កូនប្រុសលោកកាដាហ្វីលើកឡើងអំពីការចាកចេញទៅជាយថាហេតុនៃឳពុកខ្លួន
យ៉ាងតិច មានកូនប្រុសពីរនាក់របស់មេដឹកនាំប្រទេសលីប៊ីគឺលោកវរសេនីយឯក កាដាហ្វីស្នើឱ្យមានសម័យអន្តរកាលមួយឆ្ពោះទៅរករបបប្រជាធិបតេយ្យ អាស្រ័យរដ្ឋធម្មនុញ្ញដែលប្រមើលទុកការដកខ្លួនចាកចេញពីរដ្ឋអំណាច នៃឳពុករបស់គេទាំងពីរនាក់ -នេះបើយោងតាមទិនានុប្បវត្តិអាមេរិកាំង New York Times ឱ្យដឹងនៅល្ងាចមិញថ្ងៃអាទិត្យ៣មេសា។
ចុះផ្សាយនៅថ្ងៃ៖
សេចក្តីរាយការណ៍របស់ វីនស្តុន រតនា
យោងតាមសំដីអ្នកការទូតម្នាក់មិនបញ្ចេញឈ្មោះនិងអ្នកធំលីប៊ីម្នាក់ដែលដឹងអំពីគម្រោងការ ទិនានុប្បវត្តិអាមេរិកាំងNew York Times បញ្ជាក់ប្រាប់ថា សម័យអន្តរកាលនឹងត្រូវដឹកនាំដោយកូនប្រុសម្នាក់របស់លោកកាដាហ្វីឈ្មោះ Seif al-Islam el-Kadhafi។
កាសែតNew York Times ពុំបានបញ្ជាក់ប្រាប់ទេថា តើលោកវរសេនីយឯកកាដាហ្វីដែលមានអាយុ៦៨ឆ្នាំព្រមទទួលយកឬទេ?សំណើនេះដែលគាំទ្រដោយកូនប្រុសពីរនាក់របស់គាត់គឺលោកSeifនិងលោកSaadi el –Kadhafi ។ប៉ុន្តែ ជនម្នាក់ដែលជិតដិតនឹងកូនប្រុសរបស់គាត់ បានបញ្ជាក់ប្រាប់ថា ឳពុកទំនងជាយល់ព្រម។
កូនប្រុសទាំងពីរ” ចង់ជឿនលឿនទៅមុខ ដើម្បីធ្វើឱ្យប្រទេសជាតិផ្លាស់ប្តូរមុខមាត់ “ ដោយគ្មានឳពុករបស់ខ្លួន -យោងតាមសំដីរបស់ជនម្នាក់ដែលជិតដិតនឹងកូនប្រុសSeifហើយនិងកូនប្រុសSaadi។ស្របតាមកាសែតNew York Times សំណើឱ្យមានសម័យអន្តរកាលមួយអាចសំដែងឱ្យឃើញការខ្វែងគំនិតគ្នាមានជាយូរមកហើយរវាងកូនប្រុសរបស់លោកកាដាហ្វី។
នៅពេលដែលកូនប្រុសSeifនិងSaadi បានទទួលការអប់រំនៅសាលាលោកខាងលិច កូនប្រុសពីរនាក់ទៀតរបស់លោកកាដាហ្វីគឺលោកKhamisនិងMutuassimត្រូវគេចាត់ទុកជាបក្សព័ន្ធនៃខ្សែបន្ទាត់នយោបាយតឹងរ៉ឹង។
លោកKhamis Kadhafi ធ្វើជាមេកើយនៃកងសេនាជនរក្សាការពារសមាជិករដ្ឋាភិបាល។ចំណែកឯលោកMutuassimវិញ ធ្វើជាទីប្រឹក្សាសន្តិសុខជាតិ ដោយត្រូវគេចាត់ទុកជាគូប្រជែងរបស់លោកSeif ដើម្បីស្នងមុខតំណែងបន្តពីឳពុកខ្លួន -នេះបើយោងតាមកាសែតNew York Times៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ