ជំនួបកំពូលសហភាពអាហ្រ្វិក៖ភាពមិនចុះសម្រុងគ្នាក្នុងការបញ្ជូនកម្លាំងអាហ្រ្វិកទៅប៊ូរុនឌី
ជំនួបកំពូលសហភាពអាហ្រិ្វកលើកទី២៦ កំពុងបន្តធ្វើនៅក្នុងទីក្រុងអាឌីសអាបេបា ប្រទេសអេត្យូពី។ តែភាពមិនចុះសម្រុងគ្នាក្នុងសំណុំរឿងប្រទេសប៊ូរុនឌីកំពុងបន្តមាននៅក្នុងចំណោមប្រមុខរដ្ឋ និងប្រមុខរដ្ឋាភិបាលនៃសហភាពអាហ្រ្វិក។ ភាពមិនចុះសម្រុងគ្នា គឺទាក់ទងនឹងការបញ្ជូនកម្លាំងរក្សាសន្តិភាពអាហ្រ្វិកទៅកាន់ប្រទេសប៊ូរុនឌីដែលកំពុងធ្លាក់ក្នុងវិបត្តិនយោបាយយ៉ាងធ្ងន់ធ្ងរ។ លោកអគ្គលេខាធិការអង្គការសហប្រជាជាតិបាន គីមូនបានគាំទ្រគំនិតផ្តួចផ្តើមរបស់សហភាពអាហ្រ្វិក តែរដ្ឋាភិបាលនៃប្រទេសប៊ុរុនឌីបានបដិសេធមិនទទួលយកជាដាច់ខាត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ថ្លែងនៅក្នុងជំនួបកំពូលសហភាពអាហ្រ្វិកលើកទី២៦ ក្នុងទីក្រុងអាឌីសអាបេបា ប្រទេសអេត្យូពី លោកអគ្គលេខាធិការអង្គការសហប្រជាជាតិបាន គីមូនបានសម្តែងការគាំទ្រមិនរារែកចំពោះគំនិតផ្តួចផ្តើមរបស់សហភាពអាហ្រ្វិកក្នុងបេសកកម្មគាំពារ និងបង្ការ ព្រមទាំងការដាក់ពង្រាយក្រុមអ្នកសង្កេតការណ៍សិទ្ធិមនុស្សដែលសរុបមានគ្នា ៥ ០០០នាក់នៅក្នុងប្រទេសប៊ូរុនឌី។ លោកបាន គីមូនបានយល់ឃើញថា ស្ថានការណ៍នៅប៊ូរុនឌីសព្វថ្ងៃបានតម្រូវឲ្យមានការយកចិត្តដាក់ពិតប្រាកដ និងបន្ទាន់បំផុត។
សូមជម្រាបជូនថានៅក្នុងខែធ្នូ ឆ្នាំ ២០១៥ កន្លងទៅ ក្រុមប្រឹក្សាសន្តិភាព និងសន្តិសុខនៃសហភាពអាហ្រ្វិកបានព្រមព្រៀងគ្នាជាគោលការណ៍ក្នុងការដាក់ពង្រាយកម្លាំងរក្សាសន្តិភាពអាហ្រ្វិកចំនួន ៥ ០០០នាក់នៅក្នុងប្រទេសប៊ូរុនឌី។ បេសកកម្មរបស់កម្លាំងអាហ្រ្វិក គឺដើម្បីប្រឈមទប់នឹងចង្វាក់ហិង្សាប្រចាំថ្ងៃដែលគ្រប់គ្នាបារម្ភខ្លាចឆ្លងរីករាលដាលក្រោមទ្រង់ទ្រាយធំប្រែក្លាយជាទង្វើប្រល័យពូជសាសន៍ជាថ្មីដែលប៊ូរុនឌីធ្លាប់បានឆ្លងកាត់នាចន្លោះឆ្នាំ ១៩៩៣ និង ២០០៦។ សង្រ្គាមស៊ីវិលរយៈពេល ១៣ឆ្នាំដែលបានបណ្តាលឲ្យស្លាប់ប្រជាជនប៊ូរុនឌីចំនួន ៣០ម៉ឺននាក់។
វិបត្តិនយោបាយនៅប៊ូរុនឌីបានផ្ទុះជាថ្មីតាំងពីដំណាច់ខែមេសា ឆ្នាំ ២០១៥ ពោលតាំងពីក្រោយលោកប្រធានាធិបតីប៊ូរុនឌីគូរុនហ្ស៊ីហ្សាបានប្រកាសឈរឈ្មោះប្រធានាធិបតីសម្រាប់អាណត្តិទី៣។ អំពើហិង្សារយៈពេល ៩ខែកន្លងទៅបានបណ្តាលឲ្យមានមនុស្សស្លាប់ជាង ៤០០នាក់ និងអ្នកភៀសខ្លួនមិនតិចជាង ២៣ម៉ឺននាក់ទេ ភាគច្រើនជាសកម្មជនបក្សប្រឆាំង អ្នកកាសែត និងសកម្មជនសង្គមស៊ីវិល។
តែបញ្ហានៅត្រង់ថា ប្រមុខរដ្ឋ និងប្រមុខរដ្ឋាភិបាលនៃសហភាពអាហ្រ្វិកនៅមិនទាន់បានស្រុះស្រួលគ្នាក្នុងការបញ្ជូនកម្លាំងអាហ្រ្វិកទៅប៊ូរុនឌីនៅឡើយទេ។ ចំណែករដ្ឋាភិបាលប៊ូរុនឌីក៏មិនចង់ទទួលកម្លាំងរក្សាសន្តិភាពអាហ្រ្វិកនៅក្នុងទឹកដីរបស់ខ្លួនដែរ។ ថ្លែងនៅចំពោះមុខក្រុមអ្នកកាសែតនាឱកាសចូលរួមក្នុងជំនួបកំពូលសហភាពអាហ្រ្វិកក្នុងប្រទេសអេត្យូពី លោកប្រមុខការទូតប៊ូរុនឌីបានបញ្ជាក់ច្បាស់ៗថា គ្មានលក្ខខណ្ឌណាមួយដែលប៊ូរុនឌីត្រូវទទួលយកកម្លាំងរក្សាសន្តិភាពអាហ្រ្វិកទេ និងថា រដ្ឋាភិបាលមានសមត្ថភាពគ្រប់គ្រាន់ក្នុងដោះស្រាយបញ្ហាដោយខ្លួនឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ