ក្រុមជីហាដរដ្ឋអ៊ីស្លាមនៅលីប៊ី អារកសម្លាប់មនុស្ស ចំនួន១២នាក់
តាមប្រភពព័ត៌មានផ្លូវការ ពីប្រទេសលីប៊ី ក្រុមជីហាដរដ្ឋអ៊ីស្លាម ដែលមានបណ្តាញនៅលីប៊ី បានសម្លាប់អារក ក្រុមកម្លាំងប្រយុទ្ធដើម្បីរំដោះតំបន់សៀរត៍ ភាគខាងជើងលីប៊ី ចំនួន១២នាក់។ ការប្រយុទ្ធដណ្តើមគ្នាកាន់កាប់ តំបន់នេះ រវាងក្រុមកំលាំងប្រជាការពារ ជាមួយនឹងក្រុមជីហាដអង្គការរដ្ឋអ៊ីស្លាម បាននិងកំពុងបន្ត យ៉ាងក្តៅគគុក ដោយគ្មាននរណាអើរពើទាល់តែសោះ។ មិនយូរមិនឆាប់ តំបន់នេះ ប្រាកដជាធ្លាក់ ទៅក្នុងកណ្តាប់ដៃរបស់ក្រុមជីហាដអង្គការរដ្ឋអ៊ីស្លាម ជាក់ជាមិនខាន។
ចុះផ្សាយនៅថ្ងៃ៖
ស្តាប់ - ០២:០៥
យោងតាមការរាយការណ៍ របស់ទីភ្នាក់ងារព័ត៌មាន LANA ដែលប្រចាំការនៅលីប៊ី បានរាយការណ៍ថា យ៉ាងហោចណាស់ មានកងកម្លាំងប្រជាតស៊ូលីប៊ី ចំនួន១២នាក់ត្រូវបានក្រុមជីហាដអង្គការរដ្ឋអ៊ីស្លាម សម្លាប់ចោល ហើយអារកផ្តាច់យកទៅដោតនឹងឈើឆ្កាង។ហេតុការណ៍នេះ បានកើតឡើងនៅ ក្នុងក្រុង សៀរត៍(Syrte)ភាគខាងជើងប្រទេសលីប៊ី ជាទីដែលមានការប្រយុទ្ធតស៊ូ រវាងប្រជាជនលីប៊ី និងក្រុមជីហាដអង្គការរដ្ឋអ៊ីស្លាម អស់រយៈពេល៤ថ្ងៃមកហើយ។ ប្រភពព័ត៌មានដដែល ក៏បានរាយការណ៍ផងដែរថា ក្រុមជីហាដ បានចូលទៅសម្លាប់ កម្លាំងតស៊ូដែលសម្រាកព្យាបាលនៅក្នុងមន្ទីរពេទ្យ ចំនួន២២នាក់ផ្សេងទៀត។
គេមិនទាន់មានតួលេខ ពីចំនួនជនរងគ្រោះទាំងអស់ ឲ្យច្បាស់លាស់នោះទេ ប៉ុន្តែបើតាមប្រសាសន៍របស់លោក Chibani Abouhamoud អគ្គរដ្ឋទូតលីប៊ី ប្រចាំនៅទីក្រុងប៉ារីស បានបញ្ជាក់ប្រាប់ថា មានមនុស្សស្លាប់ចន្លោះពី ១៥០ ទៅ២០០នាក់ ក្នុងរយៈពេល៤ថ្ងៃកន្លងមកនេះ។ ការប្រយុទ្ធ ដែលបើយោងតាមប្រភពព័ត៌មានជាច្រើន ថា ជាសមរភូមិសង្រ្គាមយ៉ាងសាហាវ ប៉ុន្តែលោកអគ្គរដ្ឋទូតរូបនេះ បានអះអាងថា វាគ្រាន់តែជាការប៉ះទង្គិចប្រដាប់អាវុធតែប៉ុណ្ណោះ។
សូមបញ្ជាក់ថា ការងើបប្រយុទ្ធតស៊ូរបស់ប្រជាជនលីប៊ី នៅតំបន់សៀរត៍ គឺក្រោយពេលដែលក្រុមជីហាដ អង្គការរដ្ឋអ៊ីស្លាម បានធ្វើឃាត ប្រមុខដឹកនាំសាសនាអ៊ីស្លាមដ៏សំខាន់ម្នាក់ នៅក្នុងតំបន់នេះ។ សមាគមសាសនាអ៊ីស្លាម Dar Al Iftaa បានអំពាវនាវឲ្យប្រជាជនលីប៊ី ងើបឈរឡើង កាន់អាវុធប្រឆាំងតទល់ នឹងក្រុមជីហាដអង្គការរដ្ឋអ៊ីស្លាម ដោយថ្កោលទោសក្រុមជីហាដដ៏ព្រៃផ្សៃនេះ ថាជាអ្នកកំពុងបំផ្លាញសាសនាអ៊ីស្លាម។
វិបត្តិនយោបាយនៅលីប៊ី បន្ទាប់ពីមានរដ្ឋប្រហារ ទំលាក់មេដឹកនាំផ្តាច់ការ កាដាហ្វី បានធ្វើឲ្យលីប៊ី បែករហែកជាពីរ ដែលបច្ចុប្បន្នគ្រប់គ្រងដោយរដ្ឋាភិបាលពីរផ្សេងគ្នា។ ក្រុមជីហាដអង្គការរដ្ឋអ៊ីស្លាម បានឆក់យកឱកាស ដែលប្រជាជាតិលីប៊ី បែកបាក់គ្នា មានភាពទន់ខ្សោយ គ្មានការដឹកនាំច្បាស់លាស់ ដើម្បីវាយប្រហារ ដណ្តើមគ្រប់គ្រងដែនដីម្តងបន្តិចៗ ព្រមទាំងបានអូសទាញយុវជនលីប៊ី ជាច្រើនយកទៅបំរើក្រុមពួកវា។ រដ្ឋាភិបាលលីប៊ីប្រចាំក្រុងទ្រីប៉ូលី បានប្រកាសថា បានចេញប្រតិបត្តិការ វាយប្រហារតាមផ្លូវអាកាស ទៅលើក្រុមជីហាដ ដើម្បីរំដោះតំបន់សៀរត៍ ដោយមានការចូលរួម ពីកម្លាំងយុវជនមូលដ្ឋានផងដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ