ចំណាប់ខ្មាំងនៅអាល់ហ្សេរីធ្វើឲ្យសង្រ្គាមនៅម៉ាលីក្លាយជាបញ្ហារួមរបស់សហគមន៍អន្តរជាតិ
ក្រុមភេរវជនស្និទ្ធិនឹងអាល់កៃដាបានបើកការវាយប្រហារលើរោងចក្រប្រេងនិងឧស្ម័នមួយកន្លែង ក្នុងប្រទេសអាល់ហ្សេរី កាលពីថ្ងៃពុធម្សិលមិញ ហើយបានចាប់បុគ្គលិកជាច្រើននាក់ធ្វើជាចំណាប់ខ្មាំង។ នៅក្នុងចំណោមចំណាប់ខ្មាំងទាំងនេះ មាន ៤១នាក់ គឺជាជនបរទេស ដូចជា ជនជាតិន័រវែស អាមេរិក ជប៉ុន អង់គ្លេស បារាំង ជាដើម។ ក្រុមភេរវជនបានអះអាងថា ការចំណាប់ខ្មាំងបរទេសនេះ គឺជាការសងសឹកចំពោះប្រតិបត្តិការយោធានៅម៉ាលី។
ចុះផ្សាយនៅថ្ងៃ៖
ស្តាប់ - ០២:២០
គិតមកទល់នឹងពេលនេះ ក្រុមភេរវជនកំពុងបន្តកាន់កាប់រោងចក្រប្រេង ដោយមានបុគ្គលិករោងចក្រជាច្រើន ទាំងជាជនជាតិអាល់ហ្សេរី និងបុគ្គលិកបរទេស ត្រូវបានចាប់ជាចំណាប់ខ្មាំងនៅខាងក្នុង។ ទាហានអាល់ហ្សេរីត្រូវបានគេដាក់ពង្រាយព័ទ្ធជុំវិញរោងចក្រប្រេងនេះ ក៏ប៉ុន្តែ ក្រុមភេរវជនបានព្រមានទុកជាមុនថា ពួកគេបានរាយគ្រឿងផ្ទុះនៅជុំវិញរោងចក្រនេះរួចហើយ។ ប្រសិនបើមានការប៉ុនប៉ងវាយលុករំដោះចំណាប់ខ្មាំង ពួកគេនឹងចុចបំផ្ទុះរោងចក្រប្រេងនេះ រួមជាមួយនឹងចំណាប់ខ្មាំងទាំងអស់។
ក្រុមភេរវជន ដែលស្និទ្ធិនឹងក្រុមអាល់កៃដាបានទាមទារឲ្យរដ្ឋាភិបាលអាល់ហ្សេរីដោះលែងក្រុមភេរវជនអ៊ីស្លាម១០០នាក់ ដែលកំពុងជាប់ឃុំ ហើយទាមទារឲ្យបារាំងបញ្ឈប់ប្រតិបត្តិការយោធានៅម៉ាលី។
គិតរហូតមកទល់នឹងពេលនេះ គេនៅតែមិនទាន់អាចបញ្ជាក់ឲ្យបានប្រាកដច្បាស់ អំពីចំនួនចំណាប់ខ្មាំងបរទេស ដែលកំពុងស្ថិតក្នុងដៃភេរវជននេះនៅឡើយទេ។ ក្រុមភេរវជនបានអះអាងថា ចំណាប់ខ្មាំងជាជនបរទេសមានទាំងអស់ ៤១នាក់។ សហរដ្ឋអាមេរិក អង់គ្លេស ន័រវែស និងជប៉ុន សុទ្ធតែបានទទួលស្គាល់ថាពិតជាមានពលរដ្ឋរបស់ខ្លួន ដែលកំពុងជាប់ជាចំណាប់ខ្មាំង នៅអាល់ហ្សេរីនេះ។ ចំណែកបារាំងវិញ បានត្រឹមតែនិយាយថា ប្រហែលជាមានជនជាតិបារាំងជាចំណាប់ខ្មាំង ប៉ុន្តែ នៅមិនទាន់អាចបញ្ជាក់ឲ្យបានពិតប្រាកដនៅឡើយទេ។
ទូរទស្សន៍អន្តរជាតិបារាំង France 24 បានអះអាង កាលពីថ្ងៃពុធម្សិលមិញថា គេបានជួបនិយាយតាមទូរស័ព្ទជាមួយចំណាប់ខ្មាំង ដែលជាជនជាតិបារាំង ហើយចំណាប់ខ្មាំងរូបនេះបានអះអាងថាខ្លួនកំពុងជាប់ឃុំរួមជាមួយនឹងជនជាតិអង់គ្លេស ជប៉ុន ហ្វីលីពីន និងម៉ាឡេស៊ី។
រដ្ឋមន្រ្តីក្រសួងការបរទេសអង់គ្លេសបានប្រាប់អ្នកសារព័ត៌មានថា ការចាប់ចំណាប់ខ្មាំងនៅអាល់ហ្សេរីនៅពេលនេះ គឺជាស្ថានភាពដ៏គ្រោះថ្នាក់បំផុត ដែលអាចវិវឌ្ឍយ៉ាងលឿនគ្រប់ពេលវេលា។ រដ្ឋមន្រ្តីការពារជាតិអាមេរិកវិញបានអះអាងថា អាជ្ញាធរអាមេរិកនឹងចាត់គ្រប់វិធានការទាំងអស់ ដើម្បីដោះស្រាយវិបត្តិចំណាប់ខ្មាំង នៅអាល់ហ្សេរីនេះ។ ចំណែកលោកស្ហ៊ីនហ្សូ អាបេ ដែលកំពុងបំពេញទស្សនកិច្ចនៅវៀតណាម បានប្រកាសថា លោកកំពុងតែពិភាក្សាជាមួយប្រទេសពាក់ព័ន្ធ ដើម្បីរកវិធីដោះលែងចំណាប់ខ្មាំងមកវិញ។
អ្វីដែលគេអាចនិយាយបាននៅពេលនេះ គឺថា ការចាប់ជនបរទេសចម្រុះជាតិសាសន៍ជាចំណាប់ខ្មាំង នៅអាល់ហ្សេរី នៅពេលនេះ គឺជាការដាស់អារម្មណ៍សហគមន៍អន្តរជាតិឲ្យមើលឃើញកាន់តែច្បាស់ថា ភេរវជននៅម៉ាលី មិនមែនគ្រាន់តែជាបញ្ហារបស់ម៉ាលី អាហ្វ្រិក និងបារាំងនោះទេ ប៉ុន្តែ វាជាបញ្ហារួម ដែលអាចបង្កអសន្តិសុខដល់ស្ទើរតែគ្រប់ប្រទេសទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ