វិបត្តិចំណាប់ខ្មាំងនៅអាល់ហ្សេរីកំពុងរាលដាលជាបញ្ហាការទូត
កាលពីថ្ងៃព្រហស្បតិ៍ម្សិលមិញ កងទ័ពអាល់ហ្សេរីបានបើកការវាយលុកទៅលើទីតាំងរោងចក្រប្រេង និងឧស្ម័ន ដែលក្រុមភេរវជនចាប់បុគ្គលិកធ្វើជាចំណាប់ខ្មាំង។ ប្រតិបត្តិការនេះបណ្តាលឲ្យចំណាប់ខ្មាំងជាច្រើន រួមទាំងចំណាប់ខ្មាំងជាជនបរទេសផង ត្រូវបាត់បង់ជីវិត។ ភាពរឹងរូសរបស់រដ្ឋាភិបាលអាល់ហ្សេរី ដែលចចេសមិនចរចាដាច់ខាតជាមួយក្រុមភេរវជន ហើយបែរជាបើកប្រតិបត្តិការវាយលុកភ្លាមៗ ទៅលើក្រុមភេរវជន ដែលមានពេញទៅដោយចំណាប់ខ្មាំងបរទេសបែបនេះ កំពុងតែរាលដាលជាបញ្ហាការទូតជាមួយនឹងបណ្តាប្រទេស ដែលមានពលរដ្ឋជាប់ជាចំណាប់ខ្មាំង ហើយដែលខ្លះត្រូវបាត់បង់ជីវិត ក្នុងប្រតិបត្តិការនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
រដ្ឋាភិបាលអាមេរិក អង់គ្លេស និងជប៉ុន ដែលមានពលរដ្ឋជាប់ជាចំណាប់ខ្មាំង នៅក្នុងរោងចក្រប្រេង និងឧស្ម័ន នៅអាល់ហ្សេរី សុទ្ធតែនាំគ្នាបង្ហាញនូវការមិនសប្បាយចិត្ត ចំពោះចំណាត់ការរបស់អាជ្ញាធរអាល់ហ្សេរី ក្នុងការដោះស្រាយវិបត្តិចំណាប់ខ្មាំងនេះ។
កាលពីល្ងាចថ្ងៃព្រហស្បតិ៍ ម្សិលមិញ ក្រោយពីបានឮដំណឹងពីប្រតិបត្តិការរបស់កងទ័ពអាល់ហ្សេរី ដែលវាយលុកចូលក្នុងទីតាំងរោងចក្រ ដែលមានចំណាប់ខ្មាំងបរទេស លោក David Cameron នាយករដ្ឋមន្រ្តីអង់គ្លេសបានស្តីបន្ទោសរដ្ឋាភិបាលអាល់ហ្សេរី ដោយសម្តីការទូតថា រដ្ឋាភិបាលអាល់ហ្សេរីគួរតែប្រាប់លោកឲ្យដឹងជាមុនអំពីប្រតិបត្តិការនេះ។ រដ្ឋាភិបាលអាមេរិកវិញបានសម្តែងនូវក្តីព្រួយបារម្ភចំពោះជោគវាសនាចំណាប់ខ្មាំងអាមេរិក ហើយទាមទារឲ្យមានការពន្យល់បកស្រាយឲ្យបានច្បាស់លាស់ ពីសំណាក់រដ្ឋាភិបាលអាល់ហ្សេរី។
ជប៉ុនគឺជាប្រទេសដែលបានបញ្ចេញប្រតិកម្មខ្លាំងៗជាងគេ ដោយកាលពីម្សិលមិញនេះ ក្រោយពីទទួលបានដំណឹងពីប្រតិបត្តិការកងទ័ពអាល់ហ្សេរី ជប៉ុនបានទាមទារឲ្យអាល់ហ្សេរីបញ្ឈប់ជាបន្ទាន់ប្រតិបត្តិការយោធាទៅលើក្រុមភេរវជន ដោយលើកឡើងថា ជីវិតចំណាប់ខ្មាំងជប៉ុន គឺជាអាទិភាពចម្បងបំផុត សម្រាប់រដ្ឋាភិបាលជប៉ុន។ នៅថ្ងៃសុក្រនេះ ក្រសួងការបរទេសជប៉ុនបានកោះហៅឯកអគ្គរដ្ឋទូទអាល់ហ្សេរី ប្រចាំទីក្រុងតូក្យូ ដើម្បីទាមទារឲ្យមានការបកស្រាយ ជុំវិញប្រតិបត្តិការរំដោះចំណាប់ខ្មាំងនេះ។
លោកស្ហ៊ីនហ្សូ អាបេ ដែលបានកាត់បន្ថយដំណើរទស្សនកិច្ចនៅឥណ្ឌូណេស៊ី ដើម្បីវិលត្រឡប់ទៅជប៉ុន ដោះស្រាយវិបត្តិចំណាប់ខ្មាំងនេះ បានលើកឡើងថា អាល់ហ្សេរីគួរតែស្នើសុំជំនួយពីកងកម្លាំងអាមេរិក និងអង់គ្លេស ដែលមានបទពិសោធន៍ច្រើនជាង ក្នុងការដោះស្រាយវិបត្តិចំណាប់ខ្មាំង។
អ្វីដែលធ្វើឲ្យគេមិនសប្បាយចិត្តកាន់តែខ្លាំង គឺការដែលអាជ្ញាធរអាល់ហ្សេរីមិនបានជូនដំណឹងដល់ប្រទេសពាក់ព័ន្ធឲ្យដឹងជាមុន អំពីប្រតិបត្តិការរំដោះចំណាប់ខ្មាំងនេះផង ហើយថែមទាំងបិទខ្ទប់ព័ត៌មាន មិនបញ្ជាក់ឲ្យដឹងច្បាស់ ទាំងអំពីដំណើរការនៃប្រតិបត្តិការ ទាំងអំពីលទ្ធផលនៃប្រតិបត្តិការ។ រហូតមកទល់នឹងពេលនេះ គេនៅតែមិនទាន់ប្រាកដថា តើមានចំណាប់ខ្មាំងប៉ុន្មាននាក់ដែលរំដោះបាន ហើយមានប៉ុន្មាននាក់ដែលត្រូវបាត់បង់ជីវិត? បាត់បង់ជីវិតចំណាប់ខ្មាំងជនជាតិណាខ្លះ? តួលេខ ដែលបញ្ជាក់ថា មានចំណាប់ខ្មាំងបរទេស ៣៤នាក់ ត្រូវស្លាប់ គឺបានមកតែពីខាងក្រុមភេរវជនប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ