ស៊ីរី៖អ.ស.ប.ផ្អាកសកម្មភាពជំនួយមនុស្សធម៌នៅស៊ីរី ក្រោយរងការវាយប្រហារ
អ្នកនំាពាក្យរបស់អង្គការសហប្រជាជាតិបានប្រកាសឲ្យដឹងនៅថ្ងៃអង្គារ ទី២០ កញ្ញាពីការផ្អាក់រាល់សកម្មភាពដឹកជញ្ជូនជំនួយមនុស្សធម៌នៅក្នុងទឹកដីស៊ីរី។ ការសម្រេចនេះបានធ្វើឡើង បន្ទាប់ពីមានការវាយប្រហារផ្លូវអាកាសលើក្បួនរថយន្តដឹកជំនួយមនុស្សធម៌របស់អង្គការអឌ្ឍច័ន្ទក្រហមដែលបានបណ្តាលឲ្យមានមនុស្សស្លាប់ជាច្រើននាក់។ ដោយឡែក រុស្ស៊ី និងស៊ីរីបានអះអាងថា ខ្លួនមិនបានវាយប្រហារលើក្បួនរថយន្តដឹកជំនួយមនុស្សធម៌នោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
នៅទីបំផុត និងដើម្បីធានាសន្តិសុខ សុវត្ថិភាពដល់បុគ្គលិករបស់អង្គការសហប្រជាជាតិ ក៏ដូចជាអង្គការក្រៅរដ្ឋាភិបាលដែលកំពុងបំពេញបេសកកម្មក្នុងប្រទេសស៊ីរី អង្គការសហប្រជាជាតិបានសម្រេចផ្អាករាល់សកម្មភាពដឹកជញ្ជូនជំនួយមនុស្សធម៌ជាបណ្តោះអាសន្ន។ ការសម្រេចចិត្តរបស់អង្គការពិភពលោកដូចនេះបានធ្វើឡើង បន្ទាប់ពីមានការវាយប្រហារផ្លូវអាកាសលើក្បួនរថយន្តដឹកជំនួយមនុស្សធម៌របស់អង្គការអឌ្ឍច័ន្ទក្រហមនៅយប់ថ្ងៃចន្ទ ទី១៩ កញ្ញាដែលបណ្តាលឲ្យស្លាប់ជនស៊ីវិលយ៉ាងតិច ៣៦នាក់ ក្នុងនោះមានបុគ្គលិកមនុស្សធម៌ចំនួន ១២នាក់។
ពីទីក្រុងញូយ៉ក អ្នកនាំពាក្យរបស់អង្គការសហប្រជាជាតិមិនបានបញ្ជាក់ពីចំនួនថ្ងៃដែលត្រូវផ្អាកនោះទេ តែគ្រាន់បញ្ជាក់ថា អង្គការសហប្រជាជាតិត្រូវរង់ចាំមើលស្ថានការណ៍ប្រែប្រួលជាក់ស្តែងនៅទីកន្លែង ពិសេសត្រូវពិនិត្យមើលឡើងវិញពីលក្ខខណ្ឌសន្តិសុខ។ យោងតាមអង្គការសហប្រជាជាតិ មានរថយន្តកាមីញ៉ុងចំនួន ១៨គ្រឿងក្នុងចំណោម ៣១គ្រឿងបានរងការវាយប្រហារ។ គឺជាទង្វើមួយដែលប្រធានគណៈកម្មាធិការកាកបាទក្រហមអន្តរជាតិលោក Peter Maurer ចាត់ទុកជាការរំលោភបំពានលើច្បាប់មនុស្សធម៌អន្តរជាតិ និងជារឿងដែលមិនអាចអត់ឱនឲ្យបានទេ។
ការវាយប្រហារនោះត្រូវបានអង្គការអ្នកសង្កេតការណ៍សិទ្ធិមនុស្សនៅស៊ីរីទម្លាក់កំហុសលើរុស្ស៊ី និងរដ្ឋាភិបាលស៊ីរីរបស់លោកប្រធានាធិបតីអាសាដ តែរុស្ស៊ី តាមរយៈក្រសួងការពារជាតិបានច្រានចោលភ្លាមៗលើការចោទប្រកាន់នេះ។ ចំណែកកងទ័ពស៊ីរីក៏បានចេញមុខបញ្ជាក់ភ្លាមៗថា ព័ត៌មានចុះផ្សាយដោយកាសែតដែលទម្លាក់កំហុសលើខ្លួនជាព័ត៌មានមិនពិត និងគ្មានមូលដ្ឋានត្រឹមត្រូវ។ នៅទីក្រុងញូយ៉ក សហរដ្ឋអាមេរិក លោកប្រមុខការទូតអាមេរិកចន ឃែរី និងសមភាគីរុស្ស៊ីលោកស៊ែហ្កី ឡាវរ៉ូស្វបានជួបសន្ទនាគ្នាទាក់ទងនឹងសំណុំរឿងស៊ីរី ពិសេសរឿងការវាយប្រហារលើក្បួនរថយន្តដឹកជំនួយមនុស្សធម៌របស់អង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ