ភេរវកម្មនៅទីក្រុងម៉ារ៉ាកេស្ហនៃប្រទេសម៉ារ៉ុក
ភេរវកម្មដ៏សាហាវមួយបានកើតមាននៅថ្ងៃព្រហស្បតិ៍ទី២៨មេសាឆ្នាំ២០១១ នៅពេលថ្ងៃត្រង់នៅក្នុងហាងកាហ្វេមួយឈ្មោះArgana ឋិតនៅទីលានJemaa el-Fna ដែលជាបេះដូងនៃទីកន្លែងទេសចរនៅទីក្រុងម៉ារ៉ាកេស្ហ។ តុល្យការជាផ្លូវការបានឲ្យដឹងថា មានជនរងគ្រោះស្លាប់១៦នាក់ដែលក្នុងនោះមានជនជាតិបារាំងផងដែរ។ នេះពិតជាភេរវកម្មមួយដ៏សែនសាហាវពុំដែលកើតមាននៅប្រទេសម៉ារ៉ុក ចាប់តាំងពីមានភេរវកម្មរបស់ពួកអ៊ីស្លាមនិយមជ្រុលនៅឆ្នាំ២០០៣នៅ ទីក្រុងកាហ្សាប្លងការួចមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
រហូតដល់ពេលយប់ជ្រៅនៃថ្ងៃព្រហស្បតិ៍ឆ្លងមកថ្ងៃសុក្រ គេបានកត់សម្គាល់ឃើញមានប្រជាជនម៉ារ៉ុកជាច្រើនបាននាំគ្នាមកប្រជ្រៀតមើលទីកន្លែងដែលមានអំពើភេរវកម្មដ៏សែនសាហាវ។ ដំបូលហើយនិងជាន់ទីមួយនៃហាងកាហ្វេArgana បានត្រូវរលំបាក់បែកកំទេចដោយគ្រាប់បែកផ្ទុះ។ ស្នូរសំឡេងផ្ទុះបានលាន់ឮរហូតដល់ចម្ងាយប្រមាណពីរគីឡូម៉ែត្រពី ទីលានJemaa el-Fna ដែលជាបេះដូងនៃទីកន្លែងទេសចរនៅទីក្រុងម៉ារ៉ាកេស្ហ ដែលក្នុងមួយថ្ងៃៗមានភ្ញៀវទេសចររាប់ពាន់នាក់មកលេងកំសាន្ត។
មកទល់ពេលនេះ គេនៅពុំទាន់ដឹងនៅឡើយថា តើនរណាជាអ្នកបញ្ជាឲ្យដាក់គ្រាប់បែកផ្ទុះនៅក្នុងហាងកាហ្វេឈ្មោះArgana ឋិតនៅទីលានJemaa el-Fna។ ទាំងនេះ ក៏ហេតុតែគ្មានទាន់មានក្រុមណាចេញមុខប្រកាសទាមទារថាខ្លួនជាអ្នកទទួលខុសត្រូវនៃទង្វើភេរកម្ម នៅក្នុងហាងកាហ្វេឈ្មោះArgana ហើយតើដើម្បីបុព្វហេតុអ្វី?
អាជ្ញាធរម៉ារ៉ុកនៅតែបន្តធ្វើការអង្កេតទៅលើការសន្និដ្ឋានពីរ៖
ទី១-ការផ្ទុះកើតចេញពីសាក់កាដូមួយដែលបង្កប់ពេញទៅដោយគ្រឿងផ្ទុះ ដែលគេបានយកមកដាក់នៅក្នុងហាងកាហ្វេ។
ទី២-ការផ្ទុះបង្កឡើងដោយទង្វើរបស់ភេរវជនអត្តឃាត។
បច្ចុប្បន្ននេះ គេនៅពុំទាន់ដឹងនៅឡើយពីធាតុពិតនៃគ្រឿងផ្ទុះ។ ក៏ប៉ុន្តែវេជ្ជបណ្ឌិតម្នាក់នៃមន្ទីរពេទ្យនៅទីក្រុងម៉ារ៉ាកេស្ហបានថ្លែងប្រាប់ថា គេឃើញមានស្លាកស្នាមនៅលើរូបកាយនៃអ្នករបួសជាច្រើននាក់ដូចស្លាកស្នាមដែលបង្កឡើងដោយ “ដែកគោល”។ ទាំងនេះ ធ្វើឲ្យគេសន្និដ្ឋានថា ជាស្នាដៃរបស់គ្រាប់បែកច្នៃ។ ហើយគេសង្ស័យថា ពួកអាល់កៃដាជាអ្នកនៅពីក្រោយអំពើភេរវកម្មដ៏ហិង្សានេះ។
ព័ត៌មានដែលទទួលបានពីទីលានjemaa el-Fna បានធ្វើឲ្យប្រជាជនម៉ារ៉ុកកើតមានក្តីបារម្ភយ៉ាងខ្លាំង។ ពួកគេព្រួយបារម្ភខ្លាចក្រែងអំពើភេរវកម្មដ៏ហិង្សានៅទីក្រុងម៉ារ៉ាកេស្ហនេះ ធ្វើឲ្យប៉ះពាល់ដល់សកម្មភាពទេចរណ៍។ សូមបញ្ជាក់ថា វិស័យទេសចរណ៍ជាវិស័យមួយដ៏សែនសំខាន់សម្រាប់ជួយទ្រទ្រង់សេដ្ឋកិច្ចនៃប្រទេសម៉ារ៉ុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ