ស៊ីរី៖បទឈប់បាញ់ត្រូវបានជំនួសដោយការប្រយុទ្ធគ្នាជាថ្មីនៅលើសមរភូមិ
នៅក្នុងប្រទេសស៊ីរី ការប្រយុទ្ធគ្នានៅលើសមរភូមិបានចាប់ផ្តើមជាថ្មីនាយប់ថ្ងៃចន្ទ ទី១៩ កញ្ញា។ ប៉ុន្មានម៉ោងក្រោយពីកងទ័ពស៊ីរីបានប្រកាសបិទបញ្ចប់កិច្ចព្រមព្រៀងឈប់បាញ់ភ្លាម ប្រតិបត្តិការទម្លាក់គ្រាប់បែកក៏បានចាប់ផ្តើមយ៉ាងគំហុកដោយបានបណ្តាលឲ្យមានស្លាប់ជនស៊ីវិលចំនួន ៣៦នាក់ ក្នុងនោះមានបុគ្គលិកមនុស្សធម៌ចំនួន ១២នាក់ និងអ្នកបើកបរឡានកាមីញ៉ុងម្នាក់។ ប្រតិបត្តិការសឹកនេះបានកើតមានឡើង ចំពេលដែលសហគមន៍អន្តរជាតិកំពុងព្យាយាមស្រោចស្រង់កិច្ចព្រមព្រៀងនាឱកាសបើកមហាសន្និបាតអង្គការសហប្រជាជាតិក្នុងទីក្រុងញូយ៉កនៅថ្ងៃអង្គារ ទី២០ កញ្ញានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
នៅប៉ុន្មានម៉ោងក្រោយការប្រកាសបិទបញ្ចប់កិច្ចព្រមព្រៀងឈប់បាញ់ពីសំណាក់ទ័ពរដ្ឋាភិបាលស៊ីរីភ្លាម ប្រតិបត្តិការសឹកផ្លូវអាកាសក៏បានចាប់ផ្តើមក្រោមទ្រង់ទ្រាយធំទៅលើទីក្រុងអាឡិប ពិសេសនៅតំបន់ប៉ែកខាងកើតដែលកាន់កាប់ដោយក្រុមឧទ្ទាម។ ពេញមួយយប់មិញ មានប្រតិបត្តិការទម្លាក់គ្រាប់បែកយ៉ាងតិច ៤០ដងទៅលើទីតាំងរបស់ក្រុមបះបោរ។ តែប្រតិបត្តិការសឹកដែលបានសម្លាប់មនុស្សយ៉ាងរង្គាលបានកើតមានឡើងលើក្បួនរថយន្តដឹកជំនួយមនុស្សធម៌របស់អង្គការមនុស្សធម៌ Croissant Rouge ដោយបណ្តាលឲ្យមានមនុស្សស្លាប់យ៉ាងតិច ២៦នាក់ ក្នុងនោះមានបុគ្គលិកមនុស្សធម៌ចំនួន ១២នាក់ ព្រមទាំងរបួសជាច្រើននាក់ផ្សេងទៀត។
ក្រៅពីមានមនុស្សស្លាប់ និងរបួស ការវាយប្រហារផ្លូវអាកាសក៏បានកម្ទេច និងធ្វើឲ្យខូចខាតឡានកាមីញ៉ុងដឹកជំនួយមនុស្សធម៌ប្រមាណជា ១៨គ្រឿង ព្រមទាំងឥវ៉ាន់ដែលមាននៅក្នុងឡានកាមីញ៉ុងទាំងនោះ។ អង្គការអ្នកសង្កេតការណ៍សិទ្ធិមនុស្សស៊ីរីបានបញ្ជាក់ពីដំណឹងវាយប្រហារនេះ តែមិនទាន់ហ៊ានអះអាងថា តើយន្តហោះដែលបានទម្លាក់គ្រាប់បែកនោះជាយន្តហោះរបស់ទ័ពអាកាសរុស្ស៊ី ឬមួយជាយន្តហោះរបស់ទ័ពអាកាសស៊ីរី។ ទន្ទឹមគ្នានឹងប្រតិបត្តិការផ្លូវអាកាស ក៏មានការបាញ់ផ្លោងគ្រាប់កំាភ្លើងត្បាល់ដាក់គ្នារវាងទ័ពរដ្ឋាភិបាលស៊ីរីដែលគ្រប់គ្រងតំបន់ប៉ែកខាងលិច និងកម្លំាងបះបោរដែលគ្រប់គ្រងតំបន់ប៉ែកខាងកើតទីក្រុងអាឡិប។
នៅក្នុងទីក្រុងញូយ៉កដែលអង្គការសហប្រជាជាតិកំពុងបើកមហាសន្និបាតប្រចាំឆ្នាំ វិបត្តិស៊ីរីក៏បានក្លាយជាប្រធានរឿងមួយយ៉ាងសំខាន់ដែរ។ តែនៅចំពោះព្រឹត្តិការណ៍ដែលកំពុងមានលើសមរភូមិស៊ីរីពេលនេះ អាមេរិក និងរុស្ស៊ីដែលជាតួអង្គនៃកិច្ចព្រមព្រៀងឈប់បាញ់បានឆ្លៀតទម្លាក់កំហុសដាក់គ្នាទៅវិញ ទៅមក។ ដោយមិនចង្អុលចំមុខរុស្ស៊ី អ្នកនាំពាក្យក្រសួងការបរទេសអាមេរិក John Kirby បានថ្លែងថា អាមេរិកទើសទាល់ចិត្តខ្លាំងណាស់ចំពោះឥរិយាបទរបស់រុស្ស៊ី និងថា អ្វីដែលកំពុងកើតមាននៅស៊ីរីពេលនេះបានធ្វើឲ្យប៉ះពាល់ខ្លាំងណាស់លើការខិតខំប្រឹងប្រែងរបស់យើងក្នុងការនាំសន្តិភាពឲ្យស៊ីរី។
យ៉ាងណាក៏ដោយ ប្រមុខរដ្ឋ និងប្រមុខរដ្ឋាភិបាលដែលកំពុងចូលរួមមហាសន្និបាតអង្គការសហប្រជាជាតិចង់ឲ្យមានការពន្យារកិច្ចព្រមព្រៀងឈប់បាញ់ដែលអនុម័តដោយអាមេរិក និងរុស្ស៊ី។ លោកប្រធានាធិបតីបារាំងហ្រ្វង់ស័រ ហូឡង់ដែលទើបទៅដល់អាមេរិកថ្ងៃអង្គារ ទី២០ កញ្ញានេះបានបញ្ជាក់ថា លោកនឹងធ្វើការអំពាវនាវឲ្យបន្តកិច្ចព្រមព្រៀងឈប់បាញ់ជាបន្តទៀត និងថា អសកម្មភាពរបស់សហគមន៍អន្តរជាតិនឹងធ្វើឲ្យស៊ីរីធ្លាក់ក្នុងជ្រោះកាន់តែជ្រៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ