សករាជលោក ឡូរ៉ង់ បាក់បូបានឈានដល់ទីបញ្ចប់
ទីបំផុតទៅ និងបន្ទាប់ពីមានការប្រយុទ្ធគា្នយ៉ាងខ្លំាងក្លារវាងកងកម្លំាងរបស់លោកបាក់បូ និងកងកម្លំាងរបស់លោកវ៉ាត់តារ៉ាក្នុងរយៈពេល ១២ថ្ងៃចុងក្រោយនេះមក លោកប្រធានាធិបតីផុតអាណត្តិ បាក់បូ ត្រូវបានកងកម្លំាងរបស់លោកវ៉ាត់តារ៉ាចាប់ខ្លួននៅព្រឹកថ្ងៃច័ន្ទ ទី១១ មេសាម្សិលមិញ។ លោកវ៉ាត់តារ៉ាបានអំពាវនាវឲ្យប្រជាជនកូដឌីវ័រអត់ធ្មត់ និងទប់កំហឹង។ សហគមន៍អន្តរជាតិបានអបអរសាទរចំពោះការចាប់ខ្លួនរូបលោកបាក់បូ និងបានអំពាវនាវឲ្យលោកប្រធានាធិបតី វ៉ាត់តារ៉ាផ្តើមធ្វើការបង្រួបបង្រួមប្រជាជនកូដឌីវ័រគ្រប់ស្រទាប់វណ្ណៈ ដោយមិនប្រកាន់និន្នាការនយោបាយ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ គួច គន្ធារ៉ា
កាលពីព្រឹកថ្ងៃច័ន្ទ ទី១១ មេសាឆ្នំា ២០១១ រូបលោកប្រធានាធិបតីផុតអាណត្តិ ឡូរ៉ង់ បាក់បូ ភរិយា និងកូនៗ ព្រមទំាងមនុស្សជំនិតជាច្រើននាក់ទៀតរបស់លោកបាក់បូត្រូវបានកងកុម្មង់ដូរបស់លោកវ៉ាត់តារ៉ាចូលទៅចាប់ខ្លួនក្នុងគេហដ្ឋាននៅវិមានប្រធានាធិបតី។ ខណៈនេះ លោកបាក់បូ និងក្រុមគ្រួសារត្រូវបានគេឃុំទុកនៅក្នុងសណ្ឋាគារ Golf ដោយមានការយាមកាមយ៉ាងម៉ត់ចត់ ពីសំណាក់កងកម្លំាងរបស់លោកវ៉ាត់តារ៉ា និងកងកម្លំាងអន្តរជាតិ។ ថ្លែងតាមទូរទស្សន៍ លោកវ៉ាត់តារ៉ាបានបញ្ជាក់ពីការចាប់ខ្លួនលោក បាក់បូ និងបានប្រកាសធានាសុវត្ថិភាពដល់រូបលោកបាក់បូ ក្រុមគ្រួសារ ព្រមទំាងមនុស្សជំនិតរបស់លោកបាក់បូ៖
ប្រសាសន៍របស់លោកវ៉ាត់តារ៉ា
នៅពេលដែលកងកុម្មង់ដូរបស់លោកវ៉ាត់តារ៉ាបាននំាខ្លួនលោកបាក់បូទៅដល់សណ្ឋាគារ Golf លោកបាក់បូបានឆ្លៀតថ្លែងយ៉ាងខ្លី នៅចំពោះមុខក្រុមអ្នកសារព័ត៌មាន ដោយបានអំពាវនាវឲ្យមានការឈប់បាញ់គ្នាជាបន្ទាន់ និងស្នើឲ្យមានដំណោះស្រាយមួយយ៉ាងឆាប់ ក្នុងការបិទបញ្ចប់វិបត្តិ និងផ្តើមស្ថាបនាប្រទេសជាតិឡើងវិញ។
ក្រោយពីឮដំណឹងចាប់ខ្លួនលោកបាក់បូមក អ្នកដែលខកចិត្ត លាយឡំនឹងកំហឹង គឺក្រុមសកម្មជន អ្នកគំាទ្រលោកបាក់បូ។ ចំណែកអ្នកសប្បាយចិត្តនឹងដំណឹងនេះ គឺក្រុមអ្នកគំាទ្រលោកវ៉ាត់តារ៉ា។ ពួកគេបានសម្តែងក្តីសប្បាយរីករាយ ដោយឃើញលោកបាក់បូត្រូវបានចាប់ខ្លួន និងសង្ឃឹមថា ប្រទេសកូដឌីវ័រនឹងមានការផ្លាស់ប្តូរជាមួយលោកវ៉ាត់តារ៉ា៖
ប្រតិកម្មរបស់ក្រុមអ្នកគំាទ្រលោកវ៉ាត់តារ៉ា
សូមជម្រាបជូនថា កូដឌីវ័របានឆ្លងកាត់វិបត្តិនយោបាយប្រធានាធិបតីពីរ តំាងពី ៤ខែមកហើយ ពោលគឺតំាងពីក្រោយពីការបោះឆ្នោតប្រធានាធិបតីក្នុងខែវិច្ឆិកា ឆ្នំា ២០១០។ នៅម្ខាង គឺលោកប្រធានាធិបតីផុតអាណត្តិ បាក់បូដែលចាញ់ឆ្នោត តែមិនព្រមចុះចេញពីអំណាច។ នៅម្ខាងទៀត គឺលោកវ៉ាត់តារ៉ាដែលឈ្នះឆ្នោត និងទទួលស្គាល់ដោយសហគមន៍អន្តរជាតិ។ អស់រយៈពេល ៤ខែមកហើយ ដែលកងកម្លំាងទំាងសងខាងបានប្រឈមមុខដាក់គ្នាយ៉ាងហិង្សា។ គឺទើបតែមានអន្តរាគមន៍ពីសំណាក់កម្លំាងអន្តរជាតិ ONUCI និងទាហានបារំាង Licorne នារយៈពេល ១០ថ្ងៃចុងក្រោយនេះទេ ទើបគេអាចចាប់ខ្លួនលោកបាក់បូបាន។ តែសំណួរមួយដែលបានចោទឡើងនៅពេលនេះ តើអ្នកណា ដែលបានចូលទៅចាប់ខ្លួនលោកបាក់បូ ? ជាកម្លំាងរបស់លោកវ៉ាត់តារ៉ា ឬមួយក៏កម្លំាងអន្តរជាតិ ជាមួយនឹងទាហានបារំាង ?
លោក Ahova Don méllo អ្នកនំាពាក្យរបស់លោកបាក់បូបានចង្អុលចំមុខ ទាហានបារំាង Licorne ដោយមានអន្តរាគមន៍ពីកងកម្លំាងអន្តរជាតិ ONUCI៖
ប្រសាសន៍របស់លោក Ahova Don méllo
ប្រតិកម្មភ្លាមៗ តបនឹងការចោទប្រកាន់របស់លោក Ahova Don méllo អ្នកនំាពាក្យរបស់លោកបាក់បូ លោក Alain Leroy ប្រធានប្រតិបត្តិការរក្សាសន្តិភាពរបស់អង្គការសហប្រជាជាតិប្រចំាកូដឌីវ័រ ហៅកាត់ថា ONUCI បានអះអាងថា គឺកងកម្លំាងរបស់លោកវ៉ាត់តារ៉ា ជាអ្នកដែលបានចូលចាប់លោកបាក់បូនៅក្នុងគេហដ្ឋាន គឺមិនមែនកងកម្លំាងរបស់ ONUCI ទេ៖
ប្រសាសន៍របស់លោក Alain Leroy
ទីក្រុងប៉ារីស តាមរយៈនាយសេនាធិការដ្ឋានក៏បានបញ្ជាក់ហើយ បញ្ជាក់ទៀតថា ទាហានបារំាងនៅកូដឌីវ័រមិនបានចូលរួមជាមួយកងកម្លំាងរបស់លោកវ៉ាត់តារ៉ាក្នុងការចាប់ខ្លួនលោកបាក់បូទេ។ តែលោករដ្ឋមន្រ្តីក្រសួងការពារជាតិបារំាងបានទទួលស្គាល់ថា ទាហានបារំាង និងកម្លំាង ONUCI ពិតជាបានជួយអន្តរាគមន៍តាមផ្លូវអាកាស និងផ្លូវគោក ដល់កងកម្លំាងរបស់លោកវ៉ាត់តារ៉ា។ លោកវ៉ាត់តារ៉ាដែលបានអំពាវនាវឲ្យប្រជាជនកូដឌីវ័ររក្សាភាពស្ងប់ស្ងាត់ និងទប់កំហឹង៖
ប្រសាសន៍របស់លោកវ៉ាត់តារ៉ា
នៅចំពោះមុខការចាប់ខ្លួនលោកបាក់បូ សហគមន៍អន្តរជាតិបានបញ្ចេញប្រតិកម្មគំាទ្រ។ លោកប្រធានាធីបតីអាមេរិក អូបាម៉ាបានអបអរសាទរ ស្នើឲ្យក្រុមប្រដាប់អាវុធរបស់លោកបាក់បូទម្លាក់អាវុធចុះ និងឲ្យទទួលស្គាល់កងទ័ពកូដឌីវ័រតែមួយ នៅក្រោមលោកប្រធានាធិបតីវ៉ាត់តារ៉ា។ ចំណែកលោកស្រីប្រមុខការទូតអាមេរិក Hillary Clinton បានចាត់ទុកការចាប់ខ្លួនលោកបាក់បូពេលនេះថា ជាសញ្ញាព្រមានមួយចំពោះអ្នកកាន់អំណាចផ្សេងទៀត នៅក្នុងតំបន់៖
ប្រសាសន៍របស់លោកស្រី Hillary Clinton
លោកអគ្គលេខាធិការអង្គការសហប្រជាជាតិ បាន គីមូន បានចាត់ទុកវិបតិ្តនយោបាយនៅកូដឌីវ័ររយៈពេល ៤ខែកន្លងទៅនេះថា ជារយៈពេលមួយដែលមិនគួរមានទេ និងបានអំពាវនាវឲ្យលោកប្រធានាធីបតីវ៉ាត់តារ៉ាចៀសវាងការបង្ហូរឈាមជាថ្មី និងឲ្យបញ្ឈប់រាល់ការសងសឹករវាងគ្នា។ ដូច្នេះមានកិច្ចការជាច្រើន និងយ៉ាងលំបាកដែលលោកវ៉ាត់តារ៉ាត្រូវធ្វើ មុនគេ គឺការរៀបចំសណ្តាប់ធ្នាប់សង្គមឡើងវិញ និងការបង្រួបបង្រួមប្រជាជនកូដឌីវ័រគ្រប់និន្នាការនយោបាយ។ សករាជលោកបាក់បូបានចប់ តែលោកបាក់បូត្រូវបានលោកវ៉ាត់តារ៉ាប្តឹងទៅតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ