ប្រធានាធិបតីបារាំង និងប្រមុខរដ្ឋាភិបាលអង់គ្លេស នៅលីប៊ី
លោក នីកូឡា សាកូហ្ស៊ី (Nicolas Sarkozy) និងលោក ដេវីត កាមឺរោន (David Cameron) គឺជាប្រមុខរដ្ឋ និងរដ្ឋាភិបាលពីរដំបូងគេបង្អស់ ដែលអញ្ជើញទៅបំពេញទស្សនកិច្ច នៅក្នុងប្រទេសលីប៊ី ក្រោយពីរបបដឹកនាំផ្តាច់ការរបស់កាដាហ្វីដួលរលំ និងធ្លាក់ពីអំណាច។ ដំណើរទស្សនកិច្ចទៅកាន់រដ្ឋធានីទ្រីប៉ូលី និងទីក្រុងប៊ិនហ្កាហ្ស៊ី ដែលជាទីកំណើតនៃការបះបោរ ស្ថិតក្រោមការការពារសុវត្ថិភាពយ៉ាងតឹងតែងបំផុត។ ប៉ូលិសបារាំងប្រមាណ១៦០នាក់ ផ្នែករក្សាសន្តិសុខឥស្សរជនជាន់ខ្ពស់ និងប្រយុទ្ធ បានទៅឈរជើងការពាររួចជាស្រេច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
តាំងពីបីបួនថ្ងៃមុនម្ល៉េះ ដែលកេបានឃើញប៉ូលិសបារាំង នៅពេញសណ្ឋាគារដ៏ប្រណិត នាទីក្រុងទ្រីប៉ូលី។ កងរក្សាសន្តិសុខឲ្យឥស្សរជនជាន់ខ្ពស់ទាំងជាង១៦០នាក់នេះ គ្មានទម្លាប់ចេញធ្វើបេសកកម្មនៅក្រៅប្រទេសទេ ប៉ុន្តែពេលនេះ វាទំនងជាដំណោះស្រាយតែមួយគត់ ព្រោះលីប៊ីថ្មី គ្មានប៉ូលិស មានតែកងកម្លាំងទ័ពជាពួកឧទ្ទាម គ្មានបទពិសោធន៍ផ្នែកការពារសន្តិសុខថ្នាក់ដឹកនាំជាន់ខ្ពស់ឡើយ។
ការប្រយុទ្ធគ្នានៅក្រុងទ្រីប៉ូលី បានស្ងប់ស្ងាត់ជាងបីសប្តាហ៍ហើយ ប៉ុន្តែសង្គ្រាមមិនទាន់បញ្ចប់ទេ។ ប្រជាជនមានអាវុធស្ទើរគ្រប់ដៃ ដូច្នេះការរក្សាសុវត្ថិភាព និងសន្តិសុខត្រូវហ្មត់ចត់មិនអាចប្រហែសប្រហោងបានឡើយ។
អ្នកយកព័ត៌មានទាំងឡាយត្រូវបានអញ្ជើញឲ្យមកប្រមូលផ្តុំគ្នា យកការណ៍នៅមុខសណ្ឋាគារមួយ ដែលព័ទ្ធជុំជិតទៅដោយទាហាន និងប៉ូលិសបារាំង និងមិនត្រូវអនុញ្ញាតឲ្យចូលទៅកៀកព្រលានយន្តហោះឡើយ។
លោកប្រធានាធិបតីបារាំង បានទៅដល់ក្រុងទ្រីប៉ូលី នៅវេលាម៉ោង ១១ព្រឹកមិញនេះ។ ប៉ុន្មាននាទីក្រោយមក លោក នីកូឡា សាកូហ្ស៊ី និងប្រមុខដឹកនាំក្រុមប្រឹក្សាជាតិអន្តរកាល CNT បានថ្លែងសុន្ទរកថារួមគ្នា នៅចំពោះអ្នកសារព័ត៌មាន។ ចំណែកសន្និសីទកាសែតរួមរវាងលោកប្រធានាធិបតីបារាំង និងលោកនាយករដ្ឋមន្ត្រីអង់គ្លេស ជាមួយតំណាងជាន់ខ្ពស់ក្រុមប្រឹក្សាអន្តរកាលលីប៊ី ត្រូវបានរៀបចំឡើងជាបន្តបន្ទាប់។
ទស្សនកិច្ចរបស់ប្រមុខដឹកនាំទាំងពីរ ក្នុងពេលលីប៊ីកំពុងឆ្លងកាត់ដំណាក់កាលអន្តរកាលបែបនេះ គឺជាការផ្តល់កម្លាំងចិត្តបន្ថែមទៀតដល់CNT ក្នុងការកសាងលីប៊ីថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ