អន្តរការីអង្គការសហប្រជាជាតិទៅយេម៉ែន ដើម្បីចរចាបញ្ចៀសជម្លោះប្រដាប់អាវុធ
លោក លោក ម៉ាតាំង ហ្គីហ្វីត Martin Griffiths អន្តរការីអង្គការសហប្រជាជាតិទទួលបន្ទុកកិច្ចការយេម៉ែន បានធ្វើដំណើរទៅដល់ក្រុងសាណា នៅថ្ងៃសៅរ៍ទី១៦ មិថុនានេះ ដើម្បីមានជំនួបចរចាជាបន្ទាន់ជាមួយពួកឧទ្ទាមហ៊ូទី ស្តីពីប្រតិបត្តិការនៅក្រុងកំពង់ផែ ហូដីដា។ តំបន់យុទ្ធសាស្ត្រហូដីដា កាន់កាប់ដោយពួកឧទ្ទាម តែត្រូវកងកម្លាំងប្រធានាធិបតីនិរទេសព្រមទាំងសម្ព័ន្ធអន្តរជាតិអារ៉ាប់ បើកវាយប្រហាររំដោះតាំងពីថ្ងៃពុធមក។
ចុះផ្សាយនៅថ្ងៃ៖
លោក ម៉ាតាំង ហ្គីហ្វីត មិនបានធ្វើសេចក្តីថ្លែងការណ៍អ្វីទាំងអស់ នៅពេលអញ្ជើញទៅដល់ប្រទេសយេម៉ែន ប៉ុន្តែបើតាមអ្នកឆ្លើយឆ្លងព័ត៌មានរបស់ទីភ្នាក់ងារព័ត៌មានបារាំង AFP អន្តរការីអង្គការសហប្រជាជាតិ បានធ្វើសំណើទៅកាន់ពួកឧទ្ទាមហ៊ូទី ដែលជាអ្នកកាន់កាប់រដ្ឋធានីសាណារដ្ឋធានីរបស់យេម៉ែន និងតំបន់ភាគខាងជើងប្រទេស ឱ្យបង្វែរការគ្រប់គ្រងតំបន់ហូដីដា មកឱ្យគណៈកម្មការត្រួតពិនិត្យអង្គការសហប្រជាជាតិ។ សំណើបែបនេះ គឺ ដើម្បីបញ្ចៀសការប្រយុទ្ធគ្នាដោយអាវុធ។
ដោយមានជំនួយពីសម្ព័ន្ធអារ៉ាប់ កងកម្លាំងប្រដាប់អាវុធរបស់រដ្ឋាភិបាលនិរទេសយេម៉ែន បានបើកប្រតិបត្តិការទ្រង់ទ្រាយធំ វាយលុកលើតំបន់យុទ្ធសាស្ត្រហូដីដា ដែលតាំងពីថ្ងៃពុធទី ១៣មិថុនាបានធ្វើឱ្យស្លាប់មនុស្សប្រមាណ១៤០នាក់ ក្នុង១១៨នាក់ជាខាងពួកឧទ្ទាម និង២១នាក់ជាទាហានយេម៉ែន (នេះបើតាមប្រភពគ្រូពេទ្យ)។
ទាហានយេម៉ែន បានប្រកាសកាលពីព្រឹកថ្ងៃសៅរ៍ថារំដោះបានអាកាសយានដ្ឋានហូដីដា ដែលបិទទ្វារតាំងពីឆ្នាំ២០១៤មក ប៉ុន្តែគ្មានប្រភពណាអាចបញ្ជាក់ព័ត៌មាននេះទេ។ ចំណែកឯអ្នកនាំពាក្យសម្ព័ន្ធអារ៉ាប់ ក៏បដិសេធមិនឆ្លើយនឹងសំណួររបស់ទីភ្នាក់ងារព័ត៌មានយើងដែរ។ គេគ្រាន់តែដឹងថាកាលពីថ្ងៃសុក្រ ទ័ពថ្មើរជើងយេម៉ែនបានរុលមកកាន់តែកៀកប្រមាណ២គីឡូម៉ែត្រពីព្រលានយន្តហោះ។
ប្រតិបត្តិការទ្រទ្រាយធំនេះ បានបង្កបង្កើតឱ្យមានក្តី ព្រួយបារម្ភយ៉ាងខ្លាំង ខ្លាចយេម៉ែនធ្លាក់ក្នុងវិបត្តិមនុស្សធម៌ធ្ងន់ធ្ងរខ្លាំងជាថ្មីទៀត ព្រោះហូដីដា ជាក្រុងកំពង់ផែដ៏ធំជាងគេប្រទេស និងជាច្រកចាំទទួលជំនួយមនុស្សធម៌ផ្សេងៗ។
មុននឹងធ្វើដំណើរមកកាន់សាណា អន្តរការីពិសេសអង្គការសហប្រជាជាតិ បានធ្វើការអំពាវនាវរួចម្តងហើយឱ្យគ្រប់ភាគីចេះអត់ធ្មត់និងជ្រើសរើសមធ្យោបាយបែបស្ថាបនា របស់អង្គការសហប្រជាជាតិ ព្រោះ គ្មានឡើយដំណោះស្រាយតាមផ្លូវយោធា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ