តុលាការចាប់បើកសវនាការកាត់ទោសមេដឹកនាំចាស់របស់កូតឌីវ័រ
នៅប្រទេស កូតឌីវ័រវិញ តុលាការព្រហ្មទណ្ឌរបស់ប្រទេសបានបើកសវនាការនៅថ្ងៃសុក្រនេះ ដើម្បីជំនុំជម្រះទៅលើភរិយាអតីតប្រធានាធិបតីកូតឌីវ័រ គឺលោកស្រី Simone Gbagbo។ លោកស្រី Simone Gbagbo និងមនុស្ស៨២នាក់ ផ្សេងទៀតដែលធ្លាប់បម្រើការនៅក្នុងរបបចាស់ ដឹកនាំដោយលោកLaurent Gbagbo ត្រូវរងចោទប្រកាន់ពីបទធ្វើសកម្មភាពដែលប៉ះពាល់ដល់សន្តិសុខជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
លោកស្រី Simone Gbagbo ត្រូវបានចាប់ឃុំខ្លួន នៅក្នុងគេហដ្ឋាន នៅឆ្នាំ ២០១១។ លោកស្រីត្រូវអាជ្ញាធរកូតឌីវ័រចាត់ទុកជាមនុស្សជំនិតបំផុត និងជាអ្នកផ្តល់គំនិតប្រឹក្សាសំខាន់ដល់ស្វាមីលោកស្រី គឺលោក Laurent Gbagbo នៅក្នុងពេលធ្វើជាប្រធានាធិបតី កូតឌីវ័រ។ ទាំងអតីតប្រធានាធិបតីLaurent Ggagbo និងលោកស្រី Simone Gbagbo ព្រមទាំងសមាជិកជាន់ខ្ពស់របស់របបមុន ត្រូវបានអាជ្ញាធរចាប់ខ្លួន បន្ទាប់ពីមានអំពើហិង្សា នៅក្រោយការបោះឆ្នោត ដែលនៅក្នុងនោះ មនុស្សប្រមាណ៣ពាន់នាក់បានស្លាប់បាត់បង់ជីវិត។
សវនាការបើកនៅថ្ងៃសុក្រគ្រាន់តែធ្វើទៅតាមដំណើរនិតិវិធី ពោល គឺគេនឹងបង្ហាញមុខចៅក្រមថ្មី ៦នាក់ ដែលត្រូវទទួលបន្ទុកជំនុំជម្រះ បន្ទាប់ពីចៅក្រម៤នាក់បានដកខ្លួនចេញ។ តាមមេធាវីការពារក្តីរបស់លោកស្រី Simone Gbagbo តុលាការគ្មានភស្តុតាងគ្រប់គ្រាន់ ហើយ ការចោទប្រកាន់របស់តុលាការក៏មិនច្បាស់លាស់ទៅទៀត។ រហូតមកដល់ពេលនេះ តុលាការបានចោទលោកស្រី Simone Gbagbo និងអតីតមន្រ្តីរដ្ឋាភិបាលចាស់ ប្រមាណ ៨៣នាក់ ពីបទធ្វើឲ្យប៉ះពាល់ដល់សន្តិសុខជាតិ។ ប៉ុន្តែ មិនបានដាក់បន្ទុកពួកគេ ដូចដែលតុលាការព្រហ្មទណ្ឌអន្តរជាតិ CPIបានដាក់ទៅលើលោកអតីតប្រធានាធិបតីកូតឌីវ័រទេ។
លោកLaurent Gbagbo ដែលពេលនេះកំពុងជាប់ឃុំនៅទីក្រុងឡាអេ កំពុងរងចោទប្រកាន់ពីបទឧក្រិដ្ឋប្រឆាំងមនុស្សជាតិ សម្រាប់ការស្លាប់បាត់បង់ជីវិតរបស់មនុស្សរាប់ពាន់នាក់ នៅក្នុងអំពើហិង្សា កើតឡើងក្រោយការបោះឆ្នោត។ តុលាការ CPI ដែលមានមូលដ្ឋាននៅប្រទេសហូឡង់ បានទាមទារផងដែរ ឲ្យរដ្ឋាភិបាលកូតឌីវ័របញ្ជូនភរិយារបស់លោកLaurent Gbagbo គឺលោកស្រីSimone Ggagbo ដែលអាចប្រឈមនឹងបទចោទប្រកាន់ដូចប្តីរបស់លោកស្រី ទៅតុលាការ CPI។ នៅក្នុងលិខិតមួយសរសេរទៅកាន់រដ្ឋាភិបាលកូតឌីវ័រ ចៅក្រមរបស់តុលាការរបស់ CPIបានលើកឡើងថា ក្រៅតែបទស៊ើបអង្កេតដំណើរការទៅមុខដោយយឺតៗ បទចោទប្រកាន់ទៅលើលោកស្រី Simon Gbagbo ដោយតុលាការក្នុងស្រុក មានលក្ខណៈស្រពេចស្រពិល មិនច្បាស់លាស់។
ប៉ុន្តែ យ៉ាងណាក៏ដោយ តុលាការកូតឌីវ័រ បានបដិសេធមិនបញ្ជូនភរិយារបស់អតីតប្រធានាធិបតីទៅតុលាការ CPI និងថា ខ្លួនមានសមត្ថភាពអាចជំនុំជម្រះលើលោកស្រី និងបក្សពួក ដោយយុត្តធម៌ និងស្មើភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ