ច្បាប់រដ្ឋអៃអូវ៉ាបើកសិទ្ធិឲ្យជនពិការភ្នែកប្រើប្រាស់អាវុធ
ចុះផ្សាយនៅថ្ងៃ៖
ស្តាប់ - ០៥:១៩
“ស្រមៃទៅមើលថា ខ្ញុំកាន់កាំភ្លើងក្នុងដៃ។ នោះគឺពិតជារូបភាពដ៏ឆ្កួតលីលាមិនខាន” លោកStevie Wonder ជាអ្នកចម្រៀងអាមេរិកាំងដ៏ល្បី ដែលពិការភ្នែកតាំងពីកំណើត ធ្លាប់បាននិយាយយ៉ាងដូច្នេះប្រាប់ទូរទស្សន៍CNN ដើម្បីចំអកឲ្យច្បាប់ស្តីពីការប្រើប្រាស់អាវុធនៅសហរដ្ឋអាមេរិក។ នៅក្នុងច្បាប់នោះ ពលរដ្ឋអាមេរិកាំងម្នាក់ៗមានសិទ្ធិកាន់កាប់អាវុធ ដើម្បី ស្វ័យការពារខ្លួន។ សិទ្ធិដែលត្រូវអនុវត្តដោយគ្មានរើសអើង កំពុងបង្កឲ្យមានមតិចម្រូងចម្រាស បន្ទាប់ពីជនពិការភ្នែកក៏ត្រូវបានគេផ្តល់សិទ្ធិឲ្យប្រើប្រាស់អាវុធដែរ។
នៅរដ្ឋអៃអូវ៉ា ច្បាប់អនុញ្ញាតឲ្យប្រជាជនអាមេរិកាំងពិការភ្នែកអាចមានសិទ្ធិកាន់កាំភ្លើង បានចេញតាំងពីឆ្នាំ ២០១១ម្ល៉េះ ប៉ុន្តែ រឿងជនពិការអាចប្រើប្រាស់អាវុធបានក្នុងរដ្ឋនេះ ទើបតែចាប់បែកខ្ចរខ្ចាយ នៅដើមសប្តាហ៍មុន នៅអាមេរិក បន្ទាប់ពីមានការចុះផ្សាយព័ត៌មានរបស់វិបសៃតិ៍អាមេរិកាំងមួយឈ្មោះ Des Moines Register។
ច្បាប់របស់រដ្ឋអៃអូវ៉ា បានហាមឃាត់មិនឲ្យគេបដិសេធផ្តល់អាវុធដល់មនុស្សពិការ។ ប្រធានក្រុមសង្កាត់ដើម្បីសណ្តាប់ធ្នាប់សន្តិសុខ នៅក្នុងរដ្ឋអៃអូវ៉ាឆ្លៀតបកស្រាយច្បាប់នេះ ដោយបានបើកដៃផ្តល់អាជ្ញាបណ្ណកាន់កាប់អាវុធដល់មនុស្សពិការភ្នែក។
ហេតុអ្វីបានជាមនុស្សពិការត្រូវការកាន់អាវុធ? ឆ្លើយទៅនឹងសំណួរនេះ ជនពិការភ្នែកដែលបានទិញអាវុធពីហាងអាវុធនៅរដ្ឋអៃអូវ៉ា បាននិយាយថា ពួកគេគ្រាន់តែចង់បានអាវុធ នៅជាប់នឹងខ្លួន ដូចមនុស្សមិនពិការភ្នែក ទៅតាមសិទ្ធិដែលមានចែងក្នុងច្បាប់ និងម្យ៉ាងទៀត ដើម្បីការពារខ្លួនពីការគំរាមកំហែងលើរូបរាងកាយ។
ដូចរដ្ឋផ្សេងទៀត រដ្ឋអៃអូវ៉ា បានហាមឃាត់មិនឲ្យមនុស្សពិការភ្នែក ឬមើលមិនសូវច្បាស់បើកឡាន ប៉ុន្តែ ផ្ទុយទៅវិញ ក្នុងរឿងប្រើអាវុធ រដ្ឋអៃអូវ៉ាធ្វើខុសពីគេដោយបានអនុញ្ញាតឲ្យមនុស្សពិការភ្នែកអាចប្រើប្រាស់អាវុធបាន។
សំណួរនៅត្រង់ថា បើពិការភ្នែក ឬស្រវាំងភ្នែកមើលមិនច្បាស់ តើគេអាចប្រើអាវុធ បាញ់ចំគោលដៅយ៉ាងម៉េចបានទៅ។ តាមច្បាប់របស់រដ្ឋអៃអូវ៉ា ជនពិការភ្នែកនីមួយៗត្រូវឆ្លងកាត់ការហ្វឹកហ្វឺនបាញ់អាវុធសិន មុននឹងទទួលបានអាជ្ញាបណ្ណកាន់កាប់អាវុធ។ ក្រុមអាជ្ញាធរសង្កាត់ដែលជាអ្នកមានសិទ្ធិចេញអាជ្ញាបណ្ណប្រើអាវុធដល់ជនពិការបានអះអាងថាពួកគេមានសមត្ថភាពបង្រៀនដល់ជនពិការឲ្យចេះបាញ់កាំភ្លើង។ ឧទាហរណ៍ មនុស្សពិការភ្នែកត្រូវគេបង្រៀនឲ្យចេះស្តាប់ និងទទួលអារម្មណ៍ដឹងពីស្ថានការណ៍ដែលអាចគំរាមកំហែងរូបកាយរបស់ពួកគេ។ ពួកគេត្រូវបង្រៀនឲ្យតម្រង់កាំភ្លើង ទៅលើស្រមោលស្ទុងៗ ឬទៅរកសំឡេងដែលជាប្រភពគំរាមកំហែង។ មនុស្សពិការភ្នែកត្រូវគេបង្រៀនផងដែរ ពីរបៀបកាន់អាវុធ ដើម្បីជៀសវាងគ្រោះថ្នាក់ជីវិតផ្ទាល់ខ្លួន និងមនុស្សដទៃ។ គឺគ្រោះថ្នាក់ជីវិតអ្នកដទៃនេះដែលកំពុងធ្វើឲ្យគេព្រួយបារម្ភ ពីព្រោះថា តាមច្បាប់រដ្ឋអៃអូវ៉ា មនុស្សពិការភ្នែកអាចកាន់អាវុធនៅទីកន្លែងសាធារណៈ។
បើតាម ប្រធានសមាគមជនពិការភ្នែក នៅរដ្ឋអៃអូវ៉ា ការលុបបំបាត់ច្បាប់មិនឲ្យជនពិការភ្នែកប្រើប្រាស់អាវុធ នោះគឺជាសកម្មភាពរើសអើងដែលផ្ទុយនឹងច្បាប់ស្តីពីពិការភាព។ ក្រុមអ្នកការពារសិទ្ធិមនុស្សបានចេញមុខនិយាយការពារសិទ្ធិមនុស្សពិការភ្នែកដោយអះអាងថា ពួកក្រុមមនុស្សពិការមានសតិសម្បជញ្ញៈគ្រប់គ្រាន់ ដើម្បីមិនលើកកាំភ្លើងបាញ់ ទៅលើក្រុមហ្វូងមនុស្ស។
នៅត្រង់ចំណុចនេះ អ្នកកំប្លែងស្ងួតអាមេរិកាំងម្នាក់គឺលោកStephen Colbert បាននិយាយរបៀបចំអកថា អាវុធមានប្រសិទ្ធិភាពជាងឈើច្រត់នាំផ្លូវរបស់មនុស្សពិការភ្នែក។ ជឿចុះថា បើសិនអ្នកមានកាំភ្លើងក្នុងដៃ នោះមនុស្សគ្រប់គ្នា នឹងបើកផ្លូវឲ្យអ្នកដើរ យ៉ាងឆាប់បំផុត។
ពាក្យកំប្លែងលាយឡំដោយការពិត ព្រោះថា គឺកំាភ្លើងដែលលក់ដោយស្របច្បាប់នេះឯងដែលបានសម្លាប់មនុស្សប្រមាណ៣ម៉ឺននាក់ ក្នុងមួយឆ្នាំៗ។ ការប្រើប្រាស់អាវុធដ៏មានវិសាលភាពធំធេង ត្រូវបានគេរិះគន់ប៉ុន្មានលើកមកហើយ ជាពិសេស បន្ទាប់ពីមានព្រឹត្តិការណ៍បាញ់សម្លាប់ទៅលើមនុស្សទាំងហ្វូងៗ ដូចជានៅរោងកុនក្នុងរដ្ឋកូឡូរ៉ាដូ ឬការបាញ់រះសម្លាប់កូនសិស្សសាលាជាង២០នាក់ នៅ រដ្ឋញូវថោន។ ជនឧក្រិដ្ឋទាំងអស់សុទ្ធតែត្រូវគេរកឃើញថា បានប្រើសិទ្ធិទិញអាវុធស្របច្បាប់របស់ខ្លួន។ លោកអូបាម៉ាវិញខំប្រឹងតស៊ូមតិដើម្បីធ្វើឲ្យគេកែប្រែច្បាប់ស្តីពីការកាន់កាប់អាវុធ ប៉ុន្តែ នៅទីបំផុត មិនបានជោគជ័យ។
ហេតុអ្វីបានការប្រយុទ្ធរបស់លោកអូបាម៉ាមិនងាយនឹងបានជោគជ័យ? នៅអាមេរិក មនុស្សកាន់អាវុធគឺសឹងជារឿងធម្មតា។ នេះបើគេមើលទៅលើប្រវត្តិប្រពៃណីរបស់ប្រទេសនេះ។ ក្រុមហ៊ុនលក់អាវុធជាច្រើន ដែលខ្វល់ពីឆ្នាំងបាយរបស់ពួកគេ បានតស៊ូមតិជាមួយអ្នកធ្វើច្បាប់អាមេរិក ដើម្បីពង្រឹងច្បាប់កាន់កាប់អាវុធនេះ។
អ្នកគាំទ្រច្បាប់នេះភាគច្រើន គឺក្រុមដើម្បីសេរីភាព libéreaux ដែលគិតថា ការមានអាវុធក្នុងដៃ គឺបញ្ជាក់ពីសិទ្ធិជាមូលដ្ឋានរបស់បុគ្គលម្នាក់។ ពោលគឺមនុស្សដែលមានអាវុធក្នុងដៃ គឺជាមនុស្សដែលមានសេរីភាពពេញលេញ។ ក្នុងករណីមានការគំរាមកំហែង ពួកគេមិនចាំបាច់ពឹងតែទៅលើជំនួយ អន្តរាគមន៍របស់ប៉ូលិស។
មានកាំភ្លើងក្នុងដៃ ពួកគេអាចឆ្លើយតបនឹងស្ថានការណ៍អាក្រក់ ដែលគំរាមកំហែងជីវិតរបស់ពួកគេ។ ទ្រឹស្តីទាំងនេះបានធ្វើឲ្យអាមេរិកប្រគល់សិទ្ធិទិញ ប្រើប្រាស់អាវុធដល់មនុស្សគ្រប់រូប លើកលែងមនុស្សអាយុតិចជាង២១ឆ្នាំ មនុស្សប្រមឹក ឬមនុស្សដែលធ្លាប់ជាប់បទឧក្រិដ្ឋកន្លងមក។ សម្រាប់ក្រុម ដើម្បីសេរីភាព រដ្ឋមួយមានភាពរីកចម្រើន និងពោរពេញដោយសេរីភាព គឺជារដ្ឋ ដែលមនុស្សស្លូតត្រង់អាចមានកាន់អាវុធ ដូចជាពួកឧក្រិដ្ឋជន។ បើតាមក្រុមនេះ បទល្មើសមានតិចនៅក្នុងប្រទេសដែលមានប្រជាជនកាន់អាវុធគ្រប់ដៃ ហើយបទឧក្រិដ្ឋនឹងកើតឡើងច្រើន នៅក្នុងប្រទេសដែលមានតែប៉ូលិស និងជនឧក្រិដ្ឋដែលមានអាវុធក្នុងដៃ។
ការអះអាងរបស់ក្រុមដើម្បីសេរីភាពនេះមិនអាចបញ្ចុះបញ្ចូលគេបានទេ។ នេះបើគេមើលទៅលើព្រឹត្តិការណ៍សម្លាប់មនុស្សជាហ្វូងៗកន្លងមក។ ការមានអាវុធ ដើម្បីការពារខ្លួនជាសិទ្ធិរបស់ពលរដ្ឋអាមេរិកាំង។ ប៉ុន្តែ ជាមួយគ្នានេះ ភាពធូរលុងក្នុងការផ្តល់សិទ្ធិដល់មនុស្សឲ្យកាន់កាប់អាវុធ នឹងអាចបង្កទៅជាភាពអនាធិបតេយ្យ ជាពិសេស នៅពេលគេមិនអាចគ្រប់គ្រងចិត្តរបស់អ្នកកាន់អាវុធ។ ជាក់ស្តែង ជនឧក្រិដ្ឋបាញ់សម្លាប់មនុស្ស នៅក្នុងរដ្ឋកូឡូរ៉ាដូ ធ្លាប់ត្រូវគ្រូពេទ្យវាយតម្លៃថា មានជម្ងឺផ្លូវចិត្ត ប៉ុន្តែ ពីសំបកក្រៅ ច្បាប់នៅតែអនុញ្ញាតឲ្យជនរូបនេះទិញអាវុធ ដែលគេបានយកទៅបាញ់មនុស្សពេញរោងកុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ