អតីតប្រធានាធិបតីកូតឌីវ័រត្រូវបានតុលាការព្រហ្មទណ្ឌអន្តរជាតិចោទប្រកាន់ជាផ្លូវការ
អ្នកនាំពាក្យរបស់តុលាការព្រហ្មទណ្ឌអន្តរជាតិ ដែលមានទីតាំងនៅទីក្រុងឡាអេ ប្រទេសហូឡង់ បានថ្លែងឲ្យដឹងថា តុលាការនេះបានសម្រេចធ្វើការចោទប្រកាន់ជាផ្លូវការ ទៅលើលោក ឡូរ៉ង់ត៍ បាក់បូ អតីតប្រធានាធិបតីប្រទេសកូតឌីវ័រ ពីបទឧក្រិដ្ឋកម្មប្រឆាំងនឹងមនុស្សជាតិ ដែលបានសម្លាប់មនុស្សប្រមាណជា៣០០០នាក់ ក្នុងការប្រទាញប្រទង់ដណ្តើមអំណាចដោយអំពើហិង្សា ក្រោយការបោះឆ្នោតកាលពី ខែវិច្ឆិកា ឆ្នាំ២០១០។
ចុះផ្សាយនៅថ្ងៃ៖
ស្តាប់ - ០១:៤២
ក្រោយពីបានធ្វើការសិក្សាលើសំណុំរឿង តុលាការព្រហ្មទណ្ឌអន្តរជាតិ បានសម្រេចជាផ្លូវការ ថានឹងធ្វើការចោទប្រកាន់ លើរូបលោកអតីតប្រធានាធិបតី ពីបទឧក្រិដ្ឋកម្មប្រឆាំងនឹងមនុស្សជាតិ។ តុលាការបានធ្វើការដាក់បន្ទុកចំនួនបួន លើរូបលោក បាក់បូ។ បទចោទប្រកាន់ទាំងនោះ បានចោទថា លោកបាក់បូ ព្រមទាំងក្រុមបក្សពួកខ្លួន បានបញ្ជា និងញុះញង់ក្រោមគ្រប់រូបភាពទាំងអស់ ឲ្យប្រព្រឹត្តិអំពើមនុស្សឃាតុ រំលោភសេពសន្ថវៈ អំពើអមនុស្ស និងតាមគំរាមកំហិតកំហែងមនុស្សដោយខុសច្បាប់។
ក្រុមមេធាវីការពារលោកបាក់បូ បានធ្វើបណ្តឹងទាស់ ដោយបានចោទបកទៅរដ្ឋអជ្ញាដែលបានស៊ើបអង្កេតសំណុំរឿងនេះ ថាបានរកតែភស្តុតាងដាក់បន្ទុក ហើយមិនបានរកភស្តុតាងផ្ទុយ បង្ហាញពីភាពស្អាតស្អំរបស់លោកបាក់បូទេ។ ទោះជាយ៉ាងណា បណ្តឹងទាស់នេះត្រូវបាន តុលាការព្រហ្មទណ្ឌអន្តរជាតិ ច្រានចោល ដោយបានលើកឡើងថា ភាគីចុងចោទមិនបានបញ្ជាក់ឲ្យបានច្បាស់ នូវចំនុចដែលបញ្ជាក់ថា រដ្ឋអជ្ញាមានការលម្អៀង។
សូមរំលឹកថា លោកឡូរ៉ង់ត៍ បាក់បូ ត្រូវបានគេសង្ស័យថា បានញុះញង់ឲ្យមានអំពើហិង្សា កាប់សម្លាប់ប្រជាជន ប្រមាណជា៣០០០នាក់ ក្រោយការបោះឆ្នោត ក្នុងខែវិច្ឆិកា ឆ្នាំ២០១០ នៅប្រទេសកូតឌីវ័រ។ ការបោះឆ្នោតដែលកាលនោះ លោកបាក់បូ បានទទូលបរាជ័យ។ ឡូរ៉ង់ត៍ បាក់បូ បានចោទប្រកាន់ប្រទេសបារាំង និងអង្គការសហប្រជាជាតិថាបានឃប់ឃិតគ្នាជាមួយលោក អ៊ូអាតារ៉ា ក្នុងការប្លន់អំណាចពីលោក។
បន្ទាប់ពីត្រូវបានចាប់ខ្លួននៅខែមេសាឆ្នាំ២០១១ លោក ឡូរ៉ង់ត៍ បាក់បូ ត្រូវបានបញ្ជូនទៅឃុំខ្លួន នៅតុលាការព្រហ្មទណ្ឌអន្តរជាតិ នៅក្រុងឡាអេ កាលពីខែវិច្ឆិកា ឆ្នាំដដែល។ បទចោទប្រកាន់ជាផ្លូវការនាពេលនេះ នឹងអនុញ្ញាតឲ្យ តុលាការព្រហ្មទណ្ឌអន្តរជាតិ បង្កើតអង្គជំនុំជំរះបឋមមួយ ដើម្បីបើកសាវនាការកាត់ទោសលោក ឡូរ៉ង់ត៍ បាក់បូ។ អ្នកនាំពាក្យតុលាការក៏បានបញ្ជាក់ផងដែរថា តុលាការព្រហ្មទណ្ឌអន្តរជាតិក៏មានភស្តុតាងដាក់បន្ទុកលើ ភរិយារបស់លោកបាក់បូ និង ជំនិតរបស់លោកបាក់បូម្នាក់ទៀតឈ្មោះ ប្លេហ្គូដេ ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ