យេម៉ែន៖ការវាយប្រហារលើស្រុកហូដីដាកំពុងគំរាមកំហែងដល់ជំនួយមនុស្សធម៌
នៅក្នុងប្រទេសយេម៉ែន ថ្ងៃសុក្រ ទី១៥ មិថុនាជាថ្ងៃទី៣ ដែលកម្លាំងទ័ពរដ្ឋាភិបាលកំពុងបន្តបើកការវាយប្រហារដណ្តើមយកស្រុកហូដីដាពីកណ្តាប់ដៃពួកឧទ្ទាមហ៊ូទី្ស។ តួលេខផ្តល់ដោយក្រុមអ្នកជួយសង្រ្គោះឲ្យដឹងថា មានស្លាប់ពួកឧទ្ទាមចំនួន ១១៨នាក់គិតតាំងពីការវាយប្រហារថ្ងៃទី១ តែមិនបានលំអិតឲ្យច្បាស់នៃចំនួនមនុស្សស្លាប់របស់ភាគីម្ខាងៗទេ។ អ្វីជាក្តីបារម្ភនៅក្នុងយុទ្ធនាការសឹកនៅហូដីដាពេលនេះ គឺការប៉ះពាល់ដល់ដំណើរការដឹកជញ្ជូនជំនួយមនុស្សធម៌ ព្រោះហូដីដាជាស្រុកយុទ្ធសាស្រ្តដែលមានព្រលានយន្តហោះ និងកំពង់ផែ។
ចុះផ្សាយនៅថ្ងៃ៖
ស្តាប់ - ០២:០២
តាំងពីថ្ងៃពុធ ទី១៣ មិថុនាមកម្ល៉េះដែលកម្លាំងរដ្ឋាភិបាលបានបើកការវាយប្រហារលើស្រុកហូដីដាដែលកំពុងស្ថិតក្រោមការគ្រប់គ្រងរបស់ក្រុមឧទ្ទាមហ៊ូទី្ស។ តែទោះបីជាមានការគាំទ្រពីកម្លាំងទ័ពអារ៉ាប៊ីសាអូឌីត និងអេមីរ៉ាតអារ៉ាប់រួមក៏ដោយ ក៏ទ័ពរដ្ឋាភិបាលយេម៉ែនហាក់ពិបាកទប់ទល់នឹងការតស៊ូ ក្រាញននាលរបស់កម្លាំងឧទ្ទាមដែលមានការជួយគាំទ្រផ្លូវយោធាពីប្រទេសអ៊ីរ៉ង់។ តាមក្រុមអ្នកជួយសង្រ្គោះនៅលើសមរភូមិ ពួកឧទ្ទាមបានបាញ់សម្លាប់ទាហានរដ្ឋាភិបាលជាច្រើននាក់ដោយប្រើយុទ្ធសាស្រ្តវាយឆ្មក់ និងបាញ់ស៊ីប។
ប្រភពយោធារដ្ឋាភិបាលបានបញ្ជាក់ថា កម្លាំងទ័ពកំពុងត្រៀមជើងព្រួលផ្លូវគោកជាមួយនឹងជំនួយផ្លូវអាកាសពីកម្លាំងសម្ព័ន្ធមិត្តដើម្បីវាយប្រហារផ្តាច់ព័្រត្រយកស្រុកហូដីដា។ សូមជម្រាបជូនថា មានទីតាំងស្ថិតនៅលើច្រាំងនៃសមុទ្រក្រហម ហូដីដាជាស្រុកយុទ្ធសាស្រ្តដែលមានព្រលានយន្តហោះ និងកំពង់ផែ ហើយនៅទីនោះជាច្រកនៃការទទួលជំនួយមនុស្សធម៌សម្រាប់ជួយផ្គត់ផ្គង់ដល់ពលរដ្ឋយេម៉ែនដែលកំពុងជួបវិបត្តិមនុស្សធម៌ដ៏ធ្ងន់ធ្ងរជាងគេក្នុងលោក។ សង្រ្គាម គ្រោះអត់ឃ្លាន និងជំងឺផ្សេងៗបានបណ្តាលឲ្យមានមនុស្សស្លាប់ជិត ១០ ០០០នាក់ក្នុងរយៈពេល ៣ឆ្នាំកន្លងទៅ។
ក្រៅពីផ្តល់ផលវិបាកក្នុងការដឹកជញ្ជូនជំនួយមនុស្សធម៌ លោកស្រី Sarah Leah Whitson នាយិកាអង្គការសិទ្ធិមនុស្ស Human Rights Watch ទទួលបន្ទុកតំបន់មជ្ឈិមបូព៌ាក៏បានព្រមានថា ការវាយប្រហារលើស្រុកហូដីដាពេលនេះអាចនឹងធ្វើឲ្យប៉ះពាល់ដល់ជីវិតជនស៊ីវិលក្នុងស្រុកហូដីដា និងនៅកន្លែងផ្សេងទៀតក្នុងទឹកដីយេម៉ែន។ អ្វីជាការកត់សម្គាល់ ប្រតិបត្តិការសឹកលើស្រុកហូដីដាជាប្រតិបត្តិមួយដ៏សំខាន់គិតតាំងពីឆ្នាំ ២០១៥។ កន្លងមក ទ័ពរដ្ឋាភិបាលធ្លាប់វាយដណ្តើមបានតំបន់ជាច្រើននៅប៉ែកខាងត្បូង ពិសេសទីក្រុងអាដេនពីពួកឧទ្ទាមហ៊ូទី្ស។ ចំណែកនៅប៉ែកខាងជើងកំពុងបន្តស្ថិតក្នុងកណ្តាប់ពួកគេ រួមទាំងទីក្រុងសាណាផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ