ប្រតិបត្តិការតាមចាប់កាដាហ្វីកំពុងបន្ត ?
តើកាដាហ្វីកំពុងស្ថិតនៅទីណា ? នៅក្នុងក្នុងប្រទេសលីប៊ី ឬមួយក៏បានចាកចេញពីប្រទេសកំណើតបាត់ទៅហើយ ?។ ទំាងនេះសុទ្ធសឹងជាសំណួរដែលនៅមិនទាន់មានចម្លើយជាក់ច្បាស់នៅឡើយទេ។ ក្នុងពេលជាមួយគ្នានេះ នៅក្នុងសារសំឡេងមួយផ្សាយដោយទូរទស្សន៍មួយនៅក្នុងប្រទេសស៊ីរី កាដាហ្វីបានអំពាវនាវឲ្យក្រុមអ្នកគំាទ្រខ្លួនបន្តប្រឆំាងនឹងក្រុមបះបោរ និងថា អង្គការអូតង់នឹងទទួលបរាជ័យនាពេលឆាប់ៗខាងមុខ។ រីឯពាក្យចចាមអារ៉ាមជុំវិញវត្តមានរបស់កាដាហ្វីនៅក្នុងប្រទេសនីហ្សេ ឬនៅក្នុងប្រទេសផ្សេងនោះ កាដាហ្វីបានបរិហារលើព័ត៌មាននេះ និងចាត់ទុកថា ជាសង្រ្គាមចិត្តសាស្រ្ត។
ចុះផ្សាយនៅថ្ងៃ៖
ស្តាប់ - ០១:៥២
ចាប់កាដាហ្វីទំាងរស់ ឬមួយក៏សម្លាប់ចោល នេះហើយជាគោលដៅរបស់ក្រុមអ្នកប្រឆំាងកាដាហ្វី។ ប៉ុន្តែអាទិភាពមុនគេនោះ គឺត្រូវស្វែងរកទីតំាងដែលកាដាហ្វីកំពុងលាក់ខ្លួន ពិសេស តើនៅពេលនេះ កាដាហ្វីកំពុងស្ថិតនៅក្នុងប្រទេសលីប៊ី ឬមួយក៏បានចាកចេញពីលីប៊ីបាត់ទៅហើយ ?
ក្រុមអ្នកគំាទ្រកាដាហ្វីបានបញ្ជាក់ម្តងហើយ ម្តងទៀតថា កាដាហ្វីមិនបានរត់ចោលស្រុកដូចដែលព័ត៌មានបានចុះផ្សាយកន្លងមកទេ។ ចំណែកសហរដ្ឋអាមេរិកវិញក៏បានយល់ស្របដូចគ្នានេះដែរ។ ក្រសួងការបរទេសអាមេរិកបានអះអាងជាជាលើកទីមួយថា គេគ្មានភស្តុតាងណាមួយដែលបញ្ជាក់ពីការរត់ភៀសខ្លួនរបស់កាដាហ្វីទេ។ អ៊ីចឹងសួរថា តើកាដាហ្វីកំពុងលាក់ខ្លួននៅទីណា ?
បើយោងតាមក្រុមប្រឹក្សាជាតិលីប៊ី កាដាហ្វីប្រហែលជាកំពុងពួនសំងំនៅក្នុងស្រុក Bani Walid ស្ថិតចម្ងាយប្រមាណជា ១៧០គីឡូម៉ែត្រពីទីក្រុងទ្រីប៉ូលី។ ស្រុក Bani Walid គឺជាដែនអំណាចដែលកំពុងកាន់កាប់ដោយកងកម្លំាងរបស់កាដាហ្វី តែកំពុងឡោមព័ទ្ធដោយក្រុមអ្នកប្រឆំាងកាដាហ្វី និងត្រូវពួកគេគ្រោងនឹងបើកការវាយប្រហារនាពេលឆាប់ៗខាងមុខ។ ក្រៅពីស្រុក Bani Walid កាដាហ្វីក៏អាចលាក់ខ្លួននៅស្រុក Sebha ដែលស្ថិតនៅប៉ែកកណ្តាលប្រទេស និងដែលកំពុងគ្រប់គ្រងដោយក្រុមកុលសម្ព័ន្ធគំាទ្រកាដាហ្វី។ អ្វីជាការកត់សម្គាល់ ផ្លូវឆ្លងកាត់ស្រុក Sebha នេះក៏នឹងអាចនំាឆ្ពោះទៅកាន់ប្រទេសនីហ្សេ និងអាល់យេរីដែរ។ ប្រទេសអាល់យេរីដែលមានសមាជិកគ្រួសាររបស់កាដាហ្វីជាច្រើននាក់បានរត់ភៀសខ្លួនទៅជ្រកកោននៅទីនោះ តែមិនមានរូបកាដាហ្វីទេ នេះជាការអះអាងរបស់រដ្ឋាភិបាលអាល់ហ្សេរី។
ចំណែកនៅក្នុងប្រទេសនីហ្សេវិញ មានមន្រ្តីរបស់កាដាហ្វីជាច្រើននាក់បានរត់ទៅជ្រកកោននៅទីនោះ។ តើអាចមានរូបកាដាហ្វីដែរ ឬទេ ?
ត្រង់ចំណុចនេះ ទីក្រុងនីញ៉ាមេបានឆ្លើយបដិសេធភ្លាមៗដោយបញ្ជាក់ថា វត្តមានរបស់កាដាហ្វីលើដែនដីរបស់ខ្លួននឹងអាចបង្កឲ្យមានបញ្ហា។ ជំហររបស់ប្រទេសនីហ្សេពេលនេះក៏មិនខុសពីជំហររបស់ប្រទេសបួគីណាហ្វាសូ និង ឆាដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ