លីប៊ី៖កូនប្រុសម្នាក់របស់កាដាហ្វី និងមនុស្សជំនិត ៨នាក់បានទទួលទោសប្រហារជីវិត
នៅក្នុងប្រទេសលីប៊ី ៤ឆ្នំាក្រោយការដួលរលំរបបផ្តាច់ការរបស់កាដាហ្វី កូនប្រុសម្នាក់របស់គាត់ឈ្មោះសេហ្វ អាល់អ៊ីស្លាម កាដាហ្វី រួមទំាងមនុស្សជំនិត ៨នាក់ទៀតទើបត្រូវបានតុលាការកាត់ទោសប្រហារជីវិតក្នុងថ្ងៃអង្គារ ទី២៨ កក្កដា។ សេហ្វ អាល់អ៊ីស្លាម កាដាហ្វីបានជាប់ចោទពីបទប្រើអំពើហិង្សាបង្រ្កាបយ៉ាងបង្ហូរឈាមលើហ្វូងបាតុករ។ អង្គការសហប្រជាជាតិ និងក្រុមអង្គការការពារសិទ្ធិមនុស្សបានសម្តែងការសោកស្តាយចំពោះការអនុវត្តន៍ទោសប្រហារជីវិត ព្រមទំាងបរិហារពីដំណើរការកាត់ក្តីដែលគ្មានសមធម៌។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
មានជនជាប់ចោទសរុបទំាងអស់ចំនួន ៣៦នាក់ ក្នុងនោះមានកូនប្រុសរបស់មេផ្តាច់ការ កាដាហ្វីម្នាក់ឈ្មោះសេហ្វ អាល់អ៊ីស្លាម កាដាហ្វីត្រូវបានតុលាការទីក្រុងទ្រីប៉ូលីកាត់ទោសពីបទប្រើអំពើហិង្សាវាយបង្រ្កាបយ៉ាងបង្ហូរឈាមលើហ្វូងបាតុករក្នុងឆ្នំា ២០១១។ ដំណើរការកាត់ទោសបានចំណាយពេលអស់ ១៦ខែ មុននឹងចេញសាលក្រមក្នុងថ្ងៃអង្គារ ទី២៨ កក្កដាដោយបានកាត់ទោសប្រហារជីវិតចំនួន ៩នាក់ គឺរូបសេហ្វ អាល់អ៊ីស្លាម កាដាហ្វី និងមនុស្សជំនិត ៨នាក់ទៀត។
ចាប់ខ្លួន និងឃុំខ្លួនតំាងពីឆ្នំា ២០១១ សេហ្វ អាល់អ៊ីស្លាម កាដាហ្វីមិនដែលបានចូលរួមដោយផ្ទាល់នៅក្នុងដំណើរការកាត់ទោសទេ តែបានចូលរួមតាមរូបភាពវីដេអូ ហើយការប្រកាសសាលក្រមកាត់ទោសប្រហារជីវិតពីតុលាការក៏ត្រូវបានធ្វើឡើងដោយគ្មានវត្តមានរូបសេហ្វ អាល់អ៊ីស្លាម កាដាហ្វីនៅក្នុងតុលាការដែរ។ គួរជម្រាបជូនថា សេហ្វ អាល់អ៊ីស្លាម កាដាហ្វីត្រូវបានគេស្គាល់ជាកូនប្រុសសំណប់ចិត្ត ទុកចិត្ត និងជាអ្នកដែលត្រូវស្នងតំណែងពីឱពុកកាដាហ្វី។
ចំណែកមនុស្សជំនិត ៨នាក់របស់កាដាហ្វីដែលបានទទួលទោសប្រហារជីវិតជាមួយនឹងសេហ្វ អាល់អ៊ីស្លាម កាដាហ្វីដែរនោះ មានពីរនាក់ដែលលេចធ្លោជាងគេ ទី១ មានឈ្មោះ Baghdadi Mahmoudi ជានាយករដ្ឋមន្រ្តីចុងក្រោយរបស់កាដាហ្វីដែលរដ្ឋអំណាចប្រទេសទុយនីស៊ីបានចាប់បញ្ជូនទៅឲ្យរដ្ឋអំណាចថ្មីលីប៊ីក្នុងឆ្នំា ២០១២ និងមនុស្សជំនិតទី២ មានឈ្មោះ Abdallah Senoussi ជាប្រមុខក្រសួងស៊ើបការសម្ងាត់ដែលរដ្ឋអំណាចប្រទេសម៉ូរីតានីបានចាប់បញ្ជូនទៅឲ្យរដ្ឋអំណាចថ្មីលីប៊ីក្នុងឆ្នំា ២០១២។
អង្គការសហប្រជាជាតិ និងក្រុមអង្គការការពារសិទ្ធិមនុស្សបានសម្តែងការសោកស្តាយចំពោះការអនុវត្តន៍ទោសប្រហារជីវិត ព្រមទំាងបរិហារពីដំណើរការកាត់ក្តីដែលគ្មានសមធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ