ប្រតិបត្តិការវែករកជនពុករលួយក្នុង FIFA កំពុងពុះកញ្ជ្រោល ដែលអាចដុតរោលលោក Sepp Blatter ឲ្យខ្ទាតចេញពីតំណែង
ក្នុងសប្តាហ៍នេះ ព័ត៌មានពីអំពើពុករលួយក្នុងសហព័ន្ធបាល់ទាត់ពិភពលោក (FIFA) បាននឹងកំពុងតែបញ្ឆេះភ្លើងក្រោមកៅអីជាប្រធានសហព័ន្ធបាល់ទាត់ពិភពលោក របស់លោក Sepp Blatter។ នៅថ្ងៃព្រហស្បតិ៍នេះ ប្រធានសមាគមន៍បាល់ទាត់អង់គ្លេស FA ទើបបានទទូច ឲ្យលោក Sepp Blatter ត្រូវតែចេញពីតំណែង។ ហើយកាលពីថ្ងៃពុធម្សិលមិញ ប្រតិបត្តិការវែករកជនពុករលួយក្នុងវិស័យបាល់ទាត់ ក៏ទើបបានចាប់ខ្លួនអតីតអនុប្រធាន FIFA លោក Jack Warner បន្ទាប់ពីរដ្ឋអាជ្ញាអាមេរិក បានរកឃើញថា លោកបានទទួលសំណូក ពេលជ្រើសរើសប្រទេសធ្វើជាម្ចាស់ផ្ទះការប្រកួតបាល់ទាត់ពិភពលោក World Cup អំឡុងឆ្នាំ ១៩៩៨ និង ២០១០។ ក្រៅពីនោះ កាលពីថ្ងៃពុធ ក៏មានផងដែរ ការចាប់ខ្លួនមន្ត្រី FIFA ចំនួន ៧នាក់ ពីរឿងទទួលសំណូក និងពុករលួយ ក្នុងពិភពបាល់ទាត់នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
«គ្មានផ្លូវដើម្បីកសាងទំនុកចិត្តចំពោះ FIFAនោះទេ ប្រសិនបើលោក Sepp Blatter នៅតែបន្តតំណែងទៀតនោះ។ លោក Sepp ត្រូវតែលាចេញ ឬត្រូវចេញដោយការបោះឆ្នោតទម្លាក់ ឬយើងអាចរកផ្លូវទី៣ ដើម្បីកុំទុកគាត់ឲ្យនៅ។ ធ្វើយ៉ាងម៉េចក៏បាន ឲ្យតែលោក Sepp Blatter ចេញពីតំណែងជាប្រធាន FIFA»។ នេះគឺជាសម្តីរបស់ Greg Dyke ប្រធានសមាគមន៍បាល់ ទាត់អង់គ្លេស ដែលបាននិយាយនៅថ្ងៃព្រហស្បតិ៍នេះ។
ការលើកឡើងនេះ ត្រូវបានធ្វើឡើង បន្ទាប់ពីប្រតិបត្តិការវែកមុខរកជនពុករលួយក្នុងវិស័យបាល់ទាត់ពិភពលោក កំពុងតែកក្រើកយ៉ាងខ្លាំង នៅក្នុងសប្តាហ៍នេះ។ លោក Sepp Blatter ប្រធានសហព័ន្ធបាល់ទាត់ពិភពលោក FIFA បានរងការចោទប្រកាន់ថា បានទទួលសំណូក ដើម្បីឲ្យប្រទេសរុស្ស៊ី និងកាតា ធ្វើជាម្ចាស់ផ្ទះ រៀបចំការប្រកួតបាល់ទាត់ពិភពលោក World Cup នាឆ្នាំ ២០១៨ និងឆ្នាំ ២០២២ ខាងមុខ។
កាលពីថ្ងៃពុធ ក្រុមអ្នកតាមដានអំពើពុករលួយ រួមជាមួយនឹង FBI និងអាជ្ញាធរស្វីសផង ទើបបានចាប់ខ្លួនមន្ត្រី FIFA ចំនួន ៧នាក់ នៅសណ្ឋាគារ Luxury Zurich ប្រទេសស្វីស ខណៈពេលពួកគេត្រូវទៅចូលរួមក្នុងសន្និបាតប្រចាំឆ្នាំ និងការបោះឆ្នោតជ្រើសរើសមេដឹកនាំប្រធាន FIFAថ្មី នៅទីនោះ។ អាជ្ញាធរអាមេរិក បាននិយាយថា មន្ត្រីផ្នែកបាល់ទាត់ ៩នាក់ ក្នុងចំណោម ១៤នាក់ អាចនឹងត្រូវជាប់ពន្ធនាគារ ២០ឆ្នាំ ប្រសិនបើរកឃើញថា មានជាប់ពាក់ព័ន្ធនឹងអំពើពុករលួយ ដែលមានទំហំទឹកប្រាក់ ១៥០លានដុល្លារនោះ។
ក្រុមហ៊ុនដែលបានចំណាយលុយរាប់រយលានដុល្លារ ឧបត្ថម្ភបាល់ទាត់ធំៗ រួមមាន Coca-Cola, Adidas, McDonald's និង Visa បានជំរុញ ឲ្យមានការស៊ើបអង្កេតបន្តទៀត ដើម្បីកំចាត់អំពើពុករលួយក្នុងវិស័យបាល់ទាត់នេះ។
អាជ្ញាធរអាមេរិក បាននិយាយថា មន្ត្រីអាហ្វ្រិកខាងត្បូង បានចំណាយប្រាក់ ១០លានដុល្លារ ដើម្បីសូកប៉ាន់ ឲ្យអាហ្វ្រិកខាងត្បូង អាចធ្វើជាម្ចាស់ផ្ទះរៀបចំ World Cup នៅឆ្នាំ ២០១០ ខណៈកិច្ចប្រជុំនៅស្វីស កំពុងបន្តស៊ើបករណីរុស្ស៊ី និងកាតា អាចធ្វើជាម្ចាស់ផ្ទះ នៅឆ្នាំ ២០១៨ និង២០២២។
នៅថ្ងៃពុធម្សិលមិញ អតីតអនុប្រធាន FIFA លោក Jack Warner ក៏ទើបបានត្រូវចាប់ខ្លួន នៅក្នុងប្រទេស Trinidad and Tobago បន្ទាប់ពីរដ្ឋអាជ្ញាអាមេរិក បានរកឃើញថា លោកបានទទួលសំណូក អំឡុងពេលមានការជ្រើសរើសធ្វើជាម្ចាស់ផ្ទះ World Cup ឆ្នាំ ១៩៩៨ និង២០១០ នៅក្នុងប្រទេសបារាំង និងអាហ្វ្រិកខាងត្បូង។
មិនទាន់មានការបញ្ជាក់ថា តើលោក Warner អាចនឹងជាប់ពន្ធនាគារ ឬអត់នោះទេ។ លោក Warner ដែលបានចេញពី FIFA ក្នុងឆ្នាំ ២០១១ បានជាប់សង្ស័យថាមានអំពើពុករលួយ ក្នុងពេលលោកធ្វើជា ប្រធាន CONCACAF និងពេលជាអ្នកប្រឹក្សាឲ្យសមាគមន៍បាល់ទាត់ នៅក្នុងប្រទេស Trinidad and Tobago។ ប៉ុន្តែ លោក Warner បានបដិសេធថាលោកមិនបានប្រព្រឹត្តិកំហុសនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ