមកទល់នឹងរសៀលថ្ងៃសៅរ៍ម្សិលមិញ រុស្ស៊ីនៅតែអះអាងថាពុំទាន់បានទទួលសំណើសុំជ្រកកោនអ្វីជាលាយលក្ខអក្សរពីស្នូឌិន។ តែមនុស្សជំនិតរបស់ប្រធានាធិបតីរុស្ស៊ីជាច្រើនបានស្វាគមន៍និងគាំទ្រសំណើរបស់Snowden៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ