ការជម្លៀសប្រជាជនស៊ីរីនៅក្រុងហូម ថ្ងៃអាទិត្យនេះ អាចជួបការពិបាកច្រើន
នៅក្រុងហូមប្រទេសស៊ីរី បទឈប់បាញ់៣ថ្ងៃ រវាងកងទ័ពលោកអាសាដ និងក្រុមឧទ្ទាម ត្រូវផុតកំណត់នៅយប់ថ្ងៃអាទិត្យនេះហើយ។ បទឈប់បាញ់នេះ មានទិសដៅជម្លៀសមនុស្សដែលចង់ចាកចេញពីក្រុងហូម និងជួយស្បៀងអាហារថ្នាំសង្កូវ ដល់អ្នកដែលបន្តរស់នៅក្នុងក្រុងនេះ។ កាលពីថ្ងៃសៅរ៍ម្សិលមិញ បទឈប់បាញ់នេះ ត្រូវបានរំលោភបំពានទាំងស្រុង ដោយសារតែរថយន្តដឹកស្បៀងរបស់អង្គការមនុស្សធម៌ស៊ីរី បានរងការបាញ់ប្រហារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
នៅក្រុងហូម ប្រទេសស៊ីរី ថ្ងៃអាទិត្យនេះ ការជម្លៀសស្ត្រី កុមារ និងមនុស្សចាស់ជរា ប្រហែលជាអាចពិបាកនឹងដំណើរការបានស្រួលណាស់។ ដើម្បីជម្លៀសប្រជាជនក្រុងហូម បទឈប់បាញ់រវាងកងទ័ពរដ្ឋាភិបាលនិងក្រុមឧទ្ទាម រយៈពេល៣ថ្ងៃ ដាក់អោយមានតាំងពីថ្ងៃសុក្រមក ត្រូវបានរំលោភទាំងស្រុង នៅថ្ងៃសៅរ៍ម្សិលមិញ។ រថយន្តដឹកស្បៀងជំនួយរបស់អង្គការមនុស្សធម៌ស៊ីរី គ្រាស់សង់រូស Croissant rouge បានរងការបាញ់ប្រហារ។
យោងតាមអង្គការសិទ្ធិមនុស្សស៊ីរី ការបាញ់ប្រហារនៅក្រុងហូម ម្សិលមិញ បានធ្វើអោយមនុស្សស្លាប់៥នាក់ និងប្រមាណ២០នាក់ទៀតរងរបួស។ កងទ័ពលោកអាសាដ និងក្រុមឧទ្ទាមបានទំលាក់កំហុសគ្នាទៅវិញទៅមក ថាបានរំលោភបទឈប់បាញ់នេះ។
ទោះជាមានការបាញ់ប្រហារក្តី នៅថ្ងៃសៅរ៍ម្សិលមិញ អង្គការមនុស្សធម៌ស៊ីរី បានសម្រេចភារកិច្ចផ្តល់ចំណីអាហារ ថ្នាំសង្កូវ ជួយដល់ប្រជាជនក្រុងហូម ហើយអ្នកស្ម័គ្រចិត្តរបស់អង្គការគ្រាស់សង់រូស រួមទាំងអ្នកបំរើការងារអង្គការសហប្រជាជាតិទាំងអស់គ្នា ដែលចុះទៅទីនោះ បាននាំគ្នាចាកចេញពីក្រុងហូមដោយសុវត្ថិភាព។
គួររំលឹកថា បទឈប់បាញ់៣ថ្ងៃ រវាងកងទ័ពរដ្ឋាភិបាលស៊ីរី និងក្រុមឧទ្ទាម ដែលដាក់អោយមានតាំងពីថ្ងៃសុក្រ បានសម្រេចឡើងក្រោមអធីបតីភាពរបស់អង្គការសហប្រជាជាតិ។ បទឈប់បាញ់នេះ មានទិសដៅជម្លៀសស្ត្រី កុមារ និងមនុស្សចាស់ចេញពីក្រុងហូម និងផ្តល់ជំនួយមនុស្សធម៌ដល់ប្រជាជនប្រមាណ៣ពាន់នាក់ទៀត ដែលមិនចង់ចេញពីទីនោះ។ កាលពីថ្ងៃសុក្រមានមនុស្ស៨៣នាក់ប៉ុណ្ណោះ ដែលត្រូវបានជម្លៀសពីក្រុងហូម។
ក្រុងហូមជាក្រុងចំណាស់ស្ថិតនៅភាគកណ្តាលស៊ីរី ត្រូវគេចាត់ទុកថា ជាទីក្រុងបដិវត្តន៍ប្រឆាំងប្រធានាធិបតីអាសាដ។ នៅទីនោះ ប្រជាជនមានការបែងចែកបក្សពួកគ្នា រវាងអ្នកកាន់សាសនាអ៊ីស្លាមនិកាយស៊ុននីត ដែលគាំទ្រក្រុមឧទ្ទាម និងអ្នកកាន់និកាយអាឡាវីត គាំទ្រលោកអាសាដ។ កងទ័ពរដ្ឋាភិបាលបានឡោមព័ទ្ធក្រុងហូម អស់៦០០ថ្ងៃមកហើយ។ នៅយប់ថ្ងៃអាទិត្យនេះ បទឈប់បាញ់៣ថ្ងៃរវាងកងទ័ពស៊ីរីនិងក្រុមឧទ្ទាម នឹងផុតកំណត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ