ក្រុមប្រឹក្សាជាតិអន្តរកាលលីប៊ីទទួលស្គាល់ការខាតបង់ធ្ងន់ធ្ងរក្នុងជួរទ័ពខ្លួន
បន្ទាប់ពីបានបើកការវាយប្រហារយ៉ាងធំធេងនៅ SYRTE នៅថ្ងៃសុក្រទី៧តុលាមក កងកម្លាំងបដិវត្តន៍លីប៊ី បានបន្តប្រតិបត្តិការសឹករបស់ខ្លួននៅគ្រប់ច្រកល្ហកនៃទីក្រុង SYRTE នៅម្សិលមិញនិងថ្ងៃអាទិត្យទី៩តុលានេះ។ SYRTE ដែលជាស្រុកកំណើតនិងជាតំបន់ការពារចុងក្រោយរបស់កងទ័ព គាំទ្រលោកកាដាហ្វីនិងកំពុងធ្លាក់ក្នុងភ្លើងសង្គ្រាម។ការវាយរុលទៅមុខនៅតំបន់Syrteនេះ ធ្វើដោយសន្សឹមៗនិងប្រកបដោយគ្រោះថ្នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ទីក្រុង Syrte ដែលស្ថិតនៅចម្ងាយ ៤០០គម ប៉ែកអាគ្នេយ៍នៃទីក្រុង Tripoli គឺជាទីក្រុងដ៏សំខាន់មួយចុងក្រោយគេដែលស្ថិតនៅក្នុងកណ្តាប់ដៃរបស់បក្សព័ន្ធគាំទ្រកាដាហ្វីនៅឡើយ បន្ទាប់ពីទីក្រុង Tripoli បានធ្លាក់នៅចុងខែសីហាកន្លងទៅ ដែលបានបិទបញ្ចប់ជាស្ថាពរ ការក្តោបក្តាប់អំណាចផ្តាច់ការ របស់កាដាហ្វីនៅលីប៊ីអស់រយៈពេល ៤២ឆ្នាំ។
កងទ័ពបដិវត្តន៍លីប៊ី បានវាយរុលទៅមុខជិតទៅដល់ទីជម្រកចុងក្រោយនៃទ័ពកាដាហ្វី ដែលពួនលាក់ខ្លួននៅក្នុងសង្កាត់នៃមជ្ឈមណ្ឌលសន្និសីទ Ouagadougou និងទីលានបៃតង ចំកណ្តាលក្រុងSyrte។
អស់រយៈពេល៣សប្តាហ៍មកហើយ ដែលទ័ពបដិវត្តន៍លីប៊ី បានធ្វើការឡោមព័ទ្ធទីក្រុង Syrte ក្នុងគោលដៅ ធ្វើយ៉ាងណាដើម្បីចៀសវាងកុំឲ្យប៉ះពាល់ដល់ជីវិតប្រជាជនស៊ីវិល ។ ពួកគេបានវាយលុកទៅលើ ទីក្រុងឆ្នេរសមុទ្រនេះ នៅគ្រប់ទិស តាំងពីទិសខាងលិច រហូតដល់ខាងកើត និងទៅដល់ខាងត្បូងទៀត ។ ចំណែកប្រជាជនលីប៊ីដែលរត់ភៀសខ្លួនចេញពីការវាយប្រយុទ្ធគ្នានៅទីក្រុង Syrte បាននិយាយប្រាប់ថា ឥឡូវនេះ ពួកគេគ្មានទាំងទឹក-ភ្លើង និង អាហារទទួលទានទេនៅក្នុងទីក្រុង។
នៅថ្ងៃអាទិត្យ៩តុលានេះ ទ័ពបដិវត្តន៍លីប៊ី ទើបវាយដណ្តើមយកបានសាកលវិទ្យាល័យ នៃទីក្រុង Syrte ដែលជាទីជម្រកតស៊ូដ៏ចម្បងរបស់ទ័ពកាដាហ្វីនៅភាគអាគ្នេយ៍នៃទីក្រុង។ នេះ ជាការបញ្ជាក់របស់អ្នកកាសែតAFPម្នាក់នៅថ្ងៃអាទិត្យ៩តុលានេះ។
ចំណែក មេបញ្ជាការម្នាក់នៃ ក្រុមប្រឹក្សាជាតិអន្តរកាលលីប៊ីវិញ បាននិយាយថា ការវាយប្រហារគ្នា បានប្រព្រឹត្តទៅដោយលំបាកខ្លាំងណាស់ ដោយហេតុតែពួកអ្នកពួនស្ទាក់ចាំបាញ់ មានគ្នាច្រើន ។ ការប្រយុទ្ធតស៊ូយ៉ាងមានះ របស់ទាហានកាដាហ្វី នេះ ប្រហែលជាធ្វើដោយក្តីអស់សង្ឃឹម ក៏ប៉ុន្តែយ៉ាងកាចសាហាវបំផុតដែលបានបណ្តាលឲ្យមានអ្នកស្លាប់និងរបួសជាច្រើននាក់នៅខាងកងទ័ពបដិវត្តន៍លីប៊ី។
នៅព្រឹកថ្ងៃអាទិត្យនេះ ការវាយប្រយុទ្ធគ្នា បានបន្តទៀត ជាពិសេសនៅម្តុំជុំវិញ មជ្ឈមណ្ឌលសន្និសីទ Ougadougou ដែលជាអគារដ៏ធំសម្បើមមួយ ស្ថិតនៅជិតប៉ែក ពាយ័ព្យនៃសាកលវិទ្យាល័យ ដែលស្ថិតនៅតាមបណ្តោយមហារុក្ខវិថីមួយនៅចំកណ្តាលក្រុងSyrte៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ