ការចរចាស្វែងរកសន្តិភាពស៊ីរី នៅហ្សឺណែវទីពីរនៅតែគ្មានពន្លឺ
ចុះផ្សាយនៅថ្ងៃ៖
ស្តាប់ - ០៦:០៥
នៅទីក្រុងហ្សឺណែវ ការចរចារវាងក្រុមប្រឆាំង និងអ្នកតំណាងរដ្ឋាភិបាលស៊ីរីបានបន្តធ្វើមួយថ្ងៃទៀត នៅថ្ងៃសៅរ៍ទី ១៥ កុម្ភៈ។ ៦ថ្ងៃមកហើយ ដែលក្រុមប្រឆាំងស៊ីរី និងតំណាងរដ្ឋាភិបាលស៊ីរីជួបចរចាគ្នា ក្រោមការដឹកនាំរបស់ប្រេសិតអង្គការសហប្រជាជាតិ ប៉ុន្តែ ជំនួបចរចាត្រូវបានលោកប្រេសិតរៀបរាប់ថា មិនបានបោះជំហានទៅមុខសោះ។ នៅថ្ងៃសុក្រ ប្រធានាធិបតីអាមេរិកបានសន្យាទៅព្រះមហាក្សត្រហ្សកដានីថា នឹងរកមធ្យោបាយដាក់គំនាបបន្ថែមលើរដ្ឋាភិបាលស៊ីរី។
ការចរចា៦ថ្ងៃមកនេះធ្វើឡើង នៅក្នុងបរិយាកាសមួយដែលស្រពិចស្រពិល គឺគេមិនបានឃើញចេតនា ឆន្ទះរបស់ភាគីទាំងពីរ ដើម្បីចង់ដោះស្រាយជម្លោះទាល់តែសោះ។ ភាគីម្ខាងៗ នៅតែប្រកាន់ជំហរ នយោបាយរបស់ខ្លួនមិនផ្លាស់ប្តូរ ហើយជំហររបស់ពួកគេទៀតសោតគឺខុសគ្នា ១៨០ដឺក្រេ ដែលមិនអាចឲ្យពួកគេគ្មានចំណុចរួមណាមួយ យកមកនិយាយត្រូវគ្នា។
ដើមឡើយ នៅក្នុងរបៀបវារៈនៃកិច្ចប្រជុំដែលបើកធ្វើ តាំងពីថ្ងៃចន្ទ ប្រេសិតរបស់អង្គការសហប្រជាជាតិបានកំណត់ប្រធានបទបីដែលភាគីក្រុមប្រឆាំង និងតំណាងរដ្ឋាភិបាលស៊ីរីត្រូវយកមកពិចារណា ដោះស្រាយរួមគ្នា។ ចំណុចទាំងនោះមានដូចជា ការស្វែងរកកុងសង់ស៊ុស ដើម្បីបង្កើតរដ្ឋាភិបាលបណ្តោះអាសន្ន ការស្វែងរកកិច្ចព្រមព្រៀងបទឈប់បាញ់ និងទីបី គឺ បើកឲ្យមានសហប្រតិបត្តិការផ្នែកមនុស្សធម៌នៅតាមតំបន់ជម្លោះ ពិសេសជម្លៀសជនស៊ីវិលដែលកំពុងជាប់កុននៅក្នុងការវាយប្រហារគ្នា រវាងកម្លំាងរដ្ឋាភិបាល និងកម្លំាងប្រឆំាង។
ប៉ុន្តែ ចាប់តាំងពីថ្ងៃបើកដំបូង ការចរចាបានជាប់គាំងនៅត្រឹម ចំណុចទីមួយ គឺការបង្កើតរដ្ឋាភិបាលបណ្តោះអាសន្ន។ ក្រុមប្រឆាំងបានទាមទារឲ្យគេបង្កើតរដ្ឋាភិបាលអន្តរកាលមួយ ដើម្បីគ្រប់គ្រងប្រទេស រហូតដល់មានការបោះឆ្នោតថ្មីមួយ។ ក្រុមប្រឆាំងទាមទារដាច់ខាត មិនឲ្យលោកប្រធានាធិបតីបាស្ហា អាល់អាសាដ ចូលរួម នៅក្នុងរដ្ឋាភិបាលអន្តរកាលនោះទេ។
អ្នកតំណាងរដ្ឋាភិបាលស៊ីរីវិញធ្វើថ្លង់ ធ្វើគ នៅចំពោះមុខការទាមទាររបស់ក្រុមប្រឆាំង។ សម្រាប់ភាគីរដ្ឋាភិបាល គ្មានទេ ច្រកដំណោះស្រាយនយោបាយណា ដែលគ្មានការចូលរួមពីលោកបាស្ហា អាល់អាសាដ។ ក្រុមតំណាងរដ្ឋាភិបាលវាយតម្លៃថា ក្រុមប្រឆាំងកំពុងទាមទារ ចំណុចដែលគេមិនអាចធ្វើ ទៅរួច។ ម្យ៉ាងទៀត នៅក្នុងកិច្ចប្រជុំនៅហ្សឺណែវ ក្រុមតំណាងរដ្ឋាភិបាលស៊ីរី មិនបាននិយាយច្រើនទាក់ទងនឹងដំណើរការបង្កើតរដ្ឋាភិបាលបណ្តោះអាសន្ននៅស៊ីរីទេ។ ផ្ទុយទៅវិញ អ្នកតំណាងរដ្ឋាភិបាលស៊ីរី លើកនិយាយច្រើនពីការបង្កើតយន្តការដើម្បីប្រយុទ្ធប្រឆាំងនឹងក្រុមភេរវក ដែលកំពុងរុករាន នៅក្នុងសង្រ្គាមស៊ីវិលស៊ីរី។
រហូតមក រដ្ឋាភិបាល តែងចាត់ទុកក្រុមប្រឆាំងប្រដាប់អាវុធទាំងអស់ថា សុទ្ធតែក្រុមភេរវករ ដែល គ្រោះថ្នាក់សម្រាប់សន្តិសុខជាតិ។ ហើយ រដ្ឋាភិបាលតែងតែលើកយកហេតុផលនេះ ដើម្បីការពារការវាយប្រហារស្របច្បាប់របស់កងទ័ពស៊ីរីទៅលើក្រុមប្រឆាំង។
នៅថ្ងៃសៅរ៍ អ្នកតំណាងអាមេរិក និងរុស្ស៊ី បានទៅចូលរួម នៅក្នុងកិច្ចប្រជុំហ្សឺណែវទីពីរ។ អាមេរិក និងរុស្ស៊ី ធ្លាប់បានវែកត្រួសត្រាយឲ្យមានកិច្ចប្រជុំហ្សឺណែវ ដើម្បីបញ្ចប់ជម្លោះ សង្រ្គាមស៊ីវិលនៅស៊ីរី។ កាលពីថ្ងៃសុក្រទី ១៤ កុម្ភៈ នៅក្នុងជំនួបមួយ ជាមួយព្រះមហាក្សត្រហ្សកដានី លោកប្រធានាធិបតីអាមេរិក បារ៉ាក់ អូបាម៉ា ទើបតែបញ្ជាក់ជាថ្មីជំហររបស់អាមេរិកក្នុងការគាំទ្រក្រុមប្រឆាំងស៊ីរី។ លោកបានបញ្ជាក់ថា អាមេរិកនឹងសិក្សា ពិនិត្យមើលយន្តការថ្មី ដើម្បីដាក់គំនាបទៅលើរដ្ឋាភិបាល របស់លោកបាស្ហា អាល់អាសាដ។ ទោះជាលោកអូបាម៉ាមិនបានទម្លាយឲ្យដឹងពីផែនការលម្អិតរបស់លោក ប៉ុន្តែ សេតវិមានធ្លាប់បានប្រកាសថា នឹងជួយផ្នែកអាវុធដល់ក្រុមប្រឆាំងស៊ីរី ដែលសូវមិនជ្រុលនិយម ពោលគឺដើម្បីដាក់សម្ពាធលើរដ្ឋាភិបាលស៊ីរីឲ្យបន្ទន់ជំហរ ក្នុងតុ ចរចា។
ជារួម ទាំងអាមេរិក និងរុស្ស៊ី គឺមានភាគីកាន់ជើងរៀងៗខ្លួន។ អាមេរិក និងប្រទេសលោកខាងលិច ដែលការពារក្រុមប្រឆាំង នៅតែចង់ឲ្យមានរដ្ឋាភិបាលអន្តរកាល មួយ គ្មានលោកប៉ាស្ហា អាល់អាសាដ ចំណែករុស្ស៊ីវិញ ដែលជាសម្ព័ន្ធមិត្តរបស់រដ្ឋាភិបាលស៊ីរី នៅតែគិតថា ក្រុមប្រឆាំងសព្វថ្ងៃ ជាក្រុមភេរវករ។ រុស្ស៊ីចង់ឲ្យគេដោះស្រាយបញ្ហាភេរវករនៅស៊ីរីជាអាទិភាពចំបង។ និយាយទៅ និយាយមក គឺមិនខុសពីក្រុមប្រឆាំង និងអ្នកតំណាងរដ្ឋាភិបាលស៊ីរី អាមេរិក និងរុស្ស៊ីនៅតែមានគំនិតខ្វែងគ្នា។
បើទោះបី ជាការចរចាលើកនេះ បរាជ័យ លោកប្រេសិតបានបញ្ជាក់ហើយថា លោកនឹងធ្វើរបាយការណ៍មួយទៅក្រុមប្រឹក្សាសន្តិសុខ ដើម្បីឲ្យគេពិចារណារកដំណោះស្រាយថ្មី។ អាចចាត់វិធានការជាក់ស្តែង ណាមួយ ដើម្បី ដាក់គំនាបលើភាគីជម្លោះទាំងពីរ ឬអាចបង្កើតជំនួបប្រជុំហ្សឺណែវថ្មីមួយទៀត ក៏អាចថាបាន។
នៅក្នុងកិច្ចចរចារហូតមក ភាគីក្រុមប្រឆាំង និងរដ្ឋាភិបាលបានយល់ព្រមព្រៀងគ្នាតែលើចំនុចមួយ គឺបទឈប់បាញ់បណ្តោះអាសន្ន ដែលឈានទៅដល់ការបណ្តោះប្រជាជនស៊ីវិលចេញពីទីក្រុងហូម ដែលបានជាប់អន្ទាក់នៅក្នុងការប្រយុទ្ធគ្នា រវាងក្រុមប្រឆាំង និងទាហានរដ្ឋាភិបាល។ ប្រធានក្រុមមនុស្សធម៌របស់អង្គការសហប្រជាជាតិកំពុងស្រែកអំពាវនាវបន្ថែម ឲ្យប្រទេសទាំង១៥ដែលជាសមាជិករបស់ក្រុមប្រឹក្សាសន្តិសុខ ឲ្យដាក់គំនាបបន្ថែមទៅលើរដ្ឋាភិបាលស៊ីរី ដើម្បីឲ្យរដ្ឋាភិបាលនេះ ឲ្យដោះលែងយុវជនរាប់រយនាក់ ដែលត្រូវបានចាប់ខ្លួន នៅក្នុងការបង្រ្កាបនៅក្នុងទីក្រុងហូមកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ