អូតង់បានវាយប្រហារលើលំនៅឋានរបស់លោកកាដាហ្វី
នៅព្រឹកព្រលឹមស្រាងៗថ្ងៃចន្ទ ទី ២៥ មេសានេះ យន្តហោះចម្បំាងរបស់កងកម្លំាងអូតង់បានបើកការវាយប្រហារយ៉ាងខ្លំាង ទៅលើទីក្រុងទ្រីប៉ូលី។ រដ្ឋអំណាចលីប៊ីបានបរិហារអំពីការវាយប្រហាររបស់អូតង់ និងបានចាត់ទុកទង្វើនេះ ថាជាការប៉ុនប៉ងសម្លាប់លោកកាដាហ្វី។ សាក្សីជាច្រើនបានឃើញផ្សែងហ៊ុយទ្រលោមចេញពីតំបន់ Bab al-Aziziyah ដែលមានលំនៅឋានរបស់លោកកាដាហ្វីស្ថិតក្បែរនោះ។ ចំណែកអគារដែលលោកកាដាហ្វីធ្វើការក៏ត្រូវបានបំផ្លាញខ្ទេចខ្ទីអស់ ដែរ។
ចុះផ្សាយនៅថ្ងៃ៖
ស្តាប់ - ០១:៣៧
យ៉ាងហោចណាស់ មានសំឡេងផ្ទុះយ៉ាងខ្លំាងចំនួន ៣ដងត្រូវបានឮកាលពីរំលងអធ្រាត្រយប់មិញ និងដែលបានធ្វើឲ្យរង្គើជញ្ជំាងផ្ទះរបស់ប្រជាជនក្នុងទីក្រុងទ្រីប៉ូលី។ ក្នុងពេលជាមួយគ្នានោះ ទូរទស្សន៍ជាតិក៏បានសម្រេចផ្អាកការផ្សាយរបស់ខ្លួន ហើយមន្រ្តីរបស់រដ្ឋាភិបាលលីប៊ីបានពន្យល់ថា មកពីអគាររបស់គេទទួលរងការទម្លាក់គ្រាប់បែកពីកងកម្លំាងអូតង់។
ប៉ុន្មាននាទីក្រោយមក ទូរទស្សន៍ជាតិដដែលក៏បានផ្តើមផ្សព្វផ្សាយជាថ្មីនូវកម្មវិធីរបស់ខ្លួនដូចសព្វមួយដង រួមមាន រូបភាពដ៏រុងរឿងរបស់មនុស្សខ្លំាងកាដាហ្វី ព្រមទំាងសុន្ទរកថារបស់លោកកាដាហ្វីដែលបរិហារអំពីការឈ្លានពានរបស់ប្រទេសលោកខាងលិច។
យ៉ាងណាក៏ដោយ កងកម្លំាងអន្តរជាតិដឹកនំាដោយអង្គការអូតង់បាននិងកំពុងបន្តដាក់គំនាបជាអចិន្ត្រែយ៍ទៅលើរបបលោកកាដាហ្វី។ យប់មិញ គឺជាយប់ទី៣ហើយដែលកងកម្លំាងអូតង់បានធ្វើការទម្លាក់គ្រាប់បែកចំកណ្តាលបេះដូងទីក្រុងទ្រីប៉ូលី ដោយសំដៅលើចំណុចយុទ្ធសាស្រ្តនៃរបបកាដាហ្វីតែម្តង ដូចយ៉ាងបន្ទាយទាហាន និងអគាររដ្ឋបាល។
នៅរំលងអធ្រាត្រយប់មិញ អូតង់បានបំផ្លាញការិយាល័យរបស់កាដាហ្វីដែលស្ថិតនៅមិនឆ្ងាយប៉ុន្មានពីលំនៅឋានកាដាហ្វី។ គឺជាទីកន្លែងដែលមានការយាមកាម ការពារយ៉ាងម៉ឹងម៉ាត់ពីកងកម្លំាងរបស់កាដាហ្វី និងក៏ជាទីកន្លែងជួបជុំគ្នារៀងរាល់យប់របស់ក្រុមអ្នកគាំទ្រកាដាហ្វី។ អ្នកទទួលខុសត្រូវលីប៊ីម្នាក់បានឲ្យដឹងថា ការវាយប្រហារជាថ្មីរបស់កងកម្លំាងអូតង់បានបណ្តាលឲ្យមានមនុស្សត្រូវរបួសចំនួន ៤៥នាក់ ក្នុងនោះរបួសធ្ងន់ ១៥នាក់។ ទន្ទឹមគ្នានេះ រដ្ឋអំណាចលីប៊ីក៏បានលើកឡើងពីការប៉ុនប៉ងសម្លាប់កាដាហ្វីពីសំណាក់កម្លំាងអូតង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ