តើការផ្ទុះរឿងអាស្រូវពួករលួយនៅផ្ទៃក្នុង FIFA បានកើតឡើងយ៉ាងដូចម្តេច?
រឿងអាស្រូវពុករលួយកំពុងបែកធ្លាយយ៉ាងខ្ចរខ្ចាយនៅផ្ទៃក្នុងសហព័ន្ធបាល់ទាត់ពិភពលោកហ្វីហ្វា (FIFA)។ មានមនុស្សចំនួន ១៤នាក់ ក្នុងនោះមាន៩នាក់ ជាមន្រ្តី និងអតីតមន្រ្តី FIFA និង ៥នាក់ជាប្រធានក្រុមហ៊ុនបរទេសត្រូវបានចាប់ខ្លួនពីបទជាប់សង្ស័យពុករលួយ។ ប្រតិបត្តិការចាប់ខ្លួនមនុស្សសង្ស័យទំាង ១៤នាក់ត្រូវបានធ្វើឡើងនៅថ្ងៃពុធ ទី២៧ ឧសភា តាមសំណើរបស់តុលាការអាមេរិកំាង។ ការផ្ទុះរឿងអាស្រូវពុករលួយនៅផ្ទៃក្នុង FIFA បានកើតមានឡើង ចំពេលដែល FIFA កំពុងត្រៀមបើកសមាជប្រចំាឆ្នំាក្នុងការជ្រើសរើសប្រធានថ្មីជំនួសលោក សេប ប្លាតធ័រ (Sepp Blazer) ដែលបានកាន់តំណែងមួយនេះអស់ ៤អាណត្តិជាប់គ្នា ពោលតំាងពីឆ្នំា ១៩៩៨។ តែលោកប្លាតធ័រអាចនឹងជាប់មួយអាណត្តិថ្មីទៀតនៅក្នុងសមាជប្រចំាឆ្នំារៀបចំក្នុងថ្ងៃនេះ និងថ្ងៃស្អែក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៥៦
ចម្ងល់ដែលគ្រប់គ្នាកំពុងចោទឡើងជាសំណួរគឺថា អាមេរិកមិនមែនជាប្រទេសដែលល្បីល្បាញខាងបាល់ទាត់ទេ ចុះហេតុអ្វីបានជាតុលាការអាមេរិកំាងបែរជាបានយកចិត្តទុកដាក់លើ FIFA ខ្លំាងម្ល៉េះ និងថា តើមានកត្តាអ្វីខ្លះដែលបានជម្រុញឲ្យតុលាការអាមេរិកំាងហ៊ានចំណាយពេល និងលុយកាក់យ៉ាងច្រើនសម្បើមដើម្បីបើកការស៊ើបអង្កេតរឿងពុករលួយនៅផ្ទៃក្នុង FIFA។ តាមក្រុមអ្នកសង្កេតការណ៍មួយចំនួនឲ្យដឹងថា អ្វីដែលបានជម្រុញឲ្យតុលាការអាមេរិកំាងយកចិត្តទុកដាក់ចំពោះរឿងពុករលួយនៅផ្ទៃក្នុង FIFA មកពីអាមេរិកតូចតិច តូចថ្លើមមិនបានទទួលជាប្រទេសរៀបចំការប្រកួតកីឡាបាល់ទាត់ពិភពលោកសម្រាប់ឆ្នំា ២០២២ ដែល FIFA បែរជាប្រគល់ទៅឲ្យប្រទេសកាតាទៅវិញ។ គួររម្លឹកជូនថា FIFA បានប្រគល់ឲ្យប្រទេសរុស្ស៊ីរៀបចំការប្រកួតកីឡាបាល់ទាត់ពិភពលោកសម្រាប់ឆ្នំា ២០១៨ និងប្រទេសកាតាសម្រាប់ឆ្នំា ២០២២។
តាមពិតទៅ ការសម្រេចរបស់ FIFA ឲ្យប្រទេសរុស្ស៊ី និងកាតាក្នុងពេលតែមួយបានក្លាយជាសំណុំរឿងបើកការស៊ើបអង្កេតក្នុងប្រទេសស្វីសតំាងពីថ្ងៃទី១០ មីនាក្នុងបទជាប់សង្ស័យរឿងពុករលួយ និងការគ្រប់គ្រងគ្មានតម្លាភាពរបស់ FIFA។ តែរឿងនេះទើបបានប្រកាសឲ្យដឹងជាសាធារណៈពេលនេះ។ នៅខាងអាមេរិកំាងវិញ អស់ជាច្រើនឆ្នំាកន្លងមកហើយដែលតុលាការបានបើកការស៊ើបអង្កេតពីរបៀបធ្វើការ ពិសេសពីការដែល FIFA បានសម្រេចឲ្យប្រទេសនេះ ឬប្រទេសនោះជាអ្នករៀបចំការប្រកួតកីឡាបាល់ទាត់ពិភពលោក។ តែដើម្បីអាចរកឃើញទង្វើពុករលួយបាន លុះត្រាណាតែមានភស្តុតាងជាក់ស្តែង។ ភស្តុតាងជាក់ស្តែង និងដែលមានទម្ងន់ធ្ងន់នោះ គឺការរួមសហការណ៍របស់លោកឆាក់ ប្លាហ្ស័រ (Chuck Blazer) ជាមួយក្រសួងស៊ើបការណ៍សម្ងាត់អាមេរិកំាង FBI។
តើលោកឆាក់ ប្លាហ្ស័រ (Chuck Blazer) ជានរណា?
បើតាមកាសែតអាមេរិកំាងឲ្យដឹងថា ប្រភពនៃការផ្ទុះរឿងអាស្រូវពុករលួយនៅផ្ទៃក្នុង FIFA ពេលនេះ គឺផ្តើមចេញពីការរួមសហការណ៍របស់លោកឆាក់ ប្លាហ្ស័រ (Chuck Blazer) ជាជនជាតិអាមេរិកំាង។ លោកឆាក់ ប្លាហ្ស័រ ជាអតីតអគ្គលេខាធិការនៃសហព័ន្ធកីឡាបាល់ទាត់អាមេរិកខាងជើង និងជាអតីតសមាជិកគណៈកម្មាធិការប្រតិបត្តិរបស់ FIFA ពីឆ្នំា ១៩៩៨ ដល់ឆ្នំា ២០១៣។ អ្វីៗបានចាប់ផ្តើមដំបូងពីកំហុសផ្ទាល់ខ្លួនរបស់លោកឆាក់ ប្លាហ្ស័រ (Chuck Blazer) ដែលរដ្ឋអំណាចអាមរិកំាងបានរកឃើញថា លោកឆាក់ ប្លាហ្ស័រ (Chuck Blazer) មិនបានបង់ពន្ធលើប្រាក់ចំណូលរាប់សិបលានដុល្លារដែលលោកទទួលបានដោយខុសច្បាប់ក្នុងឋានៈជាអគ្គលេខាធិការនៃសហព័ន្ធកីឡាបាល់ទាត់អាមេរិកខាងជើង។ ទង្វើនេះនឹងអាចធ្វើឲ្យលោកឆាក់ ប្លាហ្ស័រទទួលទោសជាទម្ងន់។
តែដើម្បីអាចបន្តជីកឫស ជីកគល់បន្ថែមពីដំណើរការរបស់ FIFA តុលាការអាមរិកំាងបានដាក់គំនាបឲ្យលោកឆាក់ ប្លាហ្ស័ររួមសហការណ៍ជាមួយខ្លួនជាថ្នូរនឹងការសម្រាលទោស។ ក្នុងឆ្នំា ២០១១ ពោលក្នុងពេលដែលលោកឆាក់ ប្លាហ្ស័រកំពុងបម្រើការឲ្យ FIFA លោកឆាក់ ប្លាហ្ស័រក៏បានរួមការងារជាមួយ FBI ដោយបានបរិហារ ឆ្កឹះកកាយការពិតស្តីពីរឿងអាស្រូវពុករលួយរបស់ FIFA ដោយបានប្រគល់ភស្តុតាងឲ្យ FIB នូវខ្សែអាត់សម្លេងជាច្រើនស្តីពីកិច្ចប្រជុំរបស់ FIFA ក៏ដូចជាកិច្ចសន្ទនានានារវាងថ្នាក់ដឹកនំា FIFA ដែលលោកឆាក់ ប្លាហ្ស័របានថតទុក។ នេះហើយជាចំណុចបែកធ្លាយនៃអំពើពុករលួយ ស៊ីសំណូកសូកប៉ាន់របស់ FIFA ទាក់ទងនឹងការសម្រេចចិត្តឲ្យប្រទេសនេះ ឬប្រទេសនោះជាអ្នករៀបចំការប្រកួតកីឡាបាល់ទាត់ពិភពលោក និងរឿងស៊ីសំណូកសូកប៉ាន់ទាក់ទងនឹងការឲ្យក្រុមហ៊ុននេះ ឬក្រុមហ៊ុននោះធ្វើជា Sponsor របស់ខ្លួន។
រឿងពុករលួយអាចជះឥទ្ធិពលអាក្រក់រូបភាព FIFA និងធ្វើតម្លៃកីឡាបាល់ទាត់ធ្លាក់ចុះ
នៅក្នុងឯកសារកម្រាស់ ១៦៧ទំព័រដែលជាផ្លៃផ្កាបានមកពីការស៊ើបអង្កេតអស់រយៈពេលជាច្រើនឆ្នំា មានបទចោទប្រកាន់ចំនួន ៤៧ករណីដែលតុលាការអាមេរិកំាងបានចោទប្រកាន់លើមន្រ្តី FIFA ចំនួន ៩នាក់ ក្នុងនោះមានអនុប្រធាន FIFA ពីរនាក់ និង ៥នាក់ផ្សេងទៀតដែលជាប្រធានក្រុមហ៊ុន Sponsor របស់ FIFA មានដូចជាក្រុមហ៊ុន Coca-Cola Adidas McDonald's Nike និងក្រុមកាតធនាគារ Visa។ បទចោទប្រកាន់មានតំាងពីការលាងលុយកង្វក់ និងមានគណនីលួចលាក់នៅបរទេស ដូចជានៅហុងកុង ឬនៅស្វីសក្នុងរយៈពេល ២៥ឆ្នំាកន្លងទៅ និងដែលគិតជាទឹកប្រាក់មានដល់ទៅ ១៥០លានដុល្លារ។
សំណួរដែលគ្រប់គ្នាកំពុងចង់ដឹងនោះគឺថា ហេតុអ្វីបានជាតុលាការអាមេរិកំាងមានសិទ្ធិប្តឹងផ្តល់ជនបរទេសដែលមិនស្ថិតក្នុងប្រទេសខ្លួន?
ជាការពិត ការចាប់ខ្លួនមន្រ្តី FIFA ចំនួន ៧នាក់មិនមែនស្ថិតក្នុងទឹកដីអាមេរិកំាងទេ តែតាមច្បាប់អាមរិកំាង ដោយចរាចរណ៍លុយពីទង្វើពុករលួយ ស៊ីសំណូកសូកប៉ាន់ទំាងនេះបានឆ្លងកាត់តាមធនាគារអាមេរិកំាង តុលាការអាមេរិកំាងអាចធ្វើការប្តឹងផ្តល់ និងទាមទារឲ្យបញ្ជូនជនជាប់ចោទទៅកាត់ទោសក្នុងទឹកដីអាមេរិកំាង។ បើរកឃើញថាមានជាប់ពាក់ព័ន្ធនឹងរឿងពុករលួយមែន ជនជាប់ចោទនឹងអាចទទួលទោសជាប់គុក ២០ឆ្នំា។ និយាយពីប្រធាន FIFA លោកសេប ប្លាធ័រ (Sepp Blatter) វិញ តុលាការអាមរិកំាងបានបដិសេធមិនធ្វើអត្ថាធិប្បាយអ្វីទំាងអស់។ តែនាយកទទួលបន្ទុកទំនាក់ទំនង FIFA ឲ្យដឹងថា លោកប្លាធ័រនឹងបន្តកាន់តំណែង FIFA និងអាចជាប់អាណត្តិទី៥ នៅក្នុងសមាជប្រចំាឆ្នំាក្នុងថ្ងៃនេះ និងថ្ងៃស្អែក។
យ៉ាងណាក៏ដោយ រឿងអាស្រូវពុករលួយបានធ្វើរូបភាពរបស់សហព័ន្ធកីឡាបាល់ពិភពលោកអាប់ឱន និងដែលចង់ ឬមិនចង់ រឿងអាស្រូវមួយនេះនឹងធ្វើឲ្យតម្លៃកីឡាបាល់ទាត់ដ៏ប្រជាប្រិយធ្លាក់ចុះយ៉ាងខ្លំាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ