បន្ទាប់ពីប្រទេសឡាវប្រមុខរដ្ឋាភិបាលរុស្ស៊ីផ្តើមទស្សនកិច្ចនៅវៀតណាម
ក្នុងក្របខ័ណ្ឌទស្សនៈកិច្ចដែលនឹងពន្យារទៅ២ថ្ងៃព្រឹកមិញនៅក្រុងហាណូយលោកនាយករដ្ឋមន្ត្រីរុស្ស៊ីមេដវេដេវ បានធ្វើកិច្ចចរចាជាមួយសមភាគីវៀតណាមគឺលោក Nguyen Tan Dung។ ប្រធានបទសំខាន់ៗ គឺសហប្រតិបត្តិការ វិស័យថាមពល ពាណិជ្ជកម្ម សេដ្ឋកិច្ចនិងយោធា។ ជាលទ្ធផលមានចុះបានកិច្ចព្រមព្រៀងមួយចំនួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
ថ្លែងទៅពួកអ្នកកាសែតក្រោយពីកិច្ចចរចាព្រឹកមិញ នៅក្រុងហាណូយ ប្រមុខរដ្ឋាភិបាល រុស្ស៊ីលោកមេដវេដេវបង្ហើបឲ្យដឹងថា វៀតណាមនិងរុស្ស៊ី បានឯកភាពគ្នាទៅលើការស៊ីជម្រៅ សហប្រតិបត្តិការ វិស័យថាមពល។ ពោលគឺ ៖ មានបញ្ជាក់អំពីការសាងសង់ដោយរុស្ស៊ី ជាស្ថានីយអគ្គិសនីទី១នៅវៀតណាមដែលដើរដោយថាមពលនុយក្លេអ៊ែរ។ សម្រាប់ស្ថាបនកម្មនេះនឹងមានប្រើឥណទានផ្តល់ដោយរុស្ស៊ី។
ទន្ទឹមនឹងសហគ្រាសចម្រុះខាងជីកប្រេងបង្កើតតាំងពីជំនាន់សហភាពសូវៀតមក ក្រោមឈ្មោះ ថា VietSovPetro ដែលក្នុងឆ្នាំ២០១២នេះ ចេះជីកប្រេងនៅតាមបាតសមុទ្របណ្តោយឆ្នេរវៀតណាមបានបរិមាណឡើងដល់ ២០០លានតោនទៅហើយ ភាគីវៀតណាមក៏ស្វាគម ដល់ការចូលខ្លួនទៅលើទីផ្សារវៀតណាមទាំងក្រុមហ៊ុនថាមពលរុស្ស៊ី ផ្សេងទៀតបែបយ៉ាងGazprom Lukoilនិងក្រុមហ៊ុនចម្រុះរុស្ស៊ី -អង់គ្លេស “TNK-BP” ។
ខាងផ្នែកពាណិជ្ជកម្ម រុស្ស៊ីនិងវៀតណាម បានព្រមព្រៀងគ្នាថានឹងបង្កើនការផ្តោះប្តូរទំនិញដែលក្នុងឆ្នាំ២០១១កន្លងទៅ បានមានទឹកប្រាក់ ជាង៣.០០០លានដុល្លារទៅហើយ ឲ្យស្ទុះដល់ ៧.០០០លានដុល្លារតែម្តងទៅទល់ឆ្នាំ ២០១៥។ ការឯកភាពគ្នានេះ ត្រូវលោកមេដវេដេវ និងលោកនាយករដ្ឋមន្ត្រី វៀតណាម Nguyen Tan Dung យោងដូចគ្នា ទៅលើលទ្ធផលដែលថា គ្រាន់តែក្នុង៩ខែកន្លងទៅនៃឆ្នាំនេះ ទំហំផ្តោះប្តូរនេះ បានកើនឡើង ១៥០% បើប្រៀបទៅនឹង អំឡុងពេលដូចគ្នានេះនៃឆ្នាំមុន។ គួរនិយាយថា វៀតណាម ជាដៃគូពាណិជ្ជកម្មទី២របស់រុស្ស៊ី បើគិតក្នុងចំណោម១០ប្រទេស អាស៊ាន ហើយជាទី៧ បើគិតនៅទ្វីបអាស៊ីទាំងមូល។
ខាងផ្នែកសេដ្ឋកិច្ច គូភាគីបានមូលមតិគ្នាថា គឺក្នុងឆ្នាំក្រោយទៅហើយ ដែលនឹងប្រព្រឹត្តទៅ កិច្ចចរចា ស្តីអំពីការបង្កើតឡើង ជា”តំបន់ពាណិជ្ឃកម្មសេរី” ជាមួយ”សហភាពគយ” ដែល រួមក្តោបប្រទេសរុស្ស៊ី បេឡារុស និង កាហ្សាក់ស្ថាន។
ចំណែកកិច្ចព្រមព្រៀង៣ច្បាប់ដែលមានចុះថ្ងៃនេះ គឺប៉ះលើវិស័យ ស្រាវជ្រាវនិងប្រើ លំហអវកាស ក្នុងគោលដៅស៊ីវិល, វិស័យវិនិយោគទៅក្នុងគម្រោងរួមណាដែលជាអាទិភាពនិងវិស័យប្រើថាមពលឲ្យបានប្រសិទ្ធិភាពកម្រិតខ្ពស់។ខាងផ្នែកវប្បធម៌ ម៉ូស្គូនឹងសាងសង់នៅវៀតណាម ជា “សាកលវិទ្យាល័យបច្ចេកវិជ្ជារុស្ស៊ី”។
ទោះបីខាងផ្នែកយោធា ពុំទាន់មានប្រកាសលទ្ធផលអ្វីណាក្តី ក៏គួររំលឹកថា វៀតណាមជា ដៃគូយុទ្ធសាស្ត្ររបស់រុស្ស៊ីនៅតំបន់អាស៊ីអាគ្នេយ៍។ ស្ថាបនិករដ្ឋវៀតណាមសង្គមនិយម លោក ហូ ជីមិញ ក្នុងទសវត្សរ៍ទី៦០នៃសង្គ្រាមប្រឆាំងអាមេរិកតែងបានថ្លែងអំណរគុណមកកាន់ ថ្នាក់ដឹកនាំសូវៀត ដោយឃ្លាថា “ ប្រជាជនវៀតណាម តែងចងចាំជានិច្ច អំពីប្រភពនៃទឹក ដែលខ្លួនហូប” ជាឃ្លាកតញ្ញូ ចំពោះជំនួយយោធាសូវៀតដ៏ច្រើនសន្ធឹកសន្ធាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ