តំបន់អាឡិបរងការទំលាក់គ្រាប់បែកធ្ងន់ធ្ងរ បទឈប់បាញ់សម្រេចដោយមហាអំណាចហៅលែងលឺ
ចុះផ្សាយនៅថ្ងៃ៖
ស្តាប់ - ០៤:៤២
ថ្ងៃសុក្រម្សិលមិញ កងទ័ពស៊ីរីបានប្រតិបត្តិការទំលាក់គ្រាប់បែកយ៉ាងធ្ងន់ធ្ងរ នៅតាមសង្កាត់ភាគខាងកើតតំបន់អាឡិប ដែលគ្រប់គ្រងដោយក្រុមឧទ្ទាម។ ទីកន្លែងសង្គ្រោះរបស់ក្រុមសង្គ្រោះស៊ីវិល៣កន្លែងបានរងការបំផ្លាញ ខ្ទេចខ្ទាំ។ ជនស៊ីវិលយ៉ាងហោច៤៥នាក់ បានស្លាប់ដោយការទំលាក់គ្រាប់បែក។
ដំណោះស្រាយការទូត រកច្រកចេញ សម្រាប់ស៊ីរី ពេលនេះ បរាជ័យទាំងស្រុង ខណៈអាមេរិកនិងរុស្ស៊ីនៅតែខំបង្ហាញការគាំទ្រ ដល់កិច្ចព្រមព្រៀងបទឈប់បាញ់ សម្រេចបាន កាលពីថ្ងៃ៩កញ្ញា ទាំងដឹងថា វាមិនអាចទៅរួច។ នៅទីក្រុងបុស្តុន ថ្ងៃសៅរ៍នេះ ប្រមុខការទូតអាមេរិក ឃែររី នឹងទទួលជួបប្រមុខការទូតអ៊ីតាលី អង់គ្លេស បារាំង និងអាល្លឺម៉ង់ ដើម្បីពិភាក្សាវិបត្តិស៊ីរី។
ស្ថានការណ៍នៅអាឡិប
ថ្ងៃសុក្រម្សិលមិញ តំបន់អាឡិបបានរងការទំលាក់គ្រាប់បែកឥតឈប់តែម្តង ពីសំណាក់ទ័ពស៊ីរី។ អាឡិបធ្លាប់ជាអតីតក្រុងសេដ្ឋកិច្ចស៊ីរី។ តាំងពីឆ្នាំ២០១២មក អាឡិបត្រូវបានបែងចែកជា២តំបន់ មានតំបន់ស្ថិតក្រោមការគ្រប់គ្រងរបស់កងទ័ព និងតំបន់ដែលក្រុមឧទ្ទាមគ្រប់គ្រង។
កងទ័ពស៊ីរីឡោមព័ទ្ធតំបន់ដែលក្រុមឧទ្ទាមគ្រប់គ្រង ២ខែមកហើយ។ កាលពីថ្ងៃព្រហស្បតិ៍ កងទ័ពស៊ីរីបានប្រកាសបើកការវាយលុក ដើម្បីយកសង្កាត់ដែលស្ថិតក្រោមការគ្រប់គ្រងរបស់ក្រុមឧទ្ទាមមកវិញ។
ការទំលាក់គ្រាប់បែកម្សិលមិញ បានបំផ្លាញទីតាំងសង្គ្រោះរបស់ក្រុមសង្គ្រោះស៊ីវិលស៊ីរី ៣កន្លែង បំផ្លាញសម្ភារៈពេទ្យខ្ទេចខ្ទាំអស់។ សំណាងល្អ ដែលគ្មានបុគ្គលិកសង្គ្រោះណាម្នាក់ស្លាប់។ តែក្នុងការបំពេញការងារកន្លងមក នៅស៊ីរី បុគ្គលិកក្រុមសង្គ្រោះ ដែលមានឈ្មោះថា ក្រុមសង្គ្រោះស៊ីវិលស៊ីរី បានស្លាប់អស់ដល់ទៅជាង១៤០នាក់។
ពេលនេះ ក្រុមសង្គ្រោះកំពុងខ្វះខាតសាំង ដូច្នេះប្រតិបត្តិការសង្គ្រោះនៅមានកម្រិត។ គ្មានអ្នកណាអាចចូលទៅយកសាកសព រឺជួយមនុស្សដែលរងរបួស ហើយដែលកំពុងជាប់ផុងខ្លួនក្នុងគំនរថ្មនៃអគារបែកបាក់ទេ ព្រោះស្ថានការណ៍គ្រោះថ្នាក់ណាស់។ ជនរងគ្រោះត្រូវបានគេទុកអោយស្លាប់ គួរអោយអាណោចអធម៌ណាស់។ ក្រុមប្រឆាំងស៊ីរី និងសង្គមស៊ីវិលបានចោទរុស្ស៊ិថា ឃុបខិតជាមួយកងទ័ពស៊ីរី ទំលាក់គ្រាប់បែក នៅអាឡិប ថ្ងៃសុក្រម្សិលមិញនេះ។
អាមេរិកនិងរុស្ស៊ីបន្តទំលាក់កំហុសដាក់គ្នា
បទឈប់បាញ់៩កញ្ញា ដែលអាមេរិកនិងរុស្ស៊ី សម្រេចបាន មានទិសដៅចំបងអោយភាគីជម្លោះស៊ីរីវិលចូលតុចរចាគ្នាវិញ។ បទឈប់បាញ់ចែងអោយភាគីជម្លោះ ផ្អាកការប្រយុទ្ធ ដើម្បីអាចអោយគេដឹកស្បៀងមនុស្សធម៌ជួយប្រជាជនស៊ីរី។ បទឈប់បាញ់ អាចពន្យារពេលបានមួយសប្តាហ៍ ហើយបើអ្វីៗដំណើរការល្អ បន្ទាប់ពីនោះ អាមេរិកនិងរុស្ស៊ីចាប់ផ្តើមសហប្រតិបត្តិការយោធារួមគ្នា កំចាត់ក្រុមជិហាតរដ្ឋអ៊ីស្លាម។
តែបទឈប់បាញ់ ត្រូវបានរំលោភទាំងស្រុង តាំងពីថ្ងៃចន្ទមក ពេលមានការវាយប្រហារក្បួនស្បៀងមនុស្សធម៌ ធ្វើអោយមនុស្សស្លាប់២០នាក់។ ពេលនេះ កងទ័ពបើកការវាយលុកយកអាឡិបពីក្រុមឧទ្ទាមមកវិញ។ អាមេរិកនិងរុស្ស៊ីបានទំលាក់កំហុសលើគ្នាទៅវិញទៅមក។ ម្សិលមិញ កងទ័ពស៊ីរីទំលាក់គ្រាប់បែកធ្ងន់ធ្ងរនៅអាឡិប ធ្វើអោយបទឈប់បាញ់កាន់តែបរាជ័យ។
មហាអំណាចរុស្ស៊ី និងអាមេរិកបានតែក្អេងក្អាងដាក់គ្នា ខណៈអាមេរិកទាំងរុស្ស៊ីសុទ្ធតែមិនអាចដោះស្រាយវិបត្តិស៊ីរីបាន។ ភាគីទាំង២នៅតែ វាយប្រហារសំដីគ្នា មិនត្រឹមតែនៅក្នុងកិច្ចប្រជុំអង្គការសហប្រជាជាតិប៉ុណ្ណោះទេ។ សូម្បីតែក្នុងកិច្ចប្រជុំមហាអំណាចតំបន់ និងមហាអំណាចពាក់ព័ន្ធវិបត្តិស៊ីរី ដែលមានសមាជីក២៣ប្រទេស កាលពីថ្ងៃព្រហស្បតិ៍ ក៏រុស្ស៊ីនិងអាមេរិកនៅតែតវ៉ាគ្នា។
ប្រមុខការទូតអាមេរិក ឃែររី នៅតែទាមទារអោយកងទ័ពស៊ីរីបញ្ឈប់ប្រតិបត្តិការផ្លូវអាកាស។ ឯប្រមុខការទូតរុស្ស៊ី ឡាវ្រូវ វិញ នៅតែទាមទារអោយក្រុមឧទ្ទាមផ្តាច់ខ្លួន អោយដាច់ស្រឡះចេញពីក្រុមភេរវជនហ្វាតេ អាល់ ឆាំ ដែលជាអតីតក្រុមអាល់ណូស្រា។ រុស្ស៊ីដូចជារាងយល់ព្រមអោយមានការផ្អាកប្រតិបត្តិការហោះហើររបស់កងទ័ពស៊ីរី បាន៣ថ្ងៃ តែខាងអាមេរិកវិញ ទាមទារអោយបានដល់មួយសប្តាហ៍។
ដឹងថា បទឈប់បាញ់ ជាគ្រឹះនៃដំណោះស្រាយជម្លោះស៊ីរីហើយ តែម្នាក់ៗនៅតែបន្តចោទគ្នាទៅវិញទៅមក ពីរឿងមិនគោរពគោលការណ៍បទឈប់បាញ់។ តែក៏នៅតែប្រឹងគាំទ្របទឈប់បាញ់ ប្រហែលជាដើម្បីបង្អួតគេថា មានតែខ្លួនទេ ទើបអាចរកដំណោះស្រាយអោយស៊ីរីបាន។
រុស្ស៊ីនិយាយទៅកើត អាមេរិកនិយាយទៅលិច។ វាសនាស៊ីរីបែរជាក្លាយជាល្បែងជម្លោះរបស់មហាអំណាចទៅវិញ ពិតជាពិបាកទទួលយកបានណាស់។
ការត្រួតពិនិត្យបទឈប់បាញ់ជាយន្តការចំពោះមុខ
ដំណោះស្រាយចំពោះមុខ គឺបទឈប់បាញ់នេះហើយ។ មិនអាចអោយប្រជាជនបន្តស្លាប់ក្រោមគ្រាប់ផ្លោងទៀតទេ។ សង្គ្រាមអូសបន្លាយជាង៥ឆ្នាំនេះ សម្លាប់មនុស្សជាង៣សែននាក់ហើយ។ រុស្ស៊ីក៏ទទួលស្គាល់ដែរថា គឺដល់ពេលវេលាហើយ ព្រោះគ្រប់គ្នាសុទ្ធតែបានឃើញបទពិសោធន៍កន្លងមក។ ប៉ុន្តែ បទឈប់បាញ់ត្រូវបានរំលោភ ភាគីនិមួយៗចោទគ្នា ថាជាដើមហេតុនៃការរំលោភបទឈប់បាញ់។
ដោយសាររឿងនេះ បារាំងបានស្នើអោយមានការត្រួតពិនិត្យបទឈប់បាញ់ តាមដានភាគីជម្លោះនិមួយៗថា តើពួកគេពិតជាបានគោរពតាមត្រឹមត្រូវទេ។ រដ្ឋមន្ត្រីការបរទេសបារាំង លោក ហ្សង់ម៉ាក អៃរ៉ូល បានប្រទេសទាំង២៣ ជាមហអំណាចតំបន់ និងមហាអំណាចដែលពាក់ព័ន្ធវិបត្តិស៊ីរី ចូលរួមត្រួតពិនិត្យបទឈប់បាញ់ទាំងអស់គ្នា ព្រោះថា ការត្រួតពិនិត្យបទឈប់បាញ់ កន្លងមក គឺមានតែអាមេរិក និងរុស្ស៊ី តែ២ប្រទេសនេះទេ ដែលជាអ្នកត្រួតពិនិត្យ។ ដូច្នេះ បើភាគីណាចោទភាគីណានោះ គេពិបាកដឹងការពិតណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ