នៅបេនហ្កាហ្ស៊ី ក្រុមអ្នកបះបោរលីប៊ីគ្រោងស្នើឲ្យមានការឈប់បាញ់គ្នាដោយមានលក្ខខណ្ឌ
កាលពីថ្ងៃសុក្រទី១មេសាឆ្នាំ២០១១ បេសកជនពិសេសនៃអ ស ប ជាលើកទីពីរបានអញ្ជើញទៅទីក្រុងបេនហ្កាហ្ស៊ីដែលជាដែនអំណាចនៃក្រុម អ្នកបះបោរនៅប្រទេសលីប៊ី។ បេសកជនពិសេសនៃអ ស ប បានជួបពិភាក្សាជាមួយលោកMoustapha Abdeljalil ប្រមុខដឹកនាំនៃក្រុមប្រឹក្សាជាតិអន្តរកាល។ នៅពេលទន្ទឹមគ្នានោះ ការវាយប្រហារគ្នាយ៉ាងខ្លាំងក្លាបានកើតមាននៅជិតមជ្ឈមណ្ឌលប្រេងកាត នៅទីក្រុងប្រេហ្កាដែលឋិតនៅចម្ងាយប្រមាណ៨០០គ,មពីទីក្រុងទ្រីប៉ូលី។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
បេសកជនពិសេសនៃអ ស ប បានចំណាយពេលមួយថ្ងៃពេញនៅទីក្រុងបេនហ្កាហ្ស៊ីដើម្បីធ្វើការចរចាពី “បញ្ហាផ្តល់ជំនួយមនុស្សធម៌” និង “ការឈប់បាញ់គ្នា”ឲ្យមានប្រសិទ្ធិភាព។
ក៏ដូចគ្នាអ៊ីចឹងដែរសម្រាប់ក្រុមប្រឹក្សាជាតិអន្តរកាលដែលចង់សម្រេចឲ្យបាននូវ“ការឈប់បាញ់គ្នា”រវាងកងកម្លាំងរបស់កាដាហ្វ៊ីនិងក្រុមអ្នកបះបោរ ក៏ប៉ុន្តែដោយមានលក្ខខណ្ឌដូចបានថ្លែងបញ្ជាក់តាមរយៈវិទ្យុបារាំងអន្តរជាតិRFI ដោយលោកMoustapha Abdeljalil ប្រមុខដឹកនាំនៃក្រុមប្រឹក្សាជាតិអន្តរកាលថា៖
“ក្រុមយុទ្ធជនរបស់កាដាហ្វីត្រូវតែដកខ្លួនចេញ ដូចគ្នាអ៊ីចឹងដែរសម្រាប់អ្នកបាញ់ជើងឆើតរបស់កាដាហ្វ៊ីដែលពួនលាក់ខ្លួននៅតាមដំបូលផ្ទះនៅក្រុងទ្រីប៉ូលីនិងនៅតាមទីក្រុងដទៃទៀត ហើយត្រូវតែគោរពសិទ្ធិសេរីភាពរបស់ប្រជាពលរដ្ឋក្នុងការបញ្ចេញមតិ។ ការចាកចេញពីរដ្ឋអំណាចដោយកាដាហ្វ៊ីនិងក្រុមគ្រួសារគឺជាការមួយដែលគេពុំអាចចរចាបានឡើយ។ ក្រោយពីមានទង្វើរបស់កាដាហ្វ៊ីទៅលើប្រជាជនលីប៊ី កាដាហ្វ៊ីពុំអាចនៅប្រទេសលីប៊ីបានទៀតឡើយ។”
គោលបំណងចុងក្រោយរបស់ក្រុមប្រឹក្សាជាតិអន្តរកាលគឺនៅដដែលគ្មានអ្វីប្រែប្រួលឡើយ។ ក៏ប៉ុន្តែ ក្រុមអ្នកបះបោរលីប៊ីខ្វះអ្នកជំនាញការខាងយោធានិងខ្វះសព្វាវុធ។ ហេតុដូច្នេះហើយ បានជាលោកMoustapha Abdeljalil ប្រមុខដឹកនាំនៃក្រុមប្រឹក្សាជាតិអន្តរកាលរំពឹងទៅលើប្រទេសសមាជិកនៃកងកម្លាំងសម្ព័ន្ធភាព។
សូមបញ្ជាក់ថា អាវុធដែលប្រដាប់ដោយយុទ្ធជននៃក្រុមអ្នកបះបោរលីប៊ីភាគច្រើនជាអាវុធធុនស្រាល ក្រុមប្រឹក្សាជាតិអន្តរកាលរំពឹងទៅលើអាវុធទំនើបៗដែលនឹងអាចផ្តល់ឲ្យដោយប្រទេសសមាជិកនៃកងកម្លាំងសម្ព័ន្ធភាព។ ប៉ុន្តែនៅមានបញ្ហាមួយដែលត្រូវដោះស្រាយគឺយុទ្ធជននៃក្រុមអ្នកបះបោរលីប៊ីភាគច្រើនជាជនស៊ីវិលពុំដែលកាន់កាំភ្លើងធ្វើសង្គ្រាមសោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ